Read Futuna-Aniwa MARKUS, 9 Bible Online

MARKUS, 9 - Futuna-Aniwa bible

MARKUS, 9

¹AIA neitucage Iacre, Tamari avau koutucua iacowa, Faru o acowa tagata kotu icunei milou kajimra komate mokagi acre kacitia tavaka o Atua komai ia tomatua.

²¶ Nisiri nopoge ono, Iesu niarafia iateia Pitrus, ma Jakabus, ma Joanes, niarafia acratou ana nifitshi ia taora iluga, ma aia nifuri mokagi acratou.

³Tshana mega nikataka iai kego ana hepe ta sno; jimra tagata tasi ia fanua wararoni keiro popocia tumiga kego ana hepera.

⁴Iai acratou neicitia Elaija ma Moses, ma iai acraua nikofasao ia Iesu.

⁵Pitrus nifasao neitucage ia Iesu, Teriki aia ko erefia acimatou keinofo icunei; pe erefia acimatou koto tafare toru, tasi tshou, tasi tsha Moses, ma tasi tsha Elaija.

⁶Ma aia puspusi taha aia keitucua, ma acratou nimtacu sore.

⁷Apa tasi iai niapotshia acre, ta norio nimai ia ta apa, nokoutucua, Tenei Tucutarik avau acitiafakarafia aia; rogona thsan afasao.

⁸Milowa, iai acratou neicitia kofori, acratou secitiamana tatane tasi foci, Iesu ana ma acratou.

⁹Ia acre nifanifo ia taora, aia neitucuasana acratou keitucua tagata tasi ane iotshi acratou neicitia, ia taha nopoge komaice Nontariki o tagata kamasike ia nimate.

¹⁰Acratou nipurutshia tafasao tira ia arotoratou, nokofakowia tasi ma tasi foci o acratou taha nokano o tafasao tira ta nokomasike ia ta nimate.

¹¹¶ Acratou nifakowia aia nokoutucua, Tiaha tagata fakairo koutucua pe Elaija kamai mokagi?

¹²Aia nifasao nifakairo acratou, Elaija tamari kamai mokagi keipenpena ane iotshi, ma tiaha neiseriace ane nei o Nontariki o tagata, pe aia komy i ane nalupai, acre keinatshicina ma towaki aia.

¹³Kaia avau koutucua iacoutou, Elaija nikomaice, ma acre nimaganisa iateia hepe acre neicitiafakarafia, ma hepe neiseriace o aia.

¹⁴¶ Iai aia nimai ia niana tagata aia nifakairo, aia neicitia tagata nalupai su nifitacina nifori acre, tagata fakairo nokofakowia acre ma.

¹⁵Milowa tagatotshi iai, neicitia aia acre nimasaro sore su, nifura iateia niarafeina aia.

¹⁶Aia nifakowia tagata nifakairo, Taha acowa nifakowia acre iateia?

¹⁷Tasi o acre nifetacina iai nifasao neitucage, Teriki avau nakarafia iatakoi tucu tariki, agelo isa tano niamo aia.

¹⁸Ia none wehe aia niamo aia, aia eifasia aia; aia savari sore, mugiugio anifo tshana, keimna aia taru sore; avau nifakowia tshou tagata akoi fakairo keisegiake aia; kaia acre nitaru iateia.

¹⁹Aia nifasao aia, neitucage, Eheu tagatotshi konofo milownei sefakarogrogo avau, efia nopoge avau konofo iacowa? efiia nopoge kuroto komy ia magane tshowa? Arafia aia iatavau.

²⁰¶ Acre niarafia aia iateia, iai aia neicitia aia, milowa ta nokano isa eifasia aia, ma aia nito ia takere, nitotakavini nisavari sore.

²¹Aia nifakowia tshana tamana, Efia tau ane nei nimai iateia? Aia neitucage, I nopogera aia tamasisi.

²²Nopoge nalupai aia nitowaki aia ia tiafii, ma ia tavai, keitakaroiai aia; kaia pe akoi tomatua emna ane nei, karafeina acime, ma kasitu acime.

²³Iesu neitucage aia, Pe akoi tomatua fakarogrogo avau, ane iotshi kamno erefia ia aia fakarogrogo.

²⁴Milowa ta mana o ta tamasisi nitagi palo, neitucage ia noreimata nitafe, Teriki Sore, avon fakarogrogo, asitu towaki tshaku sefakarogrogo.

