Read Futuna-Aniwa MARKUS, 6 Bible Online

MARKUS, 6 - Futuna-Aniwa bible

MARKUS, 6

¹AIA nifeke watafa iai, nimai ia fanua tshana; ma niana tagata aia nifakairo niroro wamuri aia.

²Inaia nopoge tapu nimai, aia neikamata keifakairo ia tafare mori; nalupai nokofakarogona aia nimasaro, nokoutucua, Wehe tatane nei amo ane iotshi nei? taha arapakou nei kotufwa iateia, pe aia neimna, ane sore nalupai ia tshana norima?

³Aia tatane warusia tererakou, ta nontariki o Mere, ta noso o Jakobus, ma Joses, ma o Juta, ma Saimona; ma tshana anokave konofo icunei iacime? Acre nifakainina iateia.

⁴Kaia Iesu neitucage iacre, Ta profeta tagata kabisa iateia, kaia jimra ia fanua tshana, ma ia tagata tshana, ma ia tafare tshana.

⁵Aia nikeiseriva neimna vere sore iai, kaia aia nifecitshia tshana norima iluga faru tagata nimaci, neimna acre iotshi tomatua.

⁶Aia nimasaro ia tshare sefakarogrogo aia. Aia nifano kofori umrai sisi tshare, nokofakairo acre.

⁷¶ Aia nitapa iateia ta twelv, neikamata keikowna watafa acre erua ma erua; neitufwa acre tomatua keisegiake agelo isa.

⁸Aia neitucuasana acre amo ane ia tshare roro, kaia tokotoko ana, jimra takato, jimra aofa, jimra mune ia takato iateia.

⁹Kaia fousia novai ia asantal, ma jimra kataka ia kot erua.

¹⁰Aia neitucage iacre, Ia umrai iotshi acowa roro ia tafare tasi, konofo iai ia taha nopoge acowa kafeke natshicina tumrai iai.

¹¹Tagata akai kanatshicina acowa, ma sefakarogona acowa, ia taha nopoge acowa rorocea kafeke tumrai tira, tuctuciake tefu o takere o avai tshowa keifakairo acre. Tamari avau koutucua iacowa, Nori o maganisa o tafanua o Sotom ma Comora sisi ia ta nopoge wamuri, nori o tumrai tira fakasore.

¹²Acre niroro watafa nikova tagata keinatshicina ma feimacowa maganisa.

¹³Acre neisegiake agelo isa nalupai, feinokunaria ia avainiu tagata nalupai nimaci, neipenpena erefia acre.

¹⁴Teriki Herot nifakarogona o aia, ma afasao sore niroro papai iateia, aia neitucage, Joanes ta Baptiso nimasike ia takere tanumea tagata iai, ia ane nei aia neimna vere sore ma mukei nalupai.

¹⁵Faru foci neitucua, aia Elija, Faru foci neitucua, Aia ta profeta, mo hepe tasi o profeta ituai.

¹⁶Kaia Herot nifakarogona, aia neitucage, Aia Joanes, aia avau nitoutshiace tshana nouru; aia komasike ia takere o tagata nimate.

¹⁷Ma Herot aiana nikowna efuafo neipurutshia Joanes, nifousia aia ia tafare mukei, ia Herotaias inahune o tshana noso Filipos, ma aia niarafia aia inahune tshana.

¹⁸Ma Joanes neitucage ia Herot, Itapu akoi keiarafia inahune o tshou noso.

¹⁹Ane tira neimna Herotaias feimacowa aia iateia, ma aia neicitiafakarafia kotshi aia komate, kaia aia nitaru iateia;

²⁰Ma Herot nimtacu Joanes, nikeiro aia tatane neimna ane iotshi totonu ma erefia, ma nipare aia; pe aia nifakarogona aia, aia neimna ane nalupai iateia, nibisa nifakarogona aia.

²¹Nopogera erefia iateia nimai, i nopogera nana nifarere Herot, aia neimna tacripoga ia ta fiafi tshana fatoriki, fatoriki o niana tagata tsha tatowa ma, fatoriki o nuntafa afanua o Calili ma.

²²Iai nofine o tira Herotaias nimai efare iai, ma nimako neimna Herot ma acre neinofo iateia nibisa iateia, ta teriki neitucage ia ta tamafine, Nogia avau taha ane akoi acitiafafakarafia, ma avau katufwa akoi anera.

²³Aia neitucage tafasao tapu ma mukei iateia, Ane taha akoi nogia avau, avau katufwa akoi ia nuntafa o tavaka tshaku.

²⁴Aia nifano efuafo neitucage ia tshana nana, Taha avau kanogia? Aia neitucage, Ta nouru o Joanes ta Baptiso.

²⁵Aia nimai milowa totonu ia teriki, neinogia, nokoutucua, Avau acitiafakarafia nagimana akoi keitufwa avau ia taganea ta nouru o Joanes ta Baptiso.

