Read Futuna-Aniwa LUKUS, 18 Bible Online

LUKUS, 18 - Futuna-Aniwa bible

LUKUS, 18

¹MA aia nifasao tasi fakatagasia iacre keifakairo acre erefia fakou segapu keimore, ma sekeimatese;

²Nokoutucua, Ia tasi tumrai sore neinofo tasi tatane sore keitucua ioria o amaganisa, aia sekumtacu Atua mo tagata.

³Ma tasi fine nofo ana ia umrai ra, tshana nunwane nimate, ma aia nimai nopoge ma nopoge iateia, nokoutucua, Ioria aia feimacoua avou.

⁴Ma aia neinatshicina nopoge nalupai, kaia wamurira aia neitucua ia tshana roto, Pe avou sumtacu Atua mo tagata.

⁵Kaia ianenei tenei fine nofo ana segapu nokomai keinogeia avou, avou keioria aia, pe aia setakaroiai kuroto ia tshana nokomai.

⁶Ma ta Teriki neitucua, Fakarogona taha tatane isa ioria safi koutucua.

⁷Ma tiaha Atua kanatshicina ioria acre takaroiai niana tagata, pe acre tapa aia teau ma tupo, ma aia merino iacre?

⁸Avou koutucua iacoua aia kaioria acre takaroiai acre meloua. Kaia ia taha nopoge ta Nontariki o tagata komai, Aia kacitia fakarogrogo ia fanua wararonei mo?

⁹Ma aia nifasao tenei fakatagasia ia faru nifakarogrogo acre ana erefia, ma neitucua faruke iotshi isa;

¹⁰Erua tane niroro ia ta fare mori sore keimori; ta tasi Afarasi, ta sece fetacina mone o ta teriki.

¹¹Ta Farasi nikotu ma nimori ia aia ana, Atua avou thank akoi, pe avou jimra hepe foci tagata, acre amo lakamata sore, karasia tshigo fafine tsha faruke, mo hepe tenei tatane fetacina mone tsha teriki.

¹²Avou kopari akai fakerua nopoge o ta wik; Avou tufwa takavari o aneiotshi avou amo.

¹³Kaia ta tane fetacina mone tsha teriki, nokotu papai, ma sefakataraga tshaua foimata ia taragi, kaia niferpacia tshana fatfata, nokoutucua, Atua alofa iatavou tatane isa.

¹⁴Avou koutucua iacoua, tatane ra nifano tshaua fare erefia sore kagi aia ta foci, Ma iotshi tatane nagi aia iluga, kanagi aia iraro, kaia pe aia konofo iraro, kanage iluga.

¹⁵Ma niarafia iateia niare atamasisi, pe aia tofia acre; kaia niana fakou aia nifakairo neicitia anera, acre neisaceria acre.

¹⁶Kaia Iesu nitapa acre iateia, nokoutucua, Erefia arafia erecriki iatavou, ma seneitucuasana acre, ma o acre ko ta vaka o Atua.

¹⁷Tamari avou koutucua iacoua, Iotshi tagata sekamo tavaka o Atua hepe tentama sisi, aia sefano ia aia.

¹⁸Ma tasi teriki nifakowia aia, nokoutucua, Teriki erefia, taha avou kamna keiamo aneamouri taragi?

¹⁹Ma Iesu neitucua iateia, Tiaha Akoi tapa avou erefia? jimra tasi ko erefia, kaia tasi ana, aia Atua.

²⁰Akoi keiro ta Afasao tapu, setshigo fafine tsha faruke, Sekotaia mate tagata, Sekotshigo, Sekotamousa karefu ia faruke, Maganerefia ia tshou tamana, ma tshou nana.

²¹Ma aia neitucua, Ane iotshira avou maganerefia iateia ia nopoge avou tamasisi ma melou.

²²Ma wamuri Iesu neirogona ra, aia neitucage iateia, Tasi ane akoi seneimna; Fakamata ane iotshi akoi nakamo, ma terouiai ta fakamata ia tagata niare ane jimra, ma akoi nakamo outa ia taragi, ma komai muri iatavou.

²³Kaia wamuri aia neirogona afasao ra, tshana roto nimy sore, ma tshana outa sore su.

²⁴Ma Iesu nokoucitia aia neitucua, aia komukei iacre amo outa sore roro ia ta vaka o Atua.

²⁵Ma aia komeru pe ta kamela keifano ia foimata o ta suce, kaia aia komukei sore kagi pe tatane amo outa sore keifano ia tavaka o Atua.

²⁶Ma acre neirogona ra neitucua, Pecua ra akai kamo aneamouri atou ma tou?

²⁷Kaia aia neitucua anea mukei ia tagata ko meru ia Atua.

²⁸Pitrus neitucua, koucitia acime nifeke tshome tagata ma none ma roro wamuri akoi.

²⁹Ma aia neitucua iacre, Tamari avou koutucua iacoua, ko jimra tatane tasi nifeke tshana fare mo nanahune, mo anoso, mo ta mana ma nana, mo erecriki, ia tshana acitiafakarafia o tavaka o Atua,

³⁰Kaia katufwa aia nalupai su foci ia fanua wararonei, Ma ia fanua keimai anea mouri atou ma tou.

³¹Ma aia nitapa ta twelv iateia, ma neitucua iacre, Koucitia acitia roro iluga ia Jerasalem, Ma ane iotshi neiserea ia aprofeta kamai ia ta Nontariki o tagata.

³²Ma acre katufwa aia ia tagata o fanua pouri, ma acre kasoutari aia, ma kafakamana isa aia, ma kasovari ia aia;

³³Ma acre katshi aia ia atoura, ma kataia aia komate, ma ia ta nopoge toru wamuri aia kamasike foci.

³⁴Ma acre sekeiro nokano o ane otshi ra, ma nokano o tenei afasao mune, acre sekeiro taha aia neitucua.

³⁵Ane nei nimai, hepe aia nimai itata Jeriko, tasi tane foimata pouri kofu neinofa ia nontafa teretu neinogia akai ma.

³⁶Ma nokorogona tagata nalupai nokororo itata, aia nifakouia tiaha acre nokororo.

³⁷Ma acre neitucua iateia pe Iesu o Nasareth nokofano ia teretu.

³⁸Ma aia nitapa nokoutucua, Iesu akoi nontariki o Tevit alofa avou.

³⁹Acre niroro mokagi neisaciria aia, pe aia natshicina tshanafasao kaia aia nitapa fakapalo sore su, Akoi nontariki o Tevit alofa avou.

⁴⁰Ma Iesu nikotu, ma neitucua arafia aia iatavou, ma wamuri aia niarafia itata iateia, aia nifakouia aia.

⁴¹Taha akoi acitiafakarafia avou keimna iatakoi? Ma aia neitucua, Teriki pe avou kamo keicitia erefia.

⁴²Ma Iesu neitucua iateia, amo tshou foimata merama, tshou fakarogrogo keipare ma neimna akoi merama.

⁴³Ma meloua tshana foimata merama neicitia erefia, ma niroro wamuri aia, nokobisa ia Atua, ma iotshi tagata iai, neicitia ane ra nibisa ia Atua.