Read Futuna-Aniwa LUKUS, 11 Bible Online

LUKUS, 11 - Futuna-Aniwa bible

LUKUS, 11

¹ANE nei nimai, hepe aia nokomori wamuri aia kurava, tasi o niana tagata aia nifakairo neitucua iateia, Teriki fakairo acime keimori, hepe Joanes nifakairo niana tagata.

²Ma aia neitucua iacre, Inaia acoua mori, koutucua. Tamanome ia taragi, Itapu tshou neigo, Tshou vaka mai, Tagata fakarogona tshou afasao iafanua wararonei hepe ia taragi.

³Tufwa acime nopoge ma nopoge tshome akoi,

⁴Ma touwaki nori amaganisa tshome, ma acime foci touwaki nori o iotshi sefakamata acime, ma searafia acime ia karasia, kaia kapare acime ia ane isa iotshi.

⁵Ma aia neitucua iacre, Akai o acoua nakamo tasi neli, ma kafano iateia ia taratupo, ma katucua iateia, Neli fakafecina avou toru bret;

⁶Ma tasi neli tshaku ko mai iatavou ia tshana nokofano, ma tshaku kai ko jimra keinagi mokagi aia?

⁷Ma aia efare kafasao ma koutucua, sefakouia avou, tafeitoca melou ko pofna, ma tshaku erecriki nokomoy ia avou i apotu; avou taru masike ma tufwa akoi?

⁸Avou koutucua iacoua, pe aia semasike ma tufwa aia, ianenei aia ko tshana neli, kaia ianenei aia nokofakowia iateia, aia kamasike ma tufwa aia faru hepe aia acitiafakarafia.

⁹Ma avou koutucua iacoua, nogia ma aia katufwa iacoua, fakowia ma acoua kamo, tucia ma aia katshiki iacoua.

¹⁰Ma iotshi nogia kamo, ma aia fakowia kamo, ma ia aia tuctucia katshiki.

¹¹Pe tasi nontariki kafakowia bret o tasi o acoua pe aia ko tamana, tiaha hepe aia eika aia katufwa aia tasi agata?

¹²Mo pe aia nogia tasi fakamoa aia katufwa aia tasi skorpion?

¹³Pe acoua isa keiro tufwa ane erefia ia niaua erecriki, Sore kage Tamanoua ia taragi katufwa ta Nokano Tapu iacre fakowia aia?

¹⁴¶ Ma aia nokosegeake tasi agelo isa, ma aia tano, Ma ane nei nimai, wamuri agelo isa nifeke aia, ta tane tano nifasao, ma tagata nimasaro.

¹⁵Kaia faru neitucua, aia segeake agelo isa ia Bilsibub ta teriki o ta agelo isa.

¹⁶Faru foci nokarasia aia, nogia aia katufwa tasi ane sore ia taragi.

¹⁷Kaia aia nikeiro niare afenagaro, neitucua iacre, Iotshi tavaka pe kovaia ma nontafa takaroiai nontafa aia ko taroiai, ma tasi fare nivaia nontafa feimacoua nontafa aia koto.

¹⁸Ma pe Satana ko nivaia ia Satana, tiaha tshana vaka kotu? ianenei acoua koutucua avou segeake agelo isa ia Bilsibub.

¹⁹Ma pe avou ia Bilsibub segeake agelo isa, ia akai niawa anontariki segeake acre? Ianenei acre kaioria acowa.

²⁰Kai pe avou ia ta matshikoreima o Atua segeake agelo isa, ianenei ta vaka o Atua komai iacowa.

²¹Inaia tasi tatane tomatua ia tamaka kapare niana taratopa, tshana outa merino.

²²Kaia pe tasi tomatua sore kage aia komai iateia, ma takaroiai aia, aia amke tshana anea mane o tatowa ia acre aia fakarogrogo, ma kotarouiai tshana nokopanpania.

²³Aia senofo iatavou aia femacoua avou, ma aia sefetacina iatavou eipesia.

²⁴Ta agelo isa wamuri aia nifeke ta tane, fano ia aroto o anone tavai senofo iai, nokosara nigapu, ma seamo aia, aia neitucua, avou kuafe ia tshaku fare avou nimai watafa.

²⁵Ma inaia aia komai aia kowcitia aia serea ma penpena,

²⁶Wamurira aia fano ma arafia iateia fitu foci nokano isa sore kage aia, ma acre roro ia aia ma nofo iai; ma tera tane wamurira isa sore kage thana magane mokagi.

²⁷Ane nei nimai hepe aia neitucua anea ra, tasi fine o acre nifakatapuria iai, ia noreo sore neitucua iateia. Erefisa ta fine nifarere akoi, ma anou akoi nikou.

²⁸Kaia aia neitucua, Keini, ma ere fisa sore kage, acre korogona tafasao o Atua, ma kopurutshia aia.

