Read Futuna-Aniwa LUKUS, 1 Bible Online

LUKUS, 1 - Futuna-Aniwa bible

LUKUS, 1

¹HEPE nalupai nokoutucua acre nakaserea totonu ane iotshi tamari nafakarogrogo ia acitia.

²Hepe acre neitufwa iacre iacime, acre ia ta nontafito necitia ia foimatorea, ma fakou nikova tafasao tapu.

³Avou nimentua erefia iatavou foci, nakeiro erefisa ma totonu ia tshaku roto ane iotshi ra ia neikamata, keiserea iatakoi totonu, erefisa kagi Thiofilus;

⁴Pe akoi keiro tamari o ane iotshi ra nifakairo akoi iateia.

⁵¶ Nimouri i anopogera o Herot, ta teriki o Juteia, tasi tane tapu tshana neigo Sakaraias o ta heigo o Abia, ma tshana nanahune aia tasi o anofine o Eron, ma tshana neigo nitapa Ilisabith.

⁶Ma acrawa nimagane totonu emoa Atua, nokororo seiauiai tasi o iotshi afasao tapu ma fakairo o ta mori o Ihova.

⁷Nontamarawa jimra, ianenei Ilisabith nikopa, ma acrawa tagata ituai.

⁸Ane nei nimai i anopogera aia neimna ta vere o ta tane tapu mokagi Atua, ia ta vere o tshana taheigo.

⁹Hepe amagane o tshana tapu avere, aia nifano ia tafare mori sore keitugia ane neinamu erefisa mokagi Atua.

¹⁰Ma iotshi tagata nifetacina watafa nikomori ia ta our o tugia ane neinamu.

¹¹Ma aia neicitia tasi agelo o Ihova nokotu ia ta taftafa matou o tafata o anea neinamu.

¹²Sakaraias nimasaro inaia aia neicitia aia, ma nemtacu nito ia aia.

¹³Kaia ta agelo neitucua iateia, sumtacu akoi Sakaraias, ma tshou mori korogona, ma tshou inahune Ilisabith kafarere tasi nontariki iatakoi, ma akoi katapa tshana neigo Joanis.

¹⁴Ma akoi nakamo kabisa ma aroto mama, ma nalupai kabisa ia tshana farere.

¹⁵Ma aia kasore emoa foimata o Ihova, ma aia sekanumea weina mo tavai kona, ma aia kafonu ia nokano Tapu ia nopoge ma wamuri nopoge nana nifarere aia.

¹⁶Ma nalupai tagata o Isreil aia katafuri ia Ihova niare Atua.

¹⁷Ma aia kofano mokagi tshana foimata ia nokano ma tomatua o Ilaija keitafuri aroto o amanorea ia ta erecriki, ma acre serogona afasao erefia ia ta arapakou o acre amagane totonu; keipenpena tagata ia ta Teriki.

¹⁸Ma Sakaraias neitucua ia ta agelo, konapecua avou keiro tenei? Ma avou tatane ituai, ma tshaku nahune fafine ituai.

¹⁹Ma ta agelo nokofasao neitucua iaieia, avou Cebrial, avou kotu emoa foimata o Atua, ma aia nikouna avou keifasao iata koi, ma keimai iatakoi ia afasao erefia ra.

²⁰Ma akoi tano ma setomatua fasao foci ia ta nopoge ane iotshi ra koimace, ianenei akoi sefakarogrogo tshaku afasao, acre kamai ia niare nopoge iateia.

²¹Tagatotshi nitari Sakaraias, ma acre nimasaro sore i aia nitari palo ia ta fare mori sore.

²²Ma inaia aia nimai watafa, aia setomatua keifasao iacre, ma acre nimentua aia neicitia ane sore ia tafare mori sore; ma aia neitutuseana iacre ia ta norima, ma nofo taru fasao, tano.

²³Ma ane nei nimai, wamuri anopoge o tshana vere kurava aia feke nifano ia tshana fare.

