Read Futuna-Aniwa LUKUS, 2 Bible Online

LUKUS, 2 - Futuna-Aniwa bible

LUKUS, 2

¹ANE nei nimai i anopogera, fasao mukei o Sisar Acustus nifano iafanua iotshi, pe tagatotshi serea neigorea.

²Tenei ta fakatasi neiserea aneigo o tagatotshi i anopoge Sairinius nofo teriki o Syrea.

³Ma iotshi tagata niroro keiserea niare aneigo tasi ma sece ia tshana tumrai.

⁴Ma Josef nifeke Calili, ma ta tumrai o Nasareth, keifano ia Juteia, ia ta tumrai o Tevit, aia nitapa Bethlihim, ianenei aia o ta fare ma agafei o Tevit

⁵Keiserea neigo tshana ma tsha mery niavaga ia aia, nokofenai sore ia ta nuntama.

⁶Ane nei nimai, i anopoge acrawa neinofo iai, anopoge kurava mai aia farere ta tama.

⁷Ma aia nifarere tshana tourumatua nuntariki, ma nitakaia aia ia umege fousia wamuri nifarere, ma neinagi aia ia ta none nifakeina ahos iai, ianenei jimra rotopa tasi ia ta fare ia acre, aia nifonu.

⁸Ma ia fanua ra fakou nifatshigeia asip neinofo ia tupo ia tagarakou.

⁹Ma tasi agelo o Atua nikotu itata iacre, ma ta merama o ta Teriki nilama kofori acre, ma acre nimtacu sore.

¹⁰Ma ta agelo neitucua iacre, Sekumtacu acoua, ma koucitia avou amai iacoua, afasao erefia o sore kabisa iateia, katufwa aia ia tagatotshi,

¹¹Mo ko nifarere iacowa iranei ia ta tumrai o Tevit aia kapare ia anea mouri, aia ko Kristo ta Teriki sore.

¹²Tenei kafakairo acoua, kacitia ta tama nitakaia umega keifousia wamuri nifarere, ma nokomoy ia ta none nifakeina ahos iai.

¹³Ma meloua niromai iai ia ta agelo nalupai su o agelo o taragi nokofeke agora ia Atua ma nokoutucua,

¹⁴Kabisa sore ia Atua iluga, ma ia takere merino, ia tagata aia nibisa sore.

¹⁵Ma wamuri agelo nifeke acre niroro ia taragi, ta fakou nifatshigeia asip neitucua tasi ia tasi foci, erefia acitia kororo meloua ia Bethlihim ma koucitia tenei ane sore komai, o aia ta Ihova nifakairo acime.

¹⁶Ma acre niromai meloua, ma neicitia Mery ma Josef ma ta tama nokomoy ia ta none fakeina ahos iai.

¹⁷Ma wamuri acre neicitia aia, acre neitucua ia tagata afasao neitucua iacre o tenei tama.

¹⁸Ma iotshi nafakarogona aia nimasaro ia afasao neitucua iacre ia fakou fatshigeia asip.

¹⁹Kaia Mery nipurutshia afasao ra, ma nimentua acre ia tshana roto.

²⁰Ma fakou nifatshigeia asip nitafuri, nokobisa sore ia Atua ma ane iotshi acre nakarogona ma nakacitia, hepe aia neitucua iacre.

²¹Wamuri nopoge varu nisiri keisegeakage ta tama, tshana neigo nitapa Iesu, hepe ta agelo neitucua mokagi aia neinofo ia ta nonai.

²²Ma wamuri anopoge kurava keipenpena aia hepe ta fakairo o ta fasao tapu neiserea ia Moses, acrawa niarafia aia ia Jerusalem, keinage aia mokagi Atua;

²³(Hepe neiserea ia tafasao tapu o Ihova, Iotshi tatane tshiki ta nonai katapa aia tapu ia Ihova.

²⁴Ma keitufwa ta takavari hepe neiserea ia tafasao tapu o Ihova, erua afoitu, mo erua nuntama o afoitu.

²⁵Ma tasi tane neinofo ia Jerusalem nitapa neigo Simion; ma tenei tane neimna magane totonu ma tomatua tsha ta mori, nokotari ta nanacina erefisa o Isreil, ma ta Nokano Tapu neinofo ia aia.

