Read Futuna-Aniwa MARKUS, 3 Bible Online

MARKUS, 3 - Futuna-Aniwa bible

MARKUS, 3

¹AIA nifano foci a tafare mori; tasi tatane iai tshana norima taru.

²Acre nifatshigeia aia, pe aia penpena aia ia nopoge tapu; pe acre kogorosia aia.

³Aia neitucage tatane tshan orima taru, Kotu mokagi.

⁴Aia neitucage iacre, Itapu keimna maganerefia ia nopoge tapu, mo keimna maganisa? keipare ania mouri, mo keitaia komate? Kaia acre sefasao.

⁵Iai aia neicitia kofori acre ia fakainina, tshana roto nimai ia rotorea mukei, aia neitucage ia tatane, Fakatonusia norima tshou. Aia nifakatonusia aia, ma tshan orima neipenpena erefia hepe nontafa foci norima.

⁶Fakou Farasi niroro efuafo, ma milowa neitucage tagata o Herot keisitu takaroiai aia.

⁷¶ Kaia Iesu natshicina acre, ia niana tagata aia nifakairo niroro ia tatai; tagata nalupai su o Calili niroro wamuri aia, ma o Juteia.

⁸Ma ia Jerusalem, ma ia Itumia, ma ai nofokage Jortan, ma acre kofori Tairus ma Saiton, tagata nalupai su, acre neirogona ane sore aia neimna, acre niromai iateia.

⁹Aia nifasao niana tagata aia nifakairo, pe tuporuku sisi tasi konofo iateia, ma tagata nalupai su nifitacina iai, pe acre keipecitshia aia.

¹⁰Ma aia neipenpena erefia nalupai tagata; pe acre nimace niroro milowa itata aia keitofia aia, acreiotshi nimace iai.

¹¹Agelo isa ma, pe neicitia aia, nito imoa aia, neitapa nokoutucua, Akoi ta Nontariki o Atua.

¹²Ma aia neitucuasana mukei acre, pe acre natshicina koutucua aia akai.

¹³¶ Aia nifitshi ia taora tasi, neitapa tagata iai aia neicitiafakarafia; ma acre niromy iateia.

¹⁴Aia niamo fakou twelv, pe acre konofo ia aia, ma pe aia kownace acre keifakairo tagata tshan afasao erefia.

¹⁵Kavigimare tomatua keipenpena amaci o tagata, kesigiake agelo isa ma;

¹⁶Saimona aia neitucage neigo mokagi Pitrus;

¹⁷Jakobus ta nontariki o Sebeteius, ma Joanes ta noso o Jakobus; aia neitucage eigorawa mokagi Boanirjis, ta nokano o afasao nei, Ta untariki o tafatshiri,

¹⁸Ma Antreus, ma Felipos, ma Bartholomeus, ma Tomas, ma Jakobus ta nontariki o Alfeus, ma Thateus, ma Saimona tatane o Selotai,

¹⁹Ma Jutas tatane Kariot, aia nifakareresia aia; ma acre niroro efare tishana.

²⁰Tagata nalupai su nifetacina foci iai, pe acre sekai mana aofa iai.

²¹Iai niana tagata neirogona o aia, acre niroro efuafo keipurutshia aia; ma acre neitucua, Aia kowkali.

²²¶ Fakou serea ma fakairo niteifo ia Jerusalem neitucua, Aia niamo Belsebub, ma ia teriki o agelo isa aia segiake agelo isa.

²³Aia nitapa acre iateia, neitucage acre ia tafasao fakatagasia, Tiaha Satana segiake Satana?

²⁴Pe Tavaka tasi nontafa feimacowa nontafa, tavaka tira sekonofo mukei.

²⁵Pe tafare tasi faru tagata iai feimacowa faru tagata iai, tafare tira sekonofo mukei.

²⁶Pe Satana masike feimacowa Satana, tshana roto erua, aia sekonofo mukei, kaia kojimra.

²⁷Jimra tatane fano ia tafare o tasi takou tomatua keiiauiai tshana ania mane, kaia pe aia mokogi nifousia mukei tatane tomatua; wamuri nei aia keiiauiai tshana fare.

²⁸Tamari avau koutucua iacowa, Nori o iotshi maganisa o untariki iotshi o tagata, kamke, tafasao pouri iotshi ma acre kafasosa;

²⁹Kaia aia kafasosa ia ta Nokano Tapu sekamke nori o niana maganisa, kaia aia konofo itata tiafe sore atou ma tou.

³⁰Ianenei acre neitucua, Aia niamo agelo isa.

³¹¶ iai niromai tshana noso ma nana, ma nokotu efuafo, nikowna iateia, nokotapa aia.

³²Tagata nalupai su neinofo kofori aia, acre neitucua aia, kowcitia nau ma anoso efuafo nokosara akoi.

³³Aia nifasao acre neitucage, Akai mama ma akuso?

³⁴Aia neicitia kofori acre neinofo kofori aia, neitucage, kowcitia mama, ma akuso!

³⁵Ma tagatotshi kamna ta vere o Atua, aia tukuso, ma tukukave, ma mama.