²⁵Iai Iesu neicitia tagata nifura nifetacina iateia, aia neiseciria ta agelo isa, nokofasao iateia, Akoi tano ma totariga tuturi agelo, Avau koutucua iatakoi, komai watafa aia, ma sefano foci ia aia.

²⁶Ta agelo nitagi, neifasia sore aia, nimai watafa aia; ma aia hepe tasi nimate; iai nalupai neitucua, Aia komate.

²⁷Kaia Iesu nipurutshia tshana norima nitshicitshiakace aia; ma aia nimasike iai.

²⁸Nopogera aia nimai efare niana tagata aia nifakairo nifakowia aia gusgusu. Tiaha acime nitaru segiake aia?

²⁹Aia neitucage iacre, Acre hepe aia semai watafa, kaia ia komori ma kopari takai.

³⁰¶ Acre nifeke iai niroro ia aroto o ta fanua Calili; aia acitiafakarafia tagatotshi puspusi aia iai.

³¹Ma aia nifakairo niana tagata aia nifakairo, neitucage iacre Ta Nontariki o tagata kovage ia arima o togata, acre katshi aia komate, wamuri aia komate, aia kamasike ia nopogi toru.

³²Kaia acre sekeiromana tafasao tira, ma acre nimtacu keifakowia aia iatea.

³³¶ Aia nimai ia Kaperneum; nokonofo iai ia tafare, aia nifakowia acre, Taha acowa nifiatu afasao tshowa ia teretu?

³⁴Kaia acre sefasao; ma ia teretu acre nifiatu i afasao tshare, taha nopoge akai o acre kasore.

³⁵Aia neinofo iai iraro, neitapa ta twelv, neitucage iacre, Pe tatane tasi acitiafakarafia aia mokagi iotshi, aia taha nopoge wamuri acre iotshi, ma fitshicou o acre iotshi.

³⁶Aia niamo tasi tamasisi, neinage aia ia aroto o acre; aia neitakoia aia ia tshana norima, aia neitucage iacre,

³⁷Akai kaiamo tasi tamasisi hepe nei ia tshaku neigo, kaiamo avau; akai ma kaiamo avau, jimra kaiamo avau ana, kaia aia ma nikowna avau.

³⁸¶ Joanes nifasao iateia, nokoutucua, Teriki acime neicitia tasi nokosegeake agelo isa i tshou neigo, ma aia semai wamuri acime; acime neitucuasana aia; ma ane nei aia semai mana wamuri acime.

³⁹Kaia Iesu neitucage, Natshicina neitucuasana aia; ma jimra tatane tasi kamna ane sore ia tshaku neigo, ma kafasosa iatavau.

⁴⁰Ma aia sefeimacowa acitia, aia tagata tshote.

⁴¹Ma tagata akai katufwa acowa taganea kup o tavai keinumia ia tshaku neigo, ianei acowa tagata tsha Kristo, tamari avau koutucua iacowa, ioria tshana sekamerigi.

⁴²Ma akai emna tshipatshipa aroto o tasi erecriki tira fakarogrogo avau, erefia iateia pe mokagi nifousia nifori nupenawa tshana tafatu sore soro apenpena erefia flau, ma keitowaki aia ia tatai.

⁴³Pe tshou norima takaroiai akoi, toutshiace aia, erefia akoi keifano ia taragi ia norima tishana, isa nokopurutshia norima erua keifano ia tumrai isa tsha tiapolo, ia tiafi setamte mana tau ma tau.

⁴⁴Iai tshare tanufe semate mana, ma iai ta tiafi setamte mana.

⁴⁵Pe tshou novai takaroiai akoi, toutshiace aia, erefia akoi keifano ia taragi ia novai tasi, isa nokopurutshia, novai erua keitowaki akoi iateia ia tumrai isa, ia tiafi sore setamte mana tau ma tau.

⁴⁶Iai tshare tanufe semate mana, ma iai ta tiafi setamte mana.

⁴⁷Pe tshou foimata takaroiai akoi, keriake aia, erefia akoi keifano ia tavaka o Atua ia foimata tishana, isa keipurutshia foimata erua keitowaki akoi iateia ia tiafi sore;

⁴⁸Iai tshare tanufe semate mana, ma iai ta tiafi setamte mana.

⁴⁹Ma tagatotshi tasi ma sece kamosia ia tiafi hepe tera, ane iotshi tapu takavari ma keitufwa Atua kamosia ia tera.

⁵⁰Tera erefia; kaia pe tera nimerigi tshana tomatua, ia taha acowa kamna aia tomatua foci? Nakamo tera ia arotowa, ma nakamo arotowa mugaro ia acowa iotshi.