²⁶Ma ta Nokano Tapu neitucua iateia, pe aia secitia ta mate mokagi aia nakacitia ta Kristo o Ihova.

²⁷Ma aia nimai ia ta Nokano ia ta fare more sore; ma inaia ta mana ma ta nana niarafia efare ta tama Iesu, keimagane iateia hepe ta magane o tafasao tapu,

²⁸Iai aia niarafia aia ia tshana arima, ma nibisa ia Atua, aia neitucua,

²⁹Ihova, melou erefia akoi arafia ia ta mate tshou fetshicou ia merino, hepe tshou afasao neitucua;

³⁰Ma tshaku foimata nakacitia tsou kapare.

³¹Aia akoi neimna erefia mokagi afoimata o tagatotshi;

³²Ta merama keitufwa tagata o iafanua pouri, ma ta sore erefisa o tshou tagata Isreil.

³³Ma Josef ma tshana nana nimasaro sore ia ane iotshi nifasao o aia.

³⁴Ma Saimion nifasao erefia iacrawa, ma neitucua ia Mery tshana nana, koucitia tenei tama konofo ma ta koto ma keitshicitoshia foci o nalupai tagata o Isreil, ma ia ane kofasosa iateia;

³⁵Keini, ma tasi tomatshira palo kataroa tshou nokano, pe afenagaro o nalupai aroto makoutucua.

³⁶Ma nokonofo iai tasi fine neigo Ana, tasi fine profeta, tasi nofine o Fenuil, o ta nofoga o Ashir, aia fine ituai, ma neinofo ia tshana nonwani fitu atou wamuri niavaga aia;

³⁷Ma aia fine nofo ana tshana nonwani nimate ety four atou, aia sefeke tafare more sori, kaio nokomori ma nokopari nokovere ia Atua tupo ma tiau.

³⁸Ma aia nokomai ia our tera, neitufwa athank ia Atua, ma nifasao o aia ia acre iotshi nokosara ta kapare ia Jerusalem.

³⁹Ma wamuri acre neimna ane iotshi hepe ta fakairo o tafasao tapu o Ihova, acratou nitafuri ia niare tumrai o Nasareth.

⁴⁰Ma ta nuntama nisomo sore, ma tomatua ia nokano nifonu ia arapokou, ma ta karofa o Atua, neinofo ia aia.

⁴¹Ma tshana tamana ma nana niroro atou iotshi ia Jerusalem ia ta tacripoga o ta paska.

⁴²Ma wamuri aia neinofo wararonei atou twelv acratou niroro iluga ia Jerusalem hepe ta magane o ta tagripoga.

⁴³Ma wamuri anopoge o ta tacripoga kurava, hepe acrawa kuafe ta tumtane Iesu neinofo ia Jerusalem, ma Josef, ma tshana nana sekeiro.

⁴⁴Kaia acrawa nimentua pe aia ia tagata nokuafe niroro ia taretu tasi nopoge, acrawa nisarasara aia ia niaru tagata.

⁴⁵Ma wamuri acrawa secitiamana aia, acrawa nikuafe ia Jerusalem nokofatshigeia aia.

⁴⁶Ma ane nei nimai, wamuri anopoge toru acrawa neicitia aia ia tafare mori sore, nokonofo ia aroto o ta sore fakou o ta fakairo, nokorogona acre, ma nokofakowia acre anea.

⁴⁷Ma iotshi nifakarogona aia nimasaro sore ia tshana arapakou, ma afasao.

⁴⁸Ma wamuri acrawa neicitia aia acrawa nimasaro, ma tshana nana neitucua iateia, Tucutariki tiaha akoi imna magane nei ia acimaua? koucitia tamana ma avou nakasara akoi nokotagi.

⁴⁹Ma aia neitucua ia acrawa, Tiaha akorua nifatshigeia avou? sekeiromana akorua pe avou emna avere o tshaku Tata?

⁵⁰Acrawa sekeiromana nokano o afasaora aia neitucua ia acrawa.

⁵¹Ma aia nifanifo ia acrawa ia Nasareth, ma aia nimaganerefia i afasao o acrawa; kaia tshana nana nipurutshia iotshi afasao ra ia tshana roto.

⁵²Ma Iesu nisomo ia arapakou, ma palo, ma i acitiafakarafia o Atua, ma o tagata.