Read Futuna-Aniwa LUKUS, 10 Bible Online

LUKUS, 10 - Futuna-Aniwa bible

LUKUS, 10

¹WAMURI anea ra, ta Teriki neinage sevente foce fakou, ma nikouna acre erua ma erua mokagi tshana foimata ia iotshi umrai sore ma none, wehe aia kamai.

²Ianenei aia neitucua iacre, Ta vere kosore mari, kaia fakou toru ana iateia, ianenei acoua mori ta Teriki o tavere, pe aia kouna faru keivere ia tshana vere.

³Rora ia niaua aretu, koucitia avou kouna acoua hepe alam ia akuli eiro.

⁴Seamo ta kato o mone, mo ta kato sore, mo asu, ma sealofa tasi tane ia teretu.

⁵Ma ia taha fare acoua roro, fakatasi koutucua, Merino konofo ia tenei fare.

⁶Ma pe ta nontariki o merino konofo ia aia, niaua merino kanofo ia aia; pe jimra, aia kamai foci iacoua.

⁷Ma nofo ia tera fare nokeina mo nokonumea taha acre tufwa iacoua, ma tenei avere erefia ioria aia iateia. Seroro ia ta fare ma tafare foci.

⁸Ma ia taha tumrai sore acoua roro, ma acre amo acoua, keina anea acre kanagi mokaagi acoua;

⁹Ma penpena tagata maci ia acre, Ma koutucua iacre tavaka o Atua komai itata iacoua.

¹⁰Kaia ia taha umrai acoua roro, ma acre seamo acoua, roro acoua efuafo ia aretu o aia, ma koutucua.

¹¹Ta tefu takere o niaua tumrai konofo ia avaiome acime iamosiace keisaciria acoua, kaia keiro tenei tamari, pe tavaka o Atua komai itata iacoua.

¹²Kaia avou koutucua iacoua, pe ioria fakasisi o Sotom ia tera nopoge kaia ioria o tumrai tera fakasore.

¹³Kawe iatakoi Koresin! kawe iatakoi Bethseta! ma pe ta avere sore neimna ia Tyrus ma Saiton neimna ia akorua, acrawa nitagi ma natshicina maganisa itua, ma neinofo ia umega o bak ma ia tefu.

¹⁴Kaia o Tyrus ma Saiton, fakasisi ta ioria, niaua fakasore.

¹⁵Ma akoi Kapernaum katshicitshiakace ia taragi, Katouwaki ia terua sore isa.

¹⁶Aia pe fakarogona acoua, fakorogona avou, ma iai feimacoua acoua feimacoua avou; ma aia feimacoua avou feimacoua aia nikouna avou.

¹⁷¶ Ma ta sevente nikuafe ia kabisa, nokoutucua, Teriki agelo isa ma korogona tshomefasao ia tshou neigo.

¹⁸Ma aia neitucua iacre, Avou neicitia Satana hepe tuptupeia fanifo ia tarigi.

¹⁹Koucitia avou tufwa iacoua ta tomatua keitumea iraro avaioua ia agata ma ane isa, ma iluga iotshi tomatua o aia feimacoua acitia, ma jimra ane tasi takaroiai acoua.

²⁰Kaia sekabisa ia tenei, pe anokano fakarogona niaua fasao; kaia kabisa sore pe niaua aneigo neiserea ia taragi.

²¹¶ Ia tera our Jesu nibisa ia ta Nokano Tapu, ma neitucua, Avou thank akoi Tata, Teriki o taragi ma iafanua, pe akoi nafuna anea ra ia acre arapakou ma sore, ma nafakairo acre ia untama sisi; keini Tata, ma ane nei erefia ia tshou foimata.

²²Ane iotshi nakatufwa avou o tshaku Tata, ma jimra tasi keiro akai ko ta Nontariki, kaia Tamana ana; ma akai ko Tamana, kaia ta Nontariki, ma aia iateia ta Nontariki kafakairo o aia.

²³Ma aia nitafuri ia niana tagata aia nifakairo, ma neitucua gnusgnusu, Erefisa afoimata koucitia ta anea acoua koucitia.

²⁴Ma avou koutucua iacoua pe nalupai aprofeta ma fateriki neicitiafakarafia keicitia anea acowa koucitia, ma secitiamana acre, ma keirogona anea acoua karogona, ma serogona acre.

²⁵¶ Ma tasi tane arapakou ia tafasao tapu nikotu iai keitogafia aia, neitucua, Teriki taha avou kamna keiamo anea mouri atou ma tou?

²⁶Ma aia neitucua iateia, Taha ko serea ia afasao tapu? taha akoi tawa?

²⁷Ma aia nokofasao neitucua, Akoi kacitiafakarafia ta Teriki tshou Atua ia iotshi tshou rota, ma ia iotshi tshou nokano, ma ia iotshi tshou tomatua, ma ia iotshi tshou fenagaro, ma tagata ia tshou arotopa hepe akoi.

²⁸Ma aia neitucua iateia, Akoi nifasa erefia; emna tenei, ma akoi kamouri.

²⁹Kaia aia neicitiafakarafia emna tshaua magane totonu, neitucua ma akai ko tshaku tagata arotopa?

³⁰Iesu nifasao neitucua Tasi tane nifeke Jerusalem nifano ia Jeriko, ma nito ia tagata tshigo, acre niamke tshana umega ma nitaro aia, ma nifeke aia itata mate.

³¹Ma tasi tane tapu nimai iraro tera teretu, ma wamuri aia neicitia aia, aia nifano ia nontafa foci teretu.

³²Hepera ma tasi tane o Livai nimai ia ta none neicitia aia, ma nifano ia nontafa foci.

³³Ma tasi tatane o Samaria hepe aia nifano nimai iai, neicitia aia, ma nialofa aia.

³⁴Ma nifano iateia, Ma nifousia tshana ataro neiregea iacre avainu ma weina, ma neinage aia ia tshana hos, ma nimai aia ia tafare tagata nigapu iai, ma nifatshigeia aia iai.

³⁵Ma ia arotu mokagi aia nifano, aia niamo erua pene ma neitufwa acrawa ia ta teriki o ta fare, ma neitucua iateia, Fatshigeia erefia aia, ma taha mone foci akoi amo iateia, ia nopoge avou mai foci avou kaioria akoi.

³⁶Akai o acratou akoi mentua nimagane ia aia nito ia tagata tshigo hepe aia o niare arotopa.

³⁷Ma aia neitucua, Aia niarofa aia, ma Iesu neitucua iateia Fano akoi, ma emna hepera.

³⁸¶ Ane nei nimai, hepe acre niroro, aia nifano ia tasi tumrai sisi, ma tasi fine neigo Martha niarafia aia efare tshana.

³⁹Ma tshana noso Mery, aia foci neinofo ia novai o Iesu, ma neirogona tshana fasao.

⁴⁰Kaia Martha niavere sore, ma aia nimai ia aia ma neitucua, Teriki akoi sekeiro tshaku noso nifeke avou ana keivere iotshi? Koutucua aia ianenei pe aia komai keiasitu avou.

⁴¹Ma Iesu nifasao neitucua iateia, Martha, Martha, akoi mentua ma roto nimy ia ane nalupai;

⁴²Kaia ane tasi ana ko erefia, ma Mery Nakasubina ta nuntafa erefia, aia sekamkece ia aia.