Read Futuna-Aniwa LUKUS, 14 Bible Online

LUKUS, 14 - Futuna-Aniwa bible

LUKUS, 14

¹ANE nei nimai, hepe aia nifano efare o tasi teriki o ta afarasi keina akai ia ta nopoge tapu, acre nifatshigeia aia.

²Ma neicitia mokagi aia tasi tatane tshana notshino nifura ia amaci avai nalupai ia aia.

³Ma Iesu nifasao nokoutucua ia fakou arapakou ia afasao tapu ma Afarasi, Aia erefia keipenpena tagata o amaci ia ta nopoge tapu mo jimra?

⁴Kaia acre sefasao, Ma aia niamo aia ma neipenpena aia, ma aia nifeke.

⁵Ma aia neitucua iacre Akai o acoua pe tshana kurimatou mo as kakoto ia tasi tavai nupu ma acoua meloua setorotshia watafa aia ia ta nopoge tapu?

⁶Ma acre taru fasao aia foci ia ane iotshira.

⁷Ma aia nifasao tasi fakatagasia fasao iacre nitapa iai, wamuri aia neicitia acre kasubeina afata erefisa; nokoutucua iacre,

⁸Inaia tasi tane nitapa akoi ia fakavageina tacripoga, senofo ia afata sore, pe tasi tane sorekage akoi nitapa iateia;

⁹Ma aia nitapa akoi ma aia kamai ma koutucua iatakoi, Tufwa tatane nei tshou none, ma akoi ia koma kamasike ma keinofo ia afata iraro.

¹⁰Kaia pe akoi katapa, fano ma nofo ia afata iraro ana, pe inaia aia nakatapa akoi komai aia ma katucua iatakoi, Neli fano ia none iluga, wamurira akoi kosore ia acre nofo ia akai ia akoi.

¹¹Mo iotshi nokonagi aia iluga Kanagi aia iraro, ma aia kanage aia iraro katshicitshiakace aia iluga.

¹²Ma foci aia neitucua ia aia nakatapa aia, taha nopoge akoi emna akai sore toute mo fiafe, setapa iateia, niawa aneli, ma anoso, mo niawa tagata, mo acre katapa foci akoi, ma ioria akoi iateia katufwa.

¹³Kaia ia taha nopoge akoi emna tase tacripoga, tapa acre niare ane jimra, ma acre nitoushice nontafa notshino ma acre sape, ma acre kofu;

¹⁴Ma aore fasao erefia iatakoi; ianenei niare ane jimra ioria akoi iateia; ma kaioria akoi ia ta nopoge o ta kamasike foci o tagata nimate neimna Magane totonu.

¹⁵Ma wamuri tasi o acre neinofo iateia ia akoi neirogona ane iotshi ra; aia neitucua iateia, Erefisa aia kakeina bret ia tavaka o Atua.

¹⁶Ma aia neitucua iateia, Tasi tatane neimna tasi tacrepoga sore fiafi, ma aia nitapa nalupai;

¹⁷Ma ia fiafi aia nikouna tshana fetshicou keitucua iacre aia neitapa, Komai ma ane iotshi kurava iateia.

¹⁸Ma acreiotshi ia tasi fenagaro neikamata keitucua; Ta fakatasi neitucua iateia avou nifakamata tavere tasi ma avou makafano keicitia aia, erefia kanatshicina avou.

¹⁹Ma tasi foci neitucua, Avou nifakamata erima kurimatou o avere, ma avou makafano keicitia pe acre erefia; erefia kanatshicina avou.

²⁰Ma tasi foci neitucua avou nakovaga nanahune ma avou taru komai.

²¹Ma ta fetshicou nimai neitucua ia tshana teriki ane iotshira, ma ta teriki o tafare nifakainina neitucua ia tshana fetshicou; Fano meloua ia teretu sore ma sisi o ta tumrai sore ma arafia mai acre niare jimra, ma acre notshino sawace nopito, ma acre Kofu ma acre sape.

²²Ma ta fetshicou neitucua, Teriki taha akoi neitucua ko emna, ma tafare sefonu.

²³Ma ta teriki neitucua ia ta fetshicou, Fano ia aretu watafa, ma tapa, ma torotshimai acre, pe tshaku fare ma kafonu.

²⁴Ma avou koutucua iacoua jimra tasi o fakoura nitapa kakeina sisi o tshaku akai fiafi.

²⁵¶ Ma nimuri iateia tagata nalupai su, ma aia nitafuri ma neitucua iacre,

²⁶Pe tasi tane komai wamuri avou, ma sefeimacoua tshaha tamana ma nana ma nanahune Ma erecriki, ma anoso ma anokave, keini ma tshana aneamouri foci, aia kojimra tatane avou nifakairo.

²⁷Aia seamo tshana fakaravasia ma komai wamuri avou, aia kojimra tshaku tagata avou nifakairo.

²⁸Mo pe tasi o acoua acitiafakarafia fakaturia afatu nokomna tafare iluga, senofo mokagi ma tawa pe tshana mone nalupai emna aia kurava?

²⁹Ma pe inaia aia neinage ta tavefare, ma setomatua emna aia kurava, iotshi koucitia aia neikamata soutari aia.

³⁰Nokoutucua, Tane nei neikamata keifakaturia, ma aia setomatua keimna kurava.

³¹Mo taha teriki hepe aia kofano keitatoua ia tasi foci teriki ia tatoua, sekanofo mokagi kamentua pe aia tomatua ia ten thousant, keifapa aia komai iateia ia twente thousant?

³²Mo pe ta faruke papai, aia kouna faru niana tagata, ma fakouia aia natshicina tatoua ma aia ioria iateia.

³³Hepra ma, pe tasi o acoua senatshicina ane iotshi niana aia setomatua konofo tshaku tane avou fakairo.

³⁴Tera koerefia, kaia pe ta tera nimarigi tshana tomatua, ia taha tufwa aia tomatua foci?

³⁵Aia seerefia ia takere, ma ia none o tefu; fakou teouwaki aia. Aia nakamo nontarega keirogona, erefia aia korogona.