²⁴Ma wamuri anopogera Ilisabith tshana nanahune nifoinai, ma aia nimune aia erima umrama, nokoutucua,

²⁵Tenei Ihova neimna iatavou ia nopoge aia neicitia avou, keiamke tshaku koma ia fakou.

²⁶Ma ia umrama ono ta agelo Cabrial nokouna ia Atua ia tasi tumrai o Calili nitapa neigo Nasareth,

²⁷Ia tasi fene sisi fou nivage ia tasi tane tshana neigo Josef, o ta fare ma pecpece o Tevet, ma ta neigo o ta fene sisi nitapa Mery.

²⁸Ma ta agelo nimai efare iateia, ma neitucua, Alofa, iatakoi sore karofa, ta Ihova konofo ia akoi; erefisa akoi ia afine.

²⁹Inaia aia neicitia aia, aia nimy ia tshana fenagaro ia tshanafasao, ma nimasaro ia tshana fenagaro taha nokano o afasaora.

³⁰Ma ta agelo neitucua iateia, sumtacumana Mary. Ma Atua karofa akoi.

³¹Ma koucitia akoi kamo foinai tshou, ma kafarere tasi nontariki, ma katapa tshana neigo Iesu.

³²Aia kasore ma katapa aia ta nontariki o ta sore su; ma ta Ihova Atua katufwa ia aia ta fata (thron) o tshana tamana Tevit;

³³Ma aia kanofo Teriki sore o ta fare o Jekob atou ma tou, ma o tshana tavaka sekurava.

³⁴Ma Mary neitucua ia agelo, konapecua ane nei kamai nokoucitia avou sekeiro tasi tane?

³⁵Ma ta agelo nifasao ma neitucua iateia, Ta Nokano Tapu kamai iluga akoi, ma tomatu o aia sore su kanoato akoi; ianenei aia kafarere o akoi katapa itapu, ta Nontariki o Atua.

³⁶Ma koucitia Ilisabith tshou nokave aia foci nakofoinai ia tasi nontariki ma aia tasi fine ituai, ma tenei ko ta tumrama ono ia aia neiepa.

³⁷Ma ia Atua jimra tasi fasao konofo ma semaimana.

³⁸Mary neitucua, koucitia avou ta fine fetshicou o Ihova; erefia ane iotshi kamai iatavou hepe tshou afasao, ma ta agelo nifeke aia.

³⁹Ma Mery nimasike i anopogera, ma nifano ia ta aora fanua, meloua, ia tasi tumrai o Juta;

⁴⁰Ma nifano ia ta fare o Sakarias, ma nialofa Ilisabith.

⁴¹Ane mei nimai, inaia Ilisabith neirogona ta alofa o Mery, ta tentama nisopo ia tshana nonai, ma Ilisabith nifonu iai o ta Nokano Tapu;

⁴²Ma aia nifasao ia noreo palo neitucua, Erefisa akoi ia afine, ma erefisa ta nohua o tshou nonai.

⁴³Ma tiaha tenei iatavou pe ta nana a tshaku Teriki nakomai iatavou?

⁴⁴Ma koucitia, inaia ta noreo o tshou alofa nimai ia tshaku atarega, ta tentama nisopo ia kabisa ia tshaku nonai.

⁴⁵Erefisa akoi fakarogrogo, ma ane iotshira kamai hepe neitucua iatakoi ia Ihova.

⁴⁶Ma Mery neitucua, Tshaku nokano koutucua kosore erefisa ko Ihova.

⁴⁷Ma tshaku fenagaro nakabisa ia Atua Tshaku kapare.

⁴⁸Ma aia nakacitia tshana fine fetshicou sisi outa jimra, ma wamuri nei iotshi apecpece o tagata katapa avou erefisa.

⁴⁹Aia ko tomatua nakamna anea sore iatavou, ma itapu ko tshana neigo;

⁵⁰Ma tshana karofa konofo ia acre tagata kumtacu aia ia aseatu ma aseatu tagata.

⁵¹Aia nifakairo ta tomatua o tshana norima; aia nakapesia acre arotorea sore i afasao o niare aroto.

