Read Futuna-Aniwa LUKUS, 12 Bible Online

LUKUS, 12 - Futuna-Aniwa bible

LUKUS, 12

¹IA nopogera, inaia nalupai athousant o tagata nifakatpuria, ianei acre neitakumea tasi ia tasi foci, aia neikamata kaitucua ia niana tagata aia nifakairo mokagi iotshi, Fatshigeia ta leven o Afarasi aia ko aroto irua.

²Kaia jimra ane tasi niapotshia, Kaia katucua iotshi, mo nifuna, kaia kakeiro iotshi.

³Iananei ane iotshi acoua neitucua ia ta apouri, karogona ia ta marama, ma taha acowa nakatucua ia kogugu ia tarega ia efare aroto, katucua ia antokotokoga tafare.

⁴Ma avou koutucua iacowa tshaku anele, Sekumtacu acre kotaia mate ta noaga, kaia wamurira setomatua emna ane foci iacoua.

⁵Kaia avou fakairo acoua akai erefia acoua kamtacu, Kumtacu aia, wamuri aia nakatshi mate, nakamo tomatua keitouwaki ia teafi sore; keini avou koutucua iacoua, Kumtacu aia.

⁶Fakamata o erema manu sisi erua farthing mo? Ma jimra tasi o acre ko nigaro ia ta foimata o Atua.

⁷Kaia afoiuru o niawa anouru nitawa iotshi. Sekumtaca, fakamata o acowa sore kage nalupai amanu sisi.

⁸Ma avou koutucua iacoua, Iotshi koutucua tamari aia acitiafakarafia avou mokagi tagata, Aia ta Nontariki o tagata foci katucua aia mokagi Agelo o Atua.

⁹Kaia aia kavetea avou mokagi tagata, kavetea aia mokagi ta Agelo o Atua.

¹⁰Ma iotshi tagata katucua ta fasao isa o ta Nontariki o tagata, katouwaki tshana ioria iateia, kaia Aia fasao feimacoua ta Nokano tapu tshana ioria iateia setouwaki.

¹¹Ma inaia acre arafia acoua mokagi afare mori ma fateriki ma fakou sore, sekumtacu acoua taha acoua koutucua, mo taha acoua fasao;

¹²Ma ta Nokano Tapu kafakairo acowa taha erefia acoua kotucua.

¹³¶ Ma tasi o acre nifetacina iai neitucua iateia, Teriki koutucua tsaku noso keivaia outa o tata ia avou.

¹⁴Kaia aia neitucua iateia, Tane akai neimna avou tasi koutucua ioria, mo tasi keivaia outa niaua?

¹⁵Ma aia neitucua iacre, Fatshigeia ma natshicina kamatea ane tsha faruke, ma ta aneamouri o tatane senofo ia tshana outa sore aia niamo.

¹⁶Ma aia nifasao fakatagasia iacre, nokoutucua, Ta fanua o tasi tane niana outa nalupai su neitufwa anohua nalupai su.

¹⁷Ma aia mentua ia tshana notshigereo, nokoutucua. Taha avou kamna, ianenei, tshaku fare jimra keifetacina ma nagi iai tshaku anohua?

¹⁸Ma aia neitucua, Tenei avou kamna, Avou tacina iraro tshaku tafare o toutokogane, ma emna faru foce sorekagi, ma iai avou kanage iotshi o tshaku anohua, ma tshaku outa.

¹⁹Ma avou katucua ia tshaku nokano, Nokano, akoi nagi outa fetacina nalupai ia atou nalupai, nofo merino, keina, keinu, ma kabisa.

²⁰Kaia Atua neitucua iateia, Akoi tano tane, tupo nei tshou nokano kamke ia akoi; ma anea mane akoi neinagi konofo tsha akai?

²¹Hepera ana aia nagi outa ia aia, ma tshana outa ia Atua ko jimra.

²²Ma aia neitucua ia niana tagata aia nifakairo, Ianenei sekumtacu sore ia tshoua mouri, taha acoua kakeina, ma jimra ia ta notshino taha acoua kataka aia.

²³Ta ane mouri ko sore kagi ta kai, ma ta notshino sore kage ta umega.

²⁴Kamentua ta (reven) manu o tagarakou, acre seeipesia ma sefetacina akai, acre seamo ta fare nage nohua akai iai, mo tafare o outa, ma Atua fakeina acre, ioria o acoua sore kagi Amanu?

²⁵Ma akai o acoua ia mentua ko tomatua keimna tshana notshino palo fakasisi?

²⁶Pe acoua taru emna ta ane, kosisi, tiaha acoua mentua ia ane foci?

²⁷Kamentua ta naveavia ma, acre somo erefia, acre severe, seemna umega, ma avou koutucua iacoua, Solomon ia tshana sore sekataka hepe tasi o acre.

²⁸Pe Atua kataka tagaferi hepera, aia somo iranei ia tagarakou mo kotugia aratou ia tiafi, sore kagi aia kataka acoua, Acoua o sisi fakarogrogo?

²⁹Ma sefatshigeia acoua taha acoua kakeina, ma taha acoua keinu, ma senofo ia nabura fenagaro.