²⁶Ta teriki nimy sore niana roto iateia; kaia ma tshanafasao tapu ma mukei iateia, ma aia kumtacu acre neinofo iateia, aia seneitucuasana aia.

²⁷Milowa ta teriki nikowna tasi tatane nitaia tagata, neitucage aia keiarafia tshana nouru; aia nifano nitoutshiace tshana nouru ia tafare mukei,

²⁸Nimai tshana nouru ia taganea, neitufwa ta tamafine; ma ta tamafine neitufwa tshana nana.

²⁹Nopogera niana tagata aia nifakairo nifakarogona nei, acre niromai niamke tshana noaga neinagi aia ia tupunaga tsha nimate.

³⁰¶ Tagata apostilo nifetacina ia Iesu, neitucua aia ane iotshi acre neimna, ma taha acre nifakairo tagata.

³¹Tagata neitucage iacre, Koromai acowa ana ia none tugogau, kogapu iai fakasisi; ma nalupai tagata nokomai nokororo iai, pe acre segapu keina aofa.

³²Acre niroro sokoceriana nisua ia tuporuku ia none gogau.

³³Tagata neicitia acre nisua, ma nalupai nikeiro aia, ma nifura iluga ia avai iai nifeke umrai sore iotshi, acre nifura iai mokagi acre nisua iai, ma nifetacina iateia.

³⁴Iesu, aia nifeke ta tuporuku, neicitia tagata nalupai iai, tshana roto karofa iacre, ma ane nei acre hepe sip jimra tatane arafia acre; aia neikamata keifakairo acre ane nalupai.

³⁵Nopogera nifano itata fiafi, niana tagata aia nifakairo nimai iateia, neitucua, Nopito fanua nei tugogau ma milowa nopoge nifano itata fiafi;

³⁶Kownace acre, pe acre, kororo ia fanua kofori, ia umrai keifakamata niare akai; ma tshare akai nijimra.

³⁷Aia nifasao neitucage iacre, Acowa eitufwa acre takai keina. Acre neitucua iateia, Acime karoro fakamata aofa therte tolor mune keitufwa iacre keina, mo jimra?

³⁸Aia neitucage iacre, Efia aofa niawa? roro kocitia. Wamuri acre nikeiro, acre neitucage, Erima, ma eika erua.

³⁹Aia neitucage iacre keitucua tagatotshi konofo ia fakatupuria nofoaga ia tagaferi wiwi.

⁴⁰Acre neinofo ia fakatafa noatu fakatupuria, i ahuntret ma afefte.

⁴¹Iai aia niamo aofa erima, ma ta eika erua, aia nifakatariaga ia taragi, nimori ma nitaututshi aofa niavagimare niana tagata aia nifakairo keinagi mokagi acre; eika erua ma aia neifafasia taraw iai ia acre iotshi.

⁴²Acre iotshi iai nikeina, ma nimakona.

⁴³Acre nifau akato sore twelv nifonu o nopitopito o ta aofa, ma o eika.

⁴⁴Acre nikeina o aofa iai hepe faiv thousant fakou.

⁴⁵Milowa aia neitucage mukei niana tagata aia nifakairo keisopokace tuporuku, keisua ia nofokagi tatai mokagi ia Bethseta, aia neinofo keikownace tagatotshi iai.

⁴⁶Wamuri aia nikownace acre, aia nifano ia taora keimori iai.

⁴⁷Tefiafi nimai iai, ta tuporuku neinofo i aroto tatai, aiana neinofo ia fanua.

⁴⁸Aia neicitia acre kotaru ia ta sua; ma tumtagi isa kosau imoa acre; tafetiata tapopo aia nifano iacre; kotakaro nokofano ia tshana vai iluga tatai, hepe aia nifano mokagi natshicina acre.

⁴⁹Kaia iai acre necitia aia nokofano iluga, acre nimintua aia tasi tetua, acre nitagi fakapalo;

⁵⁰Ma acre iotshi neicitia aia, ma nimtacu. Milowa aia nifasao ia acre, neitucage iacre, Kabisa i arotowa; aia avau; natshicina kumtacu.

⁵¹Aia nisopokace tuporuku iacre; milowa tumtagi nijimra; acre nimtacu sore su i arotorea, ma nimasaro.

⁵²Ma acre sekamintua tshana vere sore o aofa, ma arotorea mukei.

⁵³Wamuri acre nisuace iai, acre niromai ia tafanua o Cenesaret, itata ta feiava.

⁵⁴Wamuri acre nifeke tavaka, milowa acre nikeiro aia.

⁵⁵Nifura kofori fanua iotshi tira, neikamata keiarafia ia apotu tagatotshi nimaci iai, wehe acre nifaka rogona aia neinofo.

⁵⁶Pe aia nifano ia umrai sisi, mo ia umrai sore, mo ia agarakou, acre neinagi, tagata amace ia aretu; neinogia aia sore pe acre nitofia ana nuntafa tshana miga; ma acre iotshi nitofia aia neipenpena erefia.