Read Futuna-Aniwa MARKUS, 16 Bible Online

MARKUS, 16 - Futuna-Aniwa bible

MARKUS, 16

¹NISIRI nopoge tapu, Mere o Mactala, ma mere ta nana o Jakobus, ma Salome nifakamata ane iamosia erefia, pe acre niromai ma iamosia aia.

²Ia tapopo ana o ta nopoge tasi mokage o ta wik, acre niromai ia tupunaga ia tara nokonace.

³Acre nifasao iacre, Akai kafurusiace ta fatu o ta feitoca tsha tupunaga iacitia.

⁴Iai acre neisara, acre neicitia ta fatu nifurusiace ma aia sore su.

⁵Acre nokororo ia ta tupunaga, acre neicitia tasi atumtane nokonofo ia norima matau iai, nitaka iai tumiga palo ma kego, ma acre nimtacu.

⁶Aia neitucage iacre. Natshicina kumtacu; Acowa kosara Iesu o Nasareth, aia acre neitucia ia tererakow fakaravasia; aia nimasike; aia kojimra icunei; kowcitia ta none iai acre neinagi aia.

⁷Kaia roro tshowa retu, keitucua niana tagata aia nifakairo ma Pitrus, pe aia kofano mokagi acowa ia fanua Calili; econa acowa kacitia aia, hepe neitucua iacowa.

⁸Acre niroro efuafo milowa, ma nifura ia tupunaga; ma acre niviviri ma nimasaro, acre sefasao tagata; ma acre nimtacu.

⁹¶ Milownei enaia Iesu nimasike i tapopo ana i nopoge tasi mokagi acre o ta wik, Mere o Mactala neicitia aia mokagi acre iotshi, ta fine tira aia neisegiake watafa niana roto agelo isa fitu.

¹⁰Aia nifano neitucage iacre neinofo ia aia, hepe acre nimakuru ma nitagi.

¹¹Acre iai, pe acre nifakarogona aia komouri, ma pe aia neicitia, aia acre sefakarogrogo.

¹²¶ Wamuri nei aia nimai hepe tasi foci ia erua o acre neicitia, hepe acrawa niroro fakaliki, niroro ia tumrai papai.

¹³Acrawa niroro neitucage iacre otshi; acre sefakarogrogo tafasao o tsharawa ma.

¹⁴¶ Wamuri nei aia nimai iacre ta eleven hepe acre neinofo ia takai, ma aia neiseciria acre ia sefakarogrogo tshare ma arotorea mukei, ia nei acre sefakarogrogo ta fasao o acre neicitia aia wamuri aia nimasike.

¹⁵Aia neitucage iacre, Roro acowa ia iafanua iotshi, fakairo ta fasao erefia ia tagatotshi.

¹⁶Aia kafakarogrogo avau ma kabaptiso, aia kafano taragi, kaia aia sefakarogrogo avau kafano ia tiafi sore.

¹⁷Ane nei karoro wamuri acre kafakarogrogo avau, Ia tshaku neigo acre kasigiake agelo isa, ma acre kafasao i afasao fou.

¹⁸Acre kavake agata i arimorea; pe acre kanumia ane isa kona keimna tagata komate aia seiauiai acre, ma acre fecetshifo arimore iluga tagata komace, ma acre kamouri.

¹⁹¶ Hepe nei wamuri ta Teriki nifasao iacre, aia nifitshi iluga taragi, ma neinofo iai ia norima matua o Atua.

²⁰Acre niroro efuafo nifakairo tagata i iafanua iotshi, ta Teriki nokositu acre, neimna ta fasao tomatua ia ane sore nalupai roro wamuri. Amen.