³⁰Ma ane iotsi ra tagata o iafanua fatshigeia, kaia niawa Tamana nokeiro acoua acitiafakarafia ane iotshi ra.

³¹Kaia erefia sore kagi acoua fatshigeia ta vaka o Atua, ma aneiotshira aia foci katufwa iacoua.

³²Sekumtacu acoua tagata toru ana, ma aia ta acitiafakarafia o niaua Tamana keitufwa iacoua ta vaka.

³³Fakamata niaua outa ma tufwa akarofa, emna iacoua akato seeifasia, outa i ataragi aia sekobune iai, wehe jimra tasi tshigo sefano iateia, ma ta sicibini setakaroiai.

³⁴Ma wehe niaua outa konofo, iai niaua roto konofo.

³⁵Erefia niaua anobile katoutshi, ma niaua alamp nokotugia.

³⁶Ma acou hepe fakou nokofatshigeia niare teriki, inaia aia kuafe ia tacripoga o ta fakavageina, pe aia komai ma tucia, acre meloua tshike iateia.

³⁷Erefisa afetshicoura, acre inaia ta teriki komai aia kacitia acre nokofatshigeia; tamari avou koutucua iacoua, pe aia kafetacina tshana katoutshi, ma emna acre nofo keina, ma aia kamai ma vere o ta fetshicou iacre.

³⁸Ma pe aia kamai ia ta fatshigeia fakarua, Mo komai ia ta fatshigeia fakatoru, ma neicitia acre hepera, erefisa afetshicou ra.

³⁹Kaia keiro tenei, pe ta teriki o ta fare nikeiro ta our tagata tshigo nokomai aia makafatshigeia, ma senatshicina ta fare thsana keifasia.

⁴⁰Erefia acoua foci fatshigeia, ma sekamentua ia ta our acoua ta Nontariki o tagata ko nokomai.

⁴¹Ma Pitrus neitucua iateia, Teriki akoi koutucua fakatagasia nei iacime, mo ia tagatotshi?

⁴²Ma ta Teriki neitucua, Akai tatane magane totonu ma arapakou, tshana teriki kanage keifatshigeia tshona fare ma afetshicou, keitufwa acre niare akoi ia nopito nopoge iateia?

⁴³Erefisa tera fetshicou, aia pe tshana teriki nokomai koucitia aia magane totonu hepra.

⁴⁴Tamari avou koutucua iacoua, aia keinagi aia iluga keifatshigeia ane iotshi tshana.

⁴⁵Kaia pe tera fetshicou katacua ia tshana roto, Tshaku teriki kotari nokomai, ma kaneikamata keitshi ta fakou fetshicou ma fafine fetshicou, ma keina ma keinu, ma keikona;

⁴⁶Ta teriki o tera fetshicou kamai ia taha nopoge aia sefatshigeia, ma ia our aia sekeiro, ma kasawa aia, ma nagi aia ia acre sefakarogrogo.

⁴⁷Ma ta fetshicou, nikeiro taha tshana teriki acitiafakarafia, ma sepenpena iateia, ma seemna magane hepe aia acitiafakarafia, kotshi aia ia atshi nalupai;

⁴⁸Kaia aia sekeiro, ma neimna magane ioria ia atshi, katshi ia toru ana atshi. Ma iateia nalupai kotufwa, o aia nalupai kamo; ma ia aia acre kanagi nalupai, o aia acre kafakowia ta sore.

⁴⁹¶ Avou nimai keitonwaki tiafi ia fanua; ma taha avou kamatea pe aia milou kotugia?

⁵⁰Kaia avou nokamo tasi baptiso keibaptiso avou ia aia; ma avou pecitshia i taha nopoge aia kurava!

⁵¹Kamentua acoua avou komai keitufwa merino ia fanua? avou kotucua iacoua jimra, kaia kovaia;

⁵²Ma wamuri nei erima kanofo ia tase fare nivaia, toru feimacoua erua, ma erua feimacoua toru.

⁵³Acre kavaia, tamana feimacoua ta nontariki, ma ta nontariki ta mana; ta nana feimacowa ta nofine, ma ta nofine ta nana; ta tornana feimacoua tshana noraimutu, ma ta noraimutu kafeimacoua ta tornana.

⁵⁴¶ Ma aia neitucua ia tagata nalupai nifakatapuria; inaia acoua koucitia ta apa masike ia ta west, meloua acoua koutucua, toua nokomai ma hepra aia komai.

⁵⁵Ma inaia acoua koucitia ta south tumtagi nokosau, acoua koutucua evera sore komai, ma aia komai.

⁵⁶Acowa tagata aroto erua, acowa keiro koutucua ta foimata o fanua ma taragi, kaia tiaha acowa sekeiro ta nokano o nopoge malou?

⁵⁷Ma tiaha acoua sekoutucua taha erefia?

⁵⁸Ma hepe akoi fano ia aia feimacoua akoi ia ta teriki koutucua ioria o amaganisa, ia teretu emna tshana roto mugaro iatakoi, pe aia setorotshi akoi mokagi aia ioria totonu, ma aia ioria tufwa ia ta fetshicou, ma ta fetshicou nagi akoi ia tafare mukei.

⁵⁹Avou koutucua iatakoi, akoi sekomai watafa ia taha nopoge akoi ioria iotshi.