Read Futuna-Aniwa LUKUS, 19 Bible Online

LUKUS, 19 - Futuna-Aniwa bible

LUKUS, 19

²Ma neicitia tane tasi neitapa neigo Sakius, ma aia tasi teriki o acre nifetacina mone tsha teriki, ma tshana outa sore.

³Aia keremoa keicitia Iesu aia hepe akai, kaia aia secitia aia ma tagata nalupai nifori aia, ianenei tshana notshino potu.

⁴Ma aia nitere mokagi acre, ma nifitshi ia tasi terarakou tsharupe keicitia aia, ma aia nifano ia tera teretu.

⁵Ma inaia Iesu nimai ia ta none iai, aia nifakatariaga, ma neitucua iateia, Sakius komai iraro meloua; ma iranei avou konofo ia tshou fare.

⁶Ma aia meloua nifanifo, ma nibisa keiarafia aia.

⁷Kaia wamuri acre neicitia ane ra, acreiotshi nikogugu nokoutucua, Aia kofano konofo ia tatane isa.

⁸Ma Sakius nikotu, ma neitucua ia ta Teriki, Koucitia Teriki, ta nokoga o tshaku outa avou tufwa tagata niare ane jimra, ma pe avou amo faru ane safi tsha tatane tasi, avou katufwa aia ioria efa.

⁹Ma Iesu neitucua iateia, Iranei anea mouri komai ia tenei fare, ianenei aia ma ko tasi nontariki o Ebraham.

¹⁰Ma ta Nontariki o tagata nimai keisara ma keipare acre isa.

¹¹Ma hepe acre neirogona anera, aia foci nifasao tasi fakatagasia, ianenei aia itata Jerusalem, ma acre nimentua ia fenagarore pe ta vaka o Atua ko itata keicitia.

¹²Ianenei aia neitucua, Tasi tane sore nifano ia fanua papai keiamo iateia tasi ta vaka, ma kuafe.

¹³Ma aia nitapa tumtagahuru afetshicou tshana, ma neitufwa iacre tumtagahuru apount, ma neitucua iacre, fakamata anea mane ia amone ra ia taha nopoge avou kamai foci.

¹⁴Kaia tagata o tshana umrai nifeimacoua aia, ma nikowna faru wamuri aia, nokoutucua, Acime feimacoua tenei tane nofo teriki tshome.

¹⁵Ane nei nimai, wamuri aia nikuafe, wamuri aia niamo ta vaka, pe aia nifetacina acre afetshicou aia neitufa ta amone, pe aia nakeiro taha acreiotshi neimna foci ia nifakamata anea mone.

¹⁶Ma aia fakatasi nimai iateia, nokoutucua, Teriki, tshou pount neimna tumtagahuru pount foci.

¹⁷Ma aia neitucua iateia, Erefisa akoi fetshicou erefisa, ianenei akoi maganerefia ia sisi, avou emna akoi tereki o tumtagahuru umrai sore.

¹⁸Ma ta fakarua nimai, nokoutucua, Tshou pount, Teriki neimna erima pount.

¹⁹Ma aia neitucua ia aia foci, avou emna akoi foci teriki o erima umrai.

²⁰Ma tasi foci nimai, nokoutucua, Teriki koucitia icunei tshou pount, avou neinage aia nifousia ia ta hankirshif ma avou kumtacu akoi;

²¹Ianenei akoi tane roto mukei; akoi amke taha akoi senagi ma fetacina akai akoi sepopra.

²²Aia neitucua iateia, I afasao o tshou rogouta avou ioria akoi fetshicou isa. Akoi nikeiro avou tatane ia roto mukei, nokoamo taha avou senage, ma nokofetacina akai avou sepesia;

²³Ma tiaha akoi senage tshaku mone ia ta fare o mone, ma avou fano iai ma amo aia ia ioria?

²⁴Ma aia neitucua iacre nikotu etata, Amke ia aia ta pount ma tufwa aia ia aia nakamo tumtagahuru apount.

