Read Futuna-Aniwa MARKUS, 5 Bible Online

MARKUS, 5 - Futuna-Aniwa bible

MARKUS, 5

¹ACRE niromai ia nofokagi tatai, ia tafanua o Catara.

²Iai aia nisopocea tuporuku, milowa tatane tasi nifapa aia nimai kourucea upunaga tanumea tagata iai agelo isa konofo iateia.

³Aia neinofo ia upunaga tanumea tagata iai; jimra tatane tasi fousia aia mukei, jimra ia ous.

⁴Ia ane nei acre nifousia mukei aia nopoge ma nopoge ia avava etoga ma ous, ta ous aia neifasia, ma avava etoga aia neitumusia ia nopitopito sisi; jimra tasi keiro kotara aia mo fakairo aia erefia.

⁵Nopoge ma nopoge, tupo ma tiau, aia neinofo ia aora, i ta upunaga tanumea tagata iai, nokovaro, ma nokoseria tshana notshino ia afatu.

⁶Kaia iai aia neicitia Iesu papai, aia nitere ma nimori iateia.

⁷Aia nitapa ia norio palo ueitucage, Taha avau keimna iatakoi, Iesu, Nontariki o ta Atua sore? Avau fakowia mukei akoi i neigo o Atua, pe akoi sesaciria mana avau.

⁸Ma aia neitucage iateia, komai watafa tatane, akoi agelo isa.

⁹Aia nifakowia aia, Taha tshou neigo? Aia nifasao, nokoutucua, Tshaku neigo ko Lijon, ma acime nalupai.

¹⁰Aia nifakowia, mukei aia, pe aia jimra segiake acre watafa fanua iai.

¹¹Itata aora iai, apakasi nalupai su neinofo nokokeina akai iai.

¹²Agelo isa iotshi nifakowia sore aia, nokoutucua, kowna acime kokava ia acre.

¹³Milowa Iesu neitucage iacre roro. Ta Agelo isa iotshi niroro watafa aia, nikokava ia apakasi; ma iotshi apakasi iai milowa niteifo taora nontafa egosa ia tatai acre hepe tu thousant, acre nikero nimate ia tatai.

¹⁴Acre nifakeina apakasi nifura neitucua ane nei ia tumrai sore, nifori fanua iai ma. Acre niroro watafa keicitia taha ane nei aia neimna.

¹⁵Acre niromai iai ia Iesu, neicitia aia agelo isa mokagi neinofo iateia, ta lijon neinofo ia aia, nokonofo nitaka ia tumiga, keiro ane iotshi erefia, ma acre nimtacu iai.

¹⁶Acre neicitia ane tira neitucua iacre ane iotshi aia neimna ia aia agelo isa neinofo iateia, ane iotshi tsha apakasi ma.

¹⁷Acre neikamata keifakowia aia, keifeke tshare fanua wateriari.

¹⁸Ma wamuri aia nimai ia tuporuku, aia agelo isa mokagi neinofo iateia nifakowia aia sore, pe aia asua iateia.

¹⁹Kaia Iesu neitucuasana mukei aia, kaia neitucage iateia, Fano ia tshou afare ia tshou tagata, koutucua acre ane sore iotshi ta Teriki neimna iatakoi, ma neicitia fakarafia akoi.

²⁰Aia nifano neikamata keitucage iacre, ia Tikapolis ane sore iotshi Iesu neimna iateia; ma tagatotshi nimasaro iateia.

²¹¶ Iai Iesu nifarau foci ia tavaka ia nofokagi tatai, tagata nalupai su nifetacina iateia, aia iai itata tatai.

²²Kowcitia tasi o ta fatoriki o tafare mori nimai iai, tshana neigo Jerus; aia neicitia aia, aia nito itata tshan avai

²³Neinogia fakasore aia, nokoutucua, Tshaku nofine sisi komoy itata komate, avau acitiafakarafia sore, akoi komai fecitshia norima iluga aia, pe akoi penpena aia; ma aia kamouri.

²⁴Iesu nifano ia aia, tagata nalupai su niroro wamuri aia, neipecitshia aia.

²⁵Tasi fine nimaci iai, tshana toto nimerigi tou twelv.

²⁶Nimy tshana nalupai o tagata nalupai keiamke amaci, nifakamata acre iateia ane iotshi tshana, aia semouri mana, kaia tshana maci sore iateia.

²⁷Iai aia nifakarogona o Iesu, aia nimai ia aroto o tagata nifetacina iateia wamuri aia, nitofia tshana miga.

²⁸Ma aia neitucage, Pe avau tofia ana tshana miga, Avau kamouri.

²⁹Milowa ta nimerigi o tshana toto nijimra, aia nikeiro ia tshana notshino tamaci isa tshana natshicina aia.

³⁰Iesu milowa nokeiro ia niana roto, pe tomatua tshana nifano iateia, aia nikotafaru ia tagata nifetacina iateia nipecitshia aia, neitucage, Akai nitofia tshaku miga?

³¹Niana tagata aia nifakairo neitucua iateia, Akoi kowcitia tagata nalupai su kopecitshia akoi, ma tiaha akoi fakowia, Akai nitofia avau?

³²Aia neicitia kofori keicitia aia neimna ane nei.

³³Kaia ta fine nokumtacu, ma nokoviriviri, nokeiro ane neimna ia tshana roto, nimai nito mokagi aia, neitucage aia tamari iotshi fasao iateia.

³⁴Aia neitucage iateia, Nofine, tshou fakarogrogo avau neipenpena akoi; fano erefia ma tshou maci isa nagke akoi.

³⁵¶ Iai hepe aia neitucua afasao tira, faru tagata niromai tsha teriki o tafare mori, neitucua, Tshou nofine komate; tiaha akoi arafia Teriki wamuri nei?

³⁶Hepe Iesu nifakarogona tafasao acre neitucua, aia neitueage ia teriki o tafare mori, Natshicina kumtacu, fakarogrogo avau ana?

³⁷Aia neitucuasana tagatotshi keiroro wamuri aia, kaia Pitrus, ma Jakobus, ma Joanes ta noso o Jakobus ana.

³⁸Aia nimai ia tafare o teriki o tafare mori, neicitia magane o acre nifetacina iai, nikomakuru nitagi niarafeina sore.

³⁹Aia nimai efare, aia neitucage iacre, Tiaha magane nei tshowa, ma nokotagi? ta tamafene jimra komate, kaia komiro ana.

⁴⁰Acre nikowkata feimacowa aia iateia, kaia wamuri aia neisegiake acre efuafo, aia niarafia efare ta mana o ta tamafine, ma acre wamuri aia, nifano ia nopito efare ta tamafine nimoy iai.

⁴¹Aia nipurutshia ta norima o ta tamafine, neitucage iateia, Talitha kumai; nokano o tafasao nei, Ta tamafine avau koutucua iatakoi masike.

⁴²Milowa ta tamafine nimasike, nifano; ma aia neinofo wararoni toufi twelv. Acre nimasaro ia nimasaro sore.

⁴³Aia neitucuasana mukei acre, sekoutucua tagata tasi ane nei, ma neitucage acre keitufwa aia faru takai aia keina.