Read Futuna-Aniwa MARKUS, 4 Bible Online

MARKUS, 4 - Futuna-Aniwa bible

MARKUS, 4

¹AIA neikamata foci keifakairo acre itata tatai; tagata nalupai su nifetacina iateia, pe aia nisopocea tavaka, neinofo iai ia tatai, ma tagatotshi iai itata tatai ia taftafa.

²Aia nifakairo acre ane nalupai ia fakatagasia, neitucage iacre ia tshana fakairo.

³Fakarogona; kowcitia, tatane nifano efuafo keipesia nohua.

⁴Ane nei nimai hepe aia neipesia nohua faru nimerigi nontafa teretu, ma amanu niromai nikeina iotshi.

⁵Faru nimerigi ia takere tafatu nalupai iai, wehe takere sisi iai, milowa aia nisomo, ma takere sisi iai;

⁶Kaia tara nikonace, aia neitshigeia aia; ma tshana noaka sisi aia nimero isa.

⁷Faru nimerigi ia takere asoni iai, asoni nisomo palo, niroroia aia, tshana nohua nijimra.

⁸Faru foci nimerigi ia takere erefia, niamo nohua, nisomo palo, niamo nohua, faru therte, faru sekste, ma faru wun huntret anohua.

⁹Aia neitucage iacre, aia nontariga thsana keifakarogona, erefia aia fakarogona.

¹⁰Nagiamana aiana neinofo iai, acre iai kofori aia ia tagata ta twelv nifakowia aia ta nokano o ta fakatagasia.

¹¹Aia neitucage iacre, keitufwa iacowa keiro nokano o tafasao, tsha tavaka o Atua; kaia iacre watafa, ane iotshi nei kofakairo ia fakatagasia.

¹²Pe nokowcitia acre kowcitia, ma secitiamana erefia, nokorogona acre fakarogona ma sekeiromana, pe nopoge jimra arotorea kuafe ma natshicina maganisa, ma acitiafakarafia Atua, ma aia towaki nori maganisa tshare.

¹³Aia neitucage iacre, Seiromana acowa nokano o fakatagasia nei? ma tiaha acowa keiro afakatagasia iotshi?

¹⁴¶ Tatane keipesia, keipesia tafasoa o Atua.

¹⁵Acre nimerigi ia nontafa teretu, wehe tafasao o Atua kopesia; kaia pe acre neirogona, Satana komai milowa, keiamke tafasao o Atua, tira neipesia i arotorea.

¹⁶Acre fosi neipesia ia takere afatua nalupai iai; akai, pe acre nifakarogona tafasao o Atua milowa acre amo ma kabisa iateia.

¹⁷Kaia nontafito jimra i arotorea, acre apurutshia aia nopoge toru ana; wamuri nei pe amace, mo feimacowa ma kotshi tagata ia tafasao o Atua komai, milowa acre kumtacu kanatshicina aia.

¹⁸Acre foci neipesia ia asoni, pe acre fakarogona tafasao o Atua,

¹⁹Kaia tavere ma aniamane o fanua wararoni, kofeiva o outo sore, ma kamintua ane isa nalupai nokororo i arotorea, iauiai tafasao o Atua ma aia sehua mana.

²⁰Acre foci neipesia ia takere erefia, acre fakarogona tafasao o Atua, keipurutshia aia i arotorea ma amo nohua iateia, faru therte, faru sekste, faru foci wun huntret.

²¹¶ Aia neitucage iacre, ko ta lampe amai keifuna iraro taganea mo iraro tapotu, mo jimra? ma jimra keinagi aia iluga taganea iateia?

²²Ma jimra ane tasi kofuna, kaia kavakea aia imoa foimata o tagata; ma jimra ane tasi nifuna ia aroto, kaia taha nopoge aia kamai watafa.

²³Pe tatane tasi tshana nontariga keifakarogona, erefia aia fakaragona.

²⁴Aia neitucage iacre, Fatshigeia taha acowa fakarogona; ma hepe magane tshowa iateia, aia kamna iacowa; ma iacowa fakarogona erefia katufwa faru foci.

²⁵Aia niamo mukei faru, iateia katufwa faru foci; ma aia sepurutshia faru mukei, ia aia kamke iotshi aia niamo.

²⁶¶ Aia neitucage, hepe nei ta tavaka o Atua, hepe pe tatane tasi keipesia nohua ia takere;

²⁷Aia komiro, ma masike tupo ma tiau, ta nohua konace ma kosomo aia puspusi tshana tomatua iateia.

²⁸Ma magane o takere keiamo ane konace nokosomo iai, mokagi ta norau, nagimana ta nose, wamuri nei ta nohua korn ia aroto.

²⁹Kaia taha nopoge ta nohua komatua, milowa aia toutshiace ia tomatshira, ma nohua komatua.

³⁰¶ Aia neitucage, Hepe taha acitia koutucua tavaka o Atua? mo hepe taha fakatagasia acitia fakairo aia hepe?

³¹Aia hepe tasi nohua o mustart, i nopogera eipesia aia ia takere, aia kosisi ana, jimra sece nohua ia takere hepe aia;

³²Kaia i taha nopoge eipesia aia, aia kanace kosomo iluga ane iotshi hepe aia, anora sore somo iai, ma amanu o tagarakou konofo iraro tshana murmaru.

³³Ia fakatagasia nalupai hepe nei aia nifakairo iacre tafasao o Atua, hepe acre tomatua keirogona aia.

³⁴Kaia ia fakatagasia ana aia nifakairo acre, ma pe acre ana neinofo, aia nifakairo nokano o ane iotshi ia niana tagata aia nifakairo.

³⁵¶ Ia tira nopoge, fiafi nimai, aia neitucage iacre, Acitia kororo ia nofokagi.

³⁶Iai acre nikownace tagatotshi nifetacina, acre niarafia aia hepe aia neinofo ia tuporuku, Faru foci tuporuku iai nikosua ia aia.

³⁷Tumtagi sore nimasike iai, apiau nisopokage ia ta tuporuku, ma aia nifonu milowa.

³⁸Aia nimoy iai ia nopito tavaka wamuri, nimero ia touruga; acre nifagona aia, neitucage iateia, Teriki akoi sumtacu mana acitia kokero?

³⁹Aia nimasike neisacira tumtagi, neitucage ia tatai, Komero komerino. Tumtagi milowa nijimra, ma nimerino sore iai.

⁴⁰Aia neitucage iacre, Tiaha acowa kumtacu sore? tiaha acowa sefakarogrogo avau?

⁴¹Acre nimtacu sore iai, acre neitucua iacre, Akai tatane nei, pe tumtagi ma tatai imna magane hepe aia koutucua?