Read Futuna-Aniwa LUKUS, 22 Bible Online

LUKUS, 22 - Futuna-Aniwa bible

LUKUS, 22

¹I ANOPOGE ra ta tacripoga o bret ist jimra i aia ko itata, ko tapa aia ta Paska.

²Ma fakou tapu o tafare mori ma fakou serea ma fakairo tatapuria nifatshigeia pe acre keitshi aia keimate; kaia acre nimtacu tagata.

³Ma Satana nifano ia ta roto o Jutas nitapa tatane o Kariot, aia tasi o ta twelv.

⁴Ma aia nifano ma nifasao ia fakou tapu sore ma fakou sore o tagata, pe aia tufwa ia kareresia aia iacre.

⁵Ma acre nibisa ma neitucua mukei aia keitufwa aia ioria o mone iateia.

⁶Ma aia neitucua iacre erefia, ma aia nifatshigeia pe aia keitufwa aia iacre ianaia tagata nifetacina iateia jimra.

⁷¶ Iai nimai ta nopoge o tacripoga o bret leven jimra ia aia, ia nopoge tera acre ta paska neitshi mate ia takavari.

⁸Ma aia nikouna Pitrus ma Joanes, nokoutucua, Roro ma penpena iacitia ta paska, pe acitia makeina.

⁹Ma acrawa neitucua iateia. Wehe akoi acitiafakarafia acimaua penpena aia?

¹⁰Ma aia neitucua iacraua, Koucitia wamuri akorua roro ta umrai sore, iai akorua kafapa tasi tane, aia amoga tasi taganea o tavai, ma ia ta fare aia fano roro wamuri aia.

¹¹Ma akorua katucua ia tatane sore o ta fare ra, Ta Teriki koutucua iatakoi, Wehe arotopa o tafare, ia aia avou kakeina ta paska ia tshaku tagata avou fakairo?

¹²Ma aia karafia akorua ia tasi arotopa sore iluga neipenpena iateia; penpena ta paska ia aia.

¹³Ma acraua niroro, ma neicitia iotshi hepe aia neitucua iacraua; ma acroua neipenpena ta paska.

¹⁴Ma inaia ta our nimai, aia neinofo, ma ta twelv apostolo ia aia.

¹⁵Ma aia neitucua iacre, ia keremoa avou keremoa keina tenei paska ia acoua mokagi avou katshice;

¹⁶Ma avou koutucua iacoua, avou sekeina foci o aia ia taha nopoge aia kurava ia tavaka o Atua.

¹⁷Ma aia niamo ta kup, Ma wamuri aia nimori, aia neitucua, Amo tenei ma terouiai tenei ia acoua,

¹⁸Ma avou koutucua iacoua, Avou senumea foci o ta vai o avaini ia taha nopoge ta vaka o Atua kamai.

¹⁹¶ Ma aia niamo bret, ma wamuri aia nimori, aia eifasia aia, ma neitufwa iacre, nokoutucua, Tenei ko tshaku notshino, aia ko eifasia iacouia; tenei acoua emna keimentua avou.

²⁰Ma foci ta kup hepra wamuri akai fiafi, nokoutucua, Tenei kup ko ta fou rakamna morea o tafasao erefia ia tshaku toto, aia komerigi ma acoua.

²¹Kaia koucitia, ta norima o aia pe kofakareresia avou ko ia avou ia ta fata.

²²Ma ta mari ta Nontariki o tagata kofano, hepe mokagi neitucua o aia, kaia kawe ia tatane ra kofakareresia aia.

²³Ma acre neikamata keifakowia acre tasi ma foci, akai o acre emna ane nei.

²⁴¶ Ma acre nifiatu i acre, akai o acre kanofo ta sore su.

²⁵Kaia aia neitucua iacre, Fatoriki o tagata o fanua pouri imna magane o niare fatoriki, ma acre nofo sore o acre nitapa karofa acre.

²⁶Kaia acoua sekamagane hepra; kaia erefia aia ko sore su o acoua, erefia aia konofo hepe ta murioufi, ma aia ko teriki, hepe aia pe vere o afetshicou.

²⁷Ma akai kosore, aia konofo ia akai mo aia pe kovere o afitshicou? ko aia konofo akai mo? kaia avou nokonofo ia acoua hepe aia kovere o ta fetshicou.

²⁸Kaia acoua acre neinofo ia avou ia tshaku akarasia.

²⁹Ma avou nagi iacoua tasi tavaka, hepe tshaku Tata nakatufwa iatavou.

³⁰Pe acoua kakeina ma numea ia avou ia tshaku tafata ia tshaku tavaka; ma kanofo ia athron nokoutucua ioria o tagata o ta twelv afoga o Isreil.

³¹¶ Ma ta Teriki neitucua, Saimona, Saimona, Koucitia, Satana nikeiremoa keiamo akoi pe aia ruruia akoi hepe awit;

³²Kaia avou nimori pe tshou fakarogrogo sefeke akoi, ma vere akoi, wamuri akoi kotafuri foci keisitu emna tshou anoso tomatua.

³³Ma aia neitucua iateia, Teriki ia akoi avou kofekana meloua keifano ia tafare muke, ma ia tamate.

³⁴Ma aia neitucua, avou koutucua iatakoi, Pitrus, tatane moa sekoko tenei nopoge, mokagi akoi fakatoru kavatea akoi puspusi avou.

³⁵Ma aia neitucua iacre, Ia nopogera avou nikowna acoua, ma acoua seamo akato o mone, mo akai, mo ashu, niaua anea jimra mo? ma acre neitucua, jimra.