⁵²Aia nakanofo iraro ta fateriki ia niare athron, ma neitshicitshiakace acre neinofo iraro.

⁵³Aia nakafonu makona ia anea erefia acre tshitogi, ma acre niare outa sore aia nikounace tshitogi.

⁵⁴Aia nakasitu tshana fetshicou Isreil, ia nimentua o tshna karofa.

⁵⁵Hepe aia nifasao ia tamanoteia Ebraham, ma niana pecpece tagata atou ma tou,

⁵⁶Ma Mery neinofo iai ia aia itata tumrama toru ma nifeke nitafuri ia tshana fare.

⁵⁷Ma ta nopoge nimai pe Ilisabith farere tshana tentama, ma aia nifarere tasi nontariki.

⁵⁸Ma tagata o tshana umrai, ma tshana aneli neirogona pe Ihova niarofa sore aia, ma acre nibisa.

⁵⁹Ma ia nopoge varu acre nifetacina keisegakage ta tentama, ma acre neitucua erefia tshana neigo Sakaraias, wamuri ta neigo o tshana tamana.

⁶⁰Ma tshaha nana nifasao ma neitucua, Jimra hepra, kaia katapa tshana neigo Joanes.

⁶¹Acre neitucua iateia jimra tasi o niaua anoso nitapa ia neigo Joanes.

⁶²Ma acre nifasao ia aremore ia tamana, taha aia acitiafakarafia keitapa tshana neigo.

⁶³Ma aia nifakowia tasi ane keiserea tatapuria ia aia, ma neiserea, nokoutucua, Tshana neigo ko Joanes. Ma acreiotshi nimasaro.

⁶⁴Ma tshana rogoutu nitshike meloua, ma tshana norero eivetea, ma aia nifasao, nokobisa ia Atua.

⁶⁵Ma kumtacu nito ia iotshi tagata neinofo kofori acre, ma iotshi afasao ra nokoutucua ia tagatotshi nokonofo ia ta fanua o ta aora o Juteia.

⁶⁶Ma acreiotshi neirogona, acre nipurutshia acre ia arotorea, nokoutucua, Taha magane o tentama tenei! Ma ta norima o Atua neinofo ia aia.

⁶⁷Ma tshana tamana Sakaraias iai nifonu ia ta Nokano Tapu, ma nikova nokoutucua,

⁶⁸Erefisa kagi ta Teriki Atua o Isreil; ma aia nakamai ma keitufwa keipare ia niane tagata,

⁶⁹Ma neitshicitshiakace tasi patshi o anea mouri iacitia ia ta fare o tshana fetshicou Tevit;

⁷⁰Hepe aia nifasao ia rogoutu o tshana itapu aprofeta nakonofo ia neikamata o fanua wararonei;

⁷¹Pe aia kapare acime ia acre feimacoua acime, ma ia arimore o acreiotshi fakainina acime.

⁷²Keiarofo ia fatapunome, ma keimentua tshana tapu rakumuna mori;

⁷³Ta fasao tapu aia neitucua mukei ia Ebraham tamanoteia,

⁷⁴Keitufwa acime pe keipare acime ia arimore o acre feimacoua acime, pe acime nakavere ia aia sekumtacu,

⁷⁵Ia amagane tapu ma totonu mokagi aia, i iotshi anopoge acime komouri.

⁷⁶Ma akoi tama katapa ta profeta o aia ta sore su, ma akoi kafano mokagi ta foimata o ta Teriki sore keipenpena tshana aretu;

⁷⁷Keitufwa ta fakairo o tshana anea mouri ma kapare ia niana tagata ia touwaki ta ioria o niare amaganisa.

⁷⁸Ia ta karofa erefisa o tshote Atua, ia aia ta Tespring kofanifo iluga nakamai iacitia,

⁷⁹Keitufwa merama iacre konofo ia apouri ma ia ta ate o tamate, keiarafia avaiote ia taretu o merino.

⁸⁰Ma ta tama nisore, ma niamo tomatua ia ta nokano, ma neinofo ia atugogou ia ta nopoge neinage aia mokagi tagata o Isreil.