Read Futuna-Aniwa LUKUS, 16 Bible Online

LUKUS, 16 - Futuna-Aniwa bible

LUKUS, 16

¹MA aia neitucua ia niana tagata aia nifakairo, Tasi tatane niana outa sore, niamo tasi fetshicou nifatshigeia ane iotshi tshana, Ma faru neitucua iateia aia niiauiai tshana outa.

²Ma aia nitapa aia, Ma neitucua iateia, Taha tenei avou nafakarogona o akoi? Nokofakairo avau magane tshou ia avere o fatshigeia; ma akoi makurava avere o fatshigeia; ma akoi makurava avere o fetshicou fatshigeia ane iotshi.

³Ma ta fetshicou neitucua ia tshana roto, Taha avou kamna nokoucitia tshaku teriki amke ta vere o fatshigeia ia avou? Avou setomatua vere ia takere; keifakouia akoi avou koma.

⁴Avou keiro taha avou kamna, pe nitouwaki avou ia avere o fatshigeia, acre arafia avou ia niare efare.

⁵Ma nokotapa iateia acre seioria tshaku teriki?

⁶Ma aia neitucua tasi huntret taganea rafa o avaineu, Ma aia neitucua amo tshou pepa iateia, miloua nofo ma serea fefte.

⁷Wamurira aia neitucua ia tasi foci, Taha akoi seioria? Ma aia neitucua tasi huntret taganea rafa o wit. Ma aia neitucua iateia amo tshou pepa iateia ma serea eti.

⁸Ma tshana teriki neitucua arapakou ta magane o ta fetshicou isa fatshigeia, mo anontariki o tenei fanua ia niare tagata arapakou sore kage, anontariki o tagata o merama.

⁹Ma avou koutucua iacoua, emna iacoua aneli, ia ta outa o magane safi, pe taha nopoge niaua ane kojimra, acre arafia acoua ia ta atou matou afare.

¹⁰Aia magane totonu ia fakasisi, foci komagane totonu ia fakasore, Ma aia magane safi ia fakasisi, foci, komagane safi ia fakasore.

¹¹Ianenei pe acoua semagane totonu ia ta outa o amagane safi, Akai katufwa iacoua fatshigeia ta tamari outa?

¹²Ma pe acoua semagane totonu ia outa o faruke, akai katufwa acoua niaua outa?

¹³Jimra tasi fetshicou kavere ia teriki erua, ma aia feimacoua tasi, ma acitiafakarafia ta tasi foci, mo aia kapurutshia ta tasi, ma natshicina ta tasi foci. Acou setomatua Keivere ia Atua ma tenei fanua.

¹⁴Ma Afarasi, acre actiafakarafia mone, neirogona ane iotshira, acre nifasosa iateia.

¹⁵Ma aia neitucua iacre, acoua koutucua tshoua magane totonu mokagi foimata o tagata, kaia Atua keiro niaua aroto, ma ane kosore ia tagata, koisa sore kagi ia foimata o Atua.

¹⁶Afasao tapu ma aprofeta neinofo ia Nopoge o Joanes, ma wamurira afasao erefia o tavaka o Atua kokova, ma iotshi fakou fano tomatua ia aia.

¹⁷Kaia aia komeru taragi ma iafanua keisiri, kaia komukei tasi fasao sisi keikoto.

¹⁸Iotshi tatane segeake tshana nanahune, ma kovaga tasi foci kotshigo fafine tsha faruke, ma aia kovaga tasi neisegeake ia thsana nonwane kotshigo fafine tsha faruke.

¹⁹Neinofo tasi tatane tshana outa nalupai, ma aia nitaka ia umega ouroura, ma lenen erefisa, ma nikeina sore nopoge ma nopoge,

²⁰Ma tasi tatane nogia akai ma tshana neigo Lasarus, acre neinage aia ia tshana feipa (cet) nifonu o amenuka,

²¹Ma aia acitiafakarafia keina nopitopito nito ia afata o ta tane tshana outa sore; keini ma akuli nimai ma niapotshia tshana amenuka.

²²Ane nei nimai aia nogia akai nimate, ma agelo nitakoia aia ia ta nofatfata o Ebraham; ma ta tane tshana outa sore foci nimate ma neitanumea aia;

²³Ma ia ta tiafi sore aia seranano tshana foimata, nokonofo ia amy sore, ma neicitia Ebraham papaisu, ma Lasarus ia tshana nofatfata.

²⁴Ma aia neitapa ma neitucua, Tata Ebraham karofa avou, ma kowna Lasarus keifuia nomata o tshana matshi korima ia tavai ma emna mukaligi tshaku norero, mo avou komy sore su ia tenei tourafi.

²⁵Kaia Ebraham neitucua, nontariki mentua akoi ia anopoge akoi nimouri niamo tshoua anea mane erefia, ma Lasarus anea isa, kaia miloua ecunei aia kabisa, ma akoi komy sore su.

²⁶Ma foci iotshira, ia aroto o acoua ma acime tasi terua sore nofo mukei, pe acre setomatua feke acime fano iacoua, ma jimra tasi feke acoua komai iacime.

²⁷Aia neitucua, ianei avou mori akoi Tata pe akoi kouna aia ia tafare o tshaku tata;

²⁸Ma avou amo erima anoso, pe aia fakairo acre, pe acre semai ia tenei none o amy sore kagi.

²⁹Kaia Ebraham neitucua, Acre nakamo Moses ma aprofeta, erefia acre korogona acre.

³⁰Ma aia neitucua, jimra tata Ebraham, kaia pe tasi fano iacre ia komate, acre katagi ma natshicina maganisa.

³¹Ma aia neitucua iateia, pe acre serogona Moses aprofeta, acre serogona tasi pe aia masike ia acre nimate.