²⁹Ma ianaia tagata nifakatapuria iatea, aia neikamata koutucua, Tenei taseatu tagata isa, acre nokosara ane sore, ma jimra tase ane sore katufwa iacre, kaia ta ane sore o Jona ta profeta.

³⁰Ma hepe Jona ane sore ia tagata o Nineve, hepe foci ta Nontariki o tagata konofo ia tagatotshi nofo milou.

³¹Ta fine riki o ta south kamasike ia ta nopoge o ioria ia tagatotshi nofo milou, ma katucua acre isa; ma aia nimai ia anoporpore o iafanu keirogona ta arapakou o Solomon, ma koucitia tasi sore kage Solomon ko icunei.

³²Fakou o Nineve kakotu ia ta yoria o tagatotshi nofo milou, ma koutucua acre isa, ma acre nitagi i ta nikova o Jona; ma koucitia tasi sore kagi Jona ko icunei.

³³Jimra tasi tatane nakatugia ta lamp kenage aia iraro tafare ma iraro taganea, kaia ia ane iluga, pe acre fano efare koucitia ta merama.

³⁴Ta lamp o tshou notshino ko tshou foimata; ma inaia tshou foimata totonu, erefia, iotshi tshou notshino kofonu o merama, kaia pe aia isa iotshi tshou notshino kofonu o apouri.

³⁵Ianenei fatshigeia pe ta merama konofo ia akoi kojimra apouri.

³⁶Pe iotshi tshou notshina kofonu o merama, ma senofo tase nontafa pouri ia aia, ia iotshi kafonu merama, hepe ta lamp ia tshoua noneata katufwa akoi merama.

³⁷¶ Hepe aia nifasao, tasi Farasi nifakouia aia keina ia aia, ma aia nifano efare ma neinofo ia akai.

³⁸Ma wamuri ta Farasi neicitia anera, aia nimasaro pe aia sekoukou mokagi aia nikeina.

³⁹Ma ta Teriki neitucua iateia, Melou acoua Afarasia tataroa watafa o ta kup ma o ta plet, kaia niaua roto kofonu o anea fakamata sore ma o amaganisa.

⁴⁰Acoua searapakou, Aia neimna ane watafa neimna ane watakoro foci mo?

⁴¹Kaia sore erefisa keitufwa arofa o niaua anea mane, ma ane iotshi ko ekira iacoua.

⁴²Kaia kawe ia acona Afarasi! Ma acoua takavari ment ma ru ma iotshi ane sisi somo, ma seioria totonu ma natshicina ta acitiafakarafia o Atua; erefia acou emna anera, ma jimra natshicina acre foci.

⁴³Kawe ia acoua afarasi! ma acoua acitiafakarafia afata nofo iluga ia afare mori, ma alofa o tagata ia aumrai.

⁴⁴Kawe ia acou fakou serea tatapuria ma Afarasi arotoua erua! ma acoua hepe arua o ta mate mune, ma tagata sekeiro pe raro iluga acre.

⁴⁵Iai tasi o fakou arapakou ia afasao tapu nifasao ma neitucua iateia, Teriki ia tenei fasao akoi saciria acime foci.

⁴⁶Ma aia neitucua, Kawe ia acou fakou arapakou ia afasao tapu! Ma acoua tshipeina fakou ia ane mafu su, ma acoua setofia ane tshipeina ia tasi o niaua matshikorima.

⁴⁷Kawe iacoua! Ma acoua fakataturia atupunaga o aprofeta ma tamanoua nitaia mate acre.

⁴⁸Ma acoua nokotamou iai, ma koutucua erefia avere o tamanowa; ma acre nitaia mate acre, ma acowa fakaturia niare upunaga.

⁴⁹Ianenei ta arapakou O Atua neitucua. Avou kakouna iacre aprofeta ma apostolo, ma faru o acre, acre kataia mate ma sewa;

⁵⁰Pe ta toto o iotshi aprofeta neiregea ia ta nontafito o fanua wararonei, makeiioria o tasiatu tagata nofo milownei.

⁵¹Ia ta toto o Ebel ia ta toto o Sakaraias nitaia ia aroto o tafata ma tafare mori, keini ioria iotshi ia tagata nofo milou.

⁵²Kawe iacoua fakou arapakou afasao tapu! mo acowa niamke ta ki o arapakou, Acoua seroro watakoro, ma acre nokororo acowa neitucuasana.

⁵³Ma wamuri aia nimai watafa iai, tagatea serea tatapuria Ma Afarasi neikamata acitiafakarafia sore takaroiai aia, ma keinokosasaga aia keifasao o ane nalupai.

⁵⁴Nokofatshigeia aia, keipurutshia afasao o tshana rogoutu.