²⁵Ma acre neitucua iateia, Teriki, aia nakamo tumtagahuru apount.

²⁶Avou koutucua iacoua, pe ia iotshi nakamo katufwa; kaia ia aia seamo, taha aia amo kamke ia aia.

²⁷Kaia acre tagata feimacoua avou nofo niare teriki, arafia mai acre ma sawa acre mate mokagi avou.

²⁸Wamuri aia nifasao ra aia nifano mokagi acre ia Jerusalem.

²⁹Ane nei nimai, inaia aia nimai itata Bithpaj ma Bithany ia ta ora nitapa aia ta ora o Aoliv, aia nikouna erua o niana tagata aia nifakairo, nokoutucua,

³⁰Roro niaua teretu ia ta tumrai sisi ra, ia aia hepe akorua roro akorua kacitia tamasisi o ta as noutshia iai, ia tshana nopua jimra tane tasi neinofo mokagi, eivetea aia ma arafia aia icunei.

³¹Ma pe tatane tasi fakouia akorua, Tiaha akorua eivetea aia? akorua kafasao tenei, Ta Tereki keremoa aia.

³²Ma acrawa nikouna niroro ma neicitia hepe aia neitucua ia acrawa.

³³Ma hepe acrawa neivetea tamasisi o ta as, tagata aia niare neitucua iacre, Tiaha akorua eivetea tentama o ta as?

³⁴Ma acrawa neitucua Ta Teriki keremoa aia.

³⁵Ma acrawa niarafia aia ia Iesu; ma acre ferekia niare umega iluga ta as sisi ma neinage Iesu iluga aia.

³⁶Ma hepe aia nifano acre niferekea niare umega ia ta teretu.

³⁷Ma hepe aia nifano itata, ia ta fanifo o ta ora o Oliv, iotshi o niana tagata aia nifakairo neikamata keibisa ma nokobisa ia Atua ia anoeo palo ma iotshi avere sore acre neicitia;

³⁸Nokoutucua, Erefisa ta Teriki pe nokomai ia ta neigo o ta Teriki sore; merino ia taragi ma kabisa ia aia ta sore.

³⁹Ma faru o Afarasi ia tagata nifetacina iai neitucua iateia, Teriki neitucuasana tshou tagata akoi fakairo.

⁴⁰Ma aia nifasao neitucage iacre, Avou koutucua iacoua, pe acre sefasao, ta afatu katapa meloua.

⁴¹Ma wamuri aia nimai itata, aia neicitia ta tumrai sore ma nitagi ia aia.

⁴²Nokoutucua, Pe akoi nikeiro ia tenei tsou nopoge, keini akoi, anea mane tsha tshou merino! Kaia melou acre nimune ia tshou foimata.

⁴³Ma ta anopoge kamai iatakoi, pe tagata fiatu akoi, kamna tasi terua kofori akoi, ma kanofo kofori akoi, ma pofna iotshi niaua aretu.

⁴⁴Ma katouwaki akoi ia takere, ma niaua erecriki ia akoi, ma acre kanatshicina tasi fatu nofo iluga tasi foci fatu, ianenei akoi sekeiro ta nopoge o niaua arofa.

⁴⁵Ma aia nifano ia tafare mori sore, ma neikamate keitouwaki watafa acre nifakamata ma ioria ia aia.

⁴⁶Nokoutucua iacre, Aia neiserea, Tshaku fare katapa aia ta fare o ta mori, kaia acoua nakamna aia tafare o tagata tshigo.

⁴⁷Ma aia nifakairo nopoge ma nopoge ia ta fare mori sore. Kaia fatoriki o fakou tapu, ma acre serea tatapuria ma fakairo, ma fakou sore o tagata nifakasara keitakaroia aia;

⁴⁸Ma acre secitiamana taha acre emna, ma tagatotshi nofo mukei ma neirogona aia.