Read Futuna-Aniwa LUKUS, 17 Bible Online

LUKUS, 17 - Futuna-Aniwa bible

LUKUS, 17

¹MA neitucua ia niana tagata aia nifakairo, aia tamari ane emna tshipatshipa kamai, kaia kawe ia aia amai acre!

²Erefia iateia pe tasi tafatu o tafare saroa flou nifousia kofori tshana nupenaua ma aia nikero ia tatai, mokagi aia emna tasi o acre sisi keitshipatshipa.

³Fatshigeia niaua magane, pe tshou noso magane safi iatakoi neitucuasana aia; ma pe aia kotagi, touwaki tshou fakainina iatea.

⁴Ma pe aia iauiai tshou roto ia ane fitu ia tasi nopoge, ma ia fitu ane komai iatakoi koutucua avou kotagi; Akoi katouwaki tshou fakainena iateia.

⁵Ma ta apostolo neitucua iateia Teriki, Tufwa acime sorekagi fakarogrogo.

⁶Ma ta Teriki neitucua, Pe Acoua nakamo fakarogrogo hepe tasi nohua o mustart, acoua katucua ia tenei sykamin tererakou, Akoi tshicitshiakace ia noaka ma popra akoi ia tatai, ma aia karogona tshou afasao emna hepra.

⁷Kaia akai o acoua nokamna tasi fetshicou nokovere ia takere ma nokofatshigeia sip, pe sekoutucua iateia, pe aia komai ia tavere, komai miloua ma konofo ia akai;

⁸Ma sore kage katucua iateia, kotuna tshaku kai ma avou kakeina, ma kataka ia tshoua mega erefia kavere iatavou kakeina ma keinu ma wamurira akoi kakeinu ma keinu?

⁹Aia thank tera fetshicou mo ianenei aia neimna anea mane aia neitucua iateia? Avou mentua jimra.

¹⁰Hepe ma wamuri acoua emna ane iotshi neitucua iacoua emna, koutucua, Acime jimra erefia afetshicou; acime nakamna taha vere erefia acime emna ana.

¹¹¶ Ane nei nimai, hepe acre niroro ia Jerusalem, aia nifano ia aroto o Samaria ma Calili.

¹²Ma hepe aia nifano ia tasi tumrai sisi, nifapa aia ten atane acre nimaci ia leprose, acre kotu papai;

¹³Ma ia anoreo palo neitucua Iesu, Teriki, karofa acime.

¹⁴Ma inaia aia neicitia acre, aia neitucua iacre. Roro ma fakareake acoua ia fakou tapu, ma ane nei nimai hepe acre niroro, acre neipenpena erefia.

¹⁵Ma tasi o acre wamuri aia neicitia aia neipenpena, nitafuri, ma ia noreo palo nibisa ia Atua;

¹⁶Ma aia nito ia tshana foimata ia tshana novai ma neitufwa aia athank; ma aia tatane o Samaria.

¹⁷Ma Iesu nokofasao neitucua, Ta ten neipenpeno mo? kaia wehe ta nein?

¹⁸Jimra tase o acre nitafuri kabisa ia Atua, kaia tenei tatane o fanua papai?

¹⁹Ma aia neitucua iateia, Masike, ma fano tshoua retu, tshou fakarogrogo nakapenpena akoi erefia.

²⁰¶ Ma nokofakouia ia Afarasi, inaia ta vaka o Atua nokomai aia nifasao acre ma neitucua, Ta vaka o Atua sekomai ia ane neicitia;

²¹Ma jimra acre katucua, Fatshigeia ecunei! Mo econa! Ma fatshigeia, ta vaka o Atua kanofo ia arotoua.

²²Ma aia neitucua ia niana tagata aia nifakairo. Ta nopoge kamai, acoua, acitiafakarafia sore koucitia tasi nopoge o ta Nontariki o tagata, ma acoua sekacitia aia.

²³Ma acre katucua iacoua, Koucitia econa! Nokoucitia ecunei! sefano papai ia acre, mo wamuri acre;

²⁴Ma hepe ta tuptupeia inaia aia merama komai watafa tasi nontafa ia taragi, ma noneate ia tasi foci nopito iraro taragi; hepe ana ta Nontariki o tagata kamai ia tshana nopoge.

²⁵Kaia mokagi aia kamy ia ane nalupai; ma keitouwaki ia tagata nofo milounei.

²⁶Ma hepe aia nimai ia anopoge o Noa, hepe ana foci amagane ia ta nopoge o ta Nontariki o tagata.

²⁷Acre nikeina, ma acre nikeinu, acre nifakavageina, ma neitufwa ia fakavageina, ia nopoge Noa nifano ia ta vaka, ma avai sore nimai ma nitakaroiai acre iotshi.

²⁸Hepe ma nimagane i anopoge o Loti, acre nikeina, ma keinu acre fafecina ma ioria, acre nipopra, acre nifakaturia fare,

²⁹Kaia ia nopoge Loti nifeke Sotom aia nito tiafi ma arukasi ia taragi, ma nitakaroiai acre iotshi.

³⁰Wamuri maganera ane Kamai ia ta nopoge ta Nontariki o tagata koucitia nokomai.

³¹I taha nopoge tera, erefia aia kanofo ia tatahufu o tafare, ma tshana outa nofo efare, erefia aia sefano efare keiamke acre, ma erefia aia konofo ia tavere setafuri,

³²Kamentua nanahune o Loti.

³³Aia kafatshigeia keipurutshia tshana mouri, aia kapurutshia aia (ia taragi).

³⁴Avou koutucua iacoua, ia tera tupo erua fakou kamero ia tasi potu, tasi kamke ma tasi foci kanofo.

³⁵Iai erua fine nokarecina flou ia tasi vere, tasi kamke, ma tasi foci kanofo.

³⁶Erua tane konofo ia ta vere, ta tasi kamke, ma ta sece kanofo.

³⁷Ma acre nokofasao neitucua iateia, Wehe Teriki? Ma aia neitucua iacre, Wehe ta noaga ko nofo iai amamke kafetacina fakatapuria.