Read Futuna-Aniwa MARKUS, 8 Bible Online

MARKUS, 8 - Futuna-Aniwa bible

MARKUS, 8

¹ANOPOGERA tagata nalupai su nifetacina iateia, niare akai jimra, Iesu nitapa niana tagata aia nifakairo iateia, neitucage iacre.

²Avau karafeina tagata nifetacina, ia ane nei acre milou neinofo iatavau nopoge toru, ma niare akai icunei kojimra.

³Pe avau kownace acre kotshitoge ia tshare fare, acre kamatese ia teretu; ma nalupai o acre nimai fanua papai.

⁴Niana tagata aia nifakairo nifasao aia, Wehe tatane kamo nalupai aofa keimna fakou iai makona icunei ia tugogau?

⁵Aia nifakowia acre, Efia aofa niawa? Acre neitucua fitu.

⁶Aia nifasao tagata iai keinofo ia takere; aia niamo ta efitu aofa nimori iateia nitoututshia, niavagi niana tagata aia nifakairo keinagi nitarau mokagi acreiotshi tagata iai; ma acre neinagi mokagi tagatotshi iai.

⁷Acre niamo toru eika sisi; aia nimori iateia, nifasao keinagi nitarau acre foci mokagi tagatotshi iai.

⁸Acre nikokai iai, nimakona; acre fakatapuria nopitopito o akai tagatotshi nitaru nikeina ma neinagi, efitu akato sore nifau nifonu.

⁹Acre nikokai iai hepe four thousant; ma aia nikownace acre.

¹⁰¶ Milowa aia nifitshi ta tuporuku ia niana tagata aia nifakairo niromai ia afanua o Talmanutha.

¹¹Fakou Afarasi niromai efuafo, neikamata keifakowia aia, nokofakowia aia keimna ane sore o taragi, takaroiai aia iateia.

¹²Aia nimopsake sore ia niana roto, neitucage, Tiaha tagata konofo icunei milownei fakowia keicitia ane sore o taragi? Tamari Avau koutucua iacowa, Jimra kavagi ane sore ia tagata konofo icunei milownei.

¹³Aia natshicina acre, nifitshi foci ia tuporuku nisua nofokagi tatai.

¹⁴¶ Niana tagata aia nifakairo nigaro keiamo aofa, ma jimra aofa erua tishanana tshare neinofo ia tavaka.

¹⁵Aia neitucuasana acre, nokoutucua, Fatshigeia magane tshowa, ma natshicina ta leven o tagata Afarasi, ta leven o tagata tsha Herot ma.

¹⁶Acre nokofasao macre, nokoutncua, Aia nifasao tira ia ane nei tshote aofa jimra.

¹⁷Iai Iesu nikeiro nei, aia neitucage iacre, Tiaha acowa kofasao nei, ia aofa tshowa jimra? acowa secitia mana mo, ma sekeiro mana? tshowa roto konofo mukei, mo jimra?

¹⁸Foimacowa nokonofo iacowa, ma acowa secitia mana? nontariga ma nokonofo iacowa, ma serogono mana acowa, mo? tiaha acowa jimra kamintua erefia?

¹⁹Nopogera avau nitautoutshia ta erima aofa tarawiai ia tagata faiv thousant, efia akato sore acowa nifau nifonu niavake o nopitopito acre nitaru nikeina? Acre neitucua iateia, Twelv.

²⁰Foci nopogera ta fitu tarawiai ia tagata four thousant, efia akato sore acowa nifau nifonu niavake o nopitopito acre nitaru nikeina? Acre neitucua, Efitu.

²¹Aia neitucage iacre, Tiaha ane nei, pe acowa sekeiro mana?

²²¶ Aia nimai ia Bethseta; acre niarafia tatane tasi iateia iai tshana foimata pouri, nifakowia aia keitofia aia.

²³Aia nipurutshia norima o tatane tshana foimata pouri, niarafia aia watafa tumrai sore; wamuri aia neisavari ia foimata tshana ma nifecetshia tshana norima iluga aia, aia nifakowia aia pe aia necitia ane.

²⁴Aia nifakatariaga, neitucage, Avau kowcitia tagata hepe tererakou nokororo.

²⁵Wamuri nei aia nitofia foci tsho norima iluga tshana foimata neimna aia fakatariaga; ma tshana foimata neipenpena erefia, neicitia tagatotshi erefia.

²⁶Aia nikowna aia ia tshana fare, nokoutucua, Natshicina fano ia tumrai sore, mo natshicina eitucua ane nei ia tasi tagata o ta tumrai.

²⁷Iesu nifano efuafo iai ma niana tagata aia nifakairo, ia umrai Sisaria Filipai; i teretu aia nifakowia niana tagata aia nifakairo, nokoutucua iacre, Tagata koutucua avau akai?

²⁸Acre nifasao, Joanes ta Baptiso; kaia faru koutucua Elaija, faru foci, Tasi o aprofeta.

²⁹Aia neitucage iacre, Kaia acoua koutucua avau akai? Pitrus nifasao neitucage iateia, Akoi ta Kristo.

³⁰Aia neitucuasana acre natshicina koutucua tagata o aia.

³¹¶ Aia neikamata keifakairo acre, pe ta Nontariki o tagata noroto kamy i ane nalupai, fakou sore ma katowaki aia, ma fakou fatoriki o tafare mori, ma fakou fakairo, ma katshi aia komate, ma wamuri nopoge toru aia kamouri kamasike foci.

³²Aia neitucua tafasao tira mokagi acre. Pitrus niarafia aia neikamata keiseciria aia.

³³Kaia iai aia nikotafuri neisara ia niana tagata aia nifakairo, aia neiseciria Pitrus, nokoutucua, Fano wamuri avau, Satana; ma akoi secitiafakarafia ane iotshi o Atua, kaia ane iotshi o tagata.

³⁴¶ Iai nopogera aia nitapa tagatotshi iateia ia niana tagata aia nifakairo ma, aia neitucage iacre, Pe tagata tasi komai wamuri avau, erefia aia natshicina niana ane neicitiafakarafia, wamo tshana fakaravasia ma komai muri avau.

³⁵Ma aia acitiafakarafia kapurutshia niana aniamouri kamerigi aia; kaia pe tasi niana aniamouri kamerigi iatavau ma tshaku fasao erefia, aia kapurutshia anea mouri ia taragi.

³⁶Ma taha kanofo ia tatane, pe aia kapurutshia iafanua iotshi ma takaroiai tshana nokano iateia?

³⁷Mo taha tatane kaiioria nomata o tshana nokano?

³⁸Pe tasi tagata kumtacu ma kanatshicina avau ma tshaku fasao mokagi tagata tira kotshigo fafine ma maganisa; ta Nontariki o tagata kanatshicina aia ma, ia taha nopoge aia kamai ia tomatua o tshana Tamana ia agelo erefisa.