Read Futuna-Aniwa LUKUS, 21 Bible Online

LUKUS, 21 - Futuna-Aniwa bible

LUKUS, 21

¹MA aia nifakatariaga, ma neicitia acre fakou niare outa sore keinagi niare mone takavari ia ta tupurerakou o mone.

²Ma aia neicitia tasi fine nofo ana tshana nonwane nimate neinagi iai erua mone sisi.

³Ma aia neitucua, Tamari avou koutucua iacoua, Tenei fine tshana outa jimra, ma tshona nonwane nimate, neinagi sore kage acre iotshi.

⁴Ma acre iotshi o niare outa nalupai neinage faru niare amone takavari neitufwa ia Atua, kaia aia ia tshana outa jimra neinagi iotshi tshana mone, hepe iotshi tshana akoi.

⁵¶ Ma hepe faru nifasao o tafare mori sore, pe aia erefisa ia afatu sore erefisa ma ia anea takavari, aia neitucua,

⁶Ane iotshi ra acoua koucitia, anopoge kamai, ia acre jimra tasi tafatu kanofo iluga tasi foci, pe jimra sekatouwaki iraro.

⁷Ma acre nifakouia aia, nokoutucua, Teriki fakairo inaia ane iotshi ra kamai? Ma taha kacitia ia taha nopoge ane otshi ra itata nokomai?

⁸Ma aia neitucua, Fatshigeia pe tagata sekarasia acoua; ma nalupai komai ia tshaku neigo, nokoutucua, Avon aia, ma ta nopoge ko itata seroro acoua wamuri acre.

⁹Ma taha nopoge acoua fakarogona o atoua ma afiatu, sekumtacu acoua, ma ane iotshira komai mokagi, kaia ta nopoge wamuri sekomai meloua.

¹⁰Wamurira aia neitucua iacre, Nofoga tagata kamasike fiatu nofoga, ma tavaka fiatu tavaka;

¹¹Ma amahuke sore kamai, ma ia afanua nalupai akai o tagata kabune, ma amace isa sore, ma anea emna tagata kumtacu sore, ma anea sore neicitia ia taragi.

¹²Kaia mokagi ane iotshira, acre kapurutshia acoua, ma kasewa acoua, ma katufwa acoua ia acre o afare mori, ma afare mukei, nokotorotshia acoua mokagi fatoriki ma fakou sore i niare feimacoua o acoua acitiafakarafia avou.

¹³Ma anera katafuri iacoua keifakairo acre.

¹⁴Ianenei nagi mukei tenei ia arotoua, jimra keimentua mokag taha katucua iacre;

¹⁵Ma avou katufwa iacoua afasao ma arapakou, aia iotshi tagata feimacoua acoua kotaru ioria ma fiatu.

¹⁶Kaia acoua kafakareresia ia tamou ma nou, ma ia anoso, ma ia anele, ma ia niaua tagata, ma faru acona acre tshi keimate.

¹⁷Ma tagatotshi kafeimacoua acoua ia niaua acitiafakarafia o tshaku neigo.

¹⁸Ma jimra tasi foiuru o niaua nouru kakotu.

¹⁹Ia niaua merino acoua kapurutshia nokopare niaua anokano.

²⁰Ma ia nopoge acoua kacitia tagata o tatoua nokofori Jerusalem ia ta nopogera keiro tshana takaroiai sore ko itata.

²¹Ia tera nopoge erefia acre nofo ia Juteia fura ia aora, ma erefia acre konofo ia aroto o aia feke watafa, ma erefia acre nofo ia fanua kofori seroro ia aia.

²²Ma anopogera kai ioria acre, pe aneiotshi neisereace kamai hepra neiserea.

²³Kaia kawe iacre foinai ma iacre tufwa tentama kumea tou ia anopogera! Ma sore amy komai ma nofo iafanua, ma sore fakainina ia tenei tagata.

²⁴Ma kasawa acre koto ia nonemtakai o tomatshira palo, ma katarotshia acre i afanua iotshi papai; ma Jerusalem katakumea iraro ia fakou o iafanua pouri, ia anopoge o tagata o iafanua pouri kurava.

²⁵Ma iai kamai anea sore kacitia ia tara, ma ia tumrama, ma ia afatú, ma ia iafanua kamy sore ia arotorea o avaka, ma kamtacu sore su, ia ta nokovaro o tatai, ma apiau.

²⁶Fakou nokomatese ia kumtacu, ma ia fenagaro nokoucitia anea mane nokomai ia tagata o iafanua, ma atomatua o ta ataragi kavirviri,

²⁷Ma ia taha nopoge ra acre kacitia ta Nontariki o tagata nokomai ia ta apa ia tomatua, ma kosore noneate.

²⁸Ma ia taha nopoge ane iotshira neikamata kamai, fakatareaga, ma tshicitshia iluga niaua anouru, ianei niaua ioria kapare ko itata.

²⁹Ma aia nifasao iacre tasi fakatagasia, Koucitia ta tsharupe ma iotshi tererakou;

³⁰Ia taha nopoge acre kotuptupu ma nofateke, acoua koucitia acre ma keiro anopoge erefia iateia ko iata.

³¹Hepa ma, ia nopoge acoua kacitia anera nokomai, keiro acoua pe ta vaka o Atua ko itata.

³²Tamari avou koutucua iacoua, Tagata fatupunei melounei seroro ia mate mokagi ane iotshi ra komai.

³³Taragi ma iafanua wararonei karoroce; kaia tshaku fasao seroroce.

³⁴¶ Kaia fatshigeia niaua magane, pe niaua aroto semy ia akai sore, ma avai kona, ma ia anea mane sore o fanua nei, ma ta nopoge ra komai mokagi acoua kopenpena iateia.

³⁵Ma hepe ta tasi meloua ta nopoge ra kamai ia tagatshi pe konofo i afanua wararonei.

³⁶Kaia fatshigeia acoua nopoge ma nopoge, ma segapu nokomori pe acoua kapare ane iotshi ra kamai, ma keikotu mokagi ta Nontariki o tagata.

³⁷Ma ia tiau o nopoge iotshi aia nifakairo ia ta fare mori sore, ma ia tupo iotshi aia nifano watafa ma neinofo ia ta ora neitapa aia ta ora o Olivi.

³⁸Ma iotshi tagata nimai iateia ia tapopo ana ia tafare mori sore keirogona aia.