³⁶Ma aia neitucua iacre, aia pe tshaha kata o mone nofo, erefia aia amo aia, ma foci akato o akai, ma aia pe tshana tomatshira palo jimra, erefia aia fakamata tasi ia tshna mega iluga.

³⁷Ma avou koutucua iacoua, pe tenei koserea komai ia avou, ma acre taua aia ia tagata nimaganisa, ma pe ane iotshi neiserea o avou ko itata kurava.

³⁸Ma acre neitucua iateia Teriki koucitia ko erua tomatshira palo, ma aia neitucua iacre, Acrawa nalupai.

³⁹¶ Ma aia nimai watafa ma nifano, hepe tshana magane anopoge ia ta ora o Aoliv, ma tshana tagata aia nifakairo niroro wamuri aia.

⁴⁰Ma wamuri aia nimai ia ta none, aia neitucua iacre, Mori acoua pe acoua seroro ia karasia.

⁴¹Ma aia nifeke iacre hepe ia none tshiria tasi fatu iai, ma aia nifakaturi unturi iai ma nimori.

⁴²Tata pe tshou fenagaro mugaro iateia, amke tenei kup ia avou; kaia jimra taha avou acitiafakarafia, kaia hepe akoi keremoa.

⁴³Iai aia neicitia ta agelo o taragi nokotufwa aia tomatua.

⁴⁴Ma tshana roto nimy sore su, aia nimori fakamukei, ma tshana kavakava nimai hepe sore aturu o toto nikoto ia takere.

⁴⁵Ma wamuri aia nimasike ia tshana mori kurava, aia nimai ia tagata aia nifakairo, ma neicitia acre nokomero ia arotorea nimy.

⁴⁶Ma neitucua iacre, Tiaha acoua mero? Masike Ma Mori, pe acoua seroro ia ia karasia.

⁴⁷¶ Ma hepe aia nifasao ra, neicitia, tagata nalupai, ma aia nitapa neigo Jutas, tasi o ta twelv nifano mokagi acre, ma aia nimai itata Iesu keisogi aia.

⁴⁸

⁴⁹Iai acre nifori aia neicitia taha nokomai wamurira, acre neitucua, Teriki acime kasawa acre ia tomatshira palo?

⁵⁰¶ Ma tasi o acre nisawa ta fetshicou o teriki tapu sore, ma nisawace tshana terega matou.

⁵¹Kaia Iesu nifasao ma neitucua, Natshicina acoua. Ma aia nitofia tshana nontarega ma penpena aia erefia.

⁵²Ma Iesu neitucua ia fatoriki tapu, ma fatoriki o tafare mori ma fakou sore nimai keipurutshia aia, Tiaha acoua koromai hepe keipurutshia tatane tshigo, ia atomatshira palo ma atokotoko?

⁵³I anopoge avou neinofo iacoua ia ta sore tafare mori, acoua sepurutshia avou ia aremori, kaia tenei niaua our, ma ta tomatua o apouri.

⁵⁴¶ Ma acre nipurutshia aia, ma niarafia aia ia ta fare o ta sore tatane tapu. Kaia Pitrus nimai wamuri aia papai su.

⁵⁵Ma wamuri acre nitafuna tiafi ia aroto o ta retu sore o tafare, ma nifetacina neinofo iateia, Pitrus neinofo ia aroto o acre.

⁵⁶Ma tasi fine sisi neicitia aia hepe aia neinofo ia ta merama o ta tiafi, ma nokoucitia ia aia mukei, neitucua tenei tane ma tasi o acre nofo ia aia.

⁵⁷Kaia aia neivetea, nokoutucua, Fafine avou sekeiro aia.

⁵⁸Ma wamurira sisi, tasi foci neicitia aia ma neitucua, Akoi ma tasi o acre. Kaia Pitrus neitucua, Tatane avou jimra.

⁵⁹Ma wamuri tasi our nisiri tasi foci neitucua mukei, nokoutucua, Tamari tenei tane neinofo ia aia; ma aia tasi tatane o Calili.

⁶⁰Kaia Pitrus neitucua Tane avou sekeiro taha akoi koutucua, ma meloua hepe aia nifasao tamoa nikoko.

⁶¹Ma ta Teriki sirasira Pitrus. Ma Pitrus nimentua ta fasao o ta Teriki, pe aia neitucua iateia, Mokagi ta moa koko tenei nopoge, akoi kavetea avou fakatoru.

⁶²Ma aia nifano efuafo ma nitagi sore su.

⁶³¶ Ma fakou nepurutshia Iesu nifakamana aia, ma niferpacia aia.

⁶⁴Ma acre nifousia tumega kofori nipofna tshana foimata, ma nifakouia aia, nikoutucua, koutucua hepe aprofeta, akai neitshi akoi?

⁶⁵Ma i anea foci nalupa acre nifasosa o aia, nifakamana isa aia.

⁶⁶Ma hepe merama o ta popo nimai, nifetacina fakou sore o tagata, ma fatoriki o tafare mori, ma fakou serea ma fakairo tatapuria, ma acre niarafia aia ia niare fare o afasao, nokoutucua,

⁶⁷Pe akoi ta Kristo koutucua acime? kaia aia neitucua, pe avou koutucua iacoua sefakarogrogo;

⁶⁸Ma pe avou koutucua acoua, acoua sefasao.

⁶⁹Kaia iotshi atou wamuri nei ta Nontariki o tagata kanofo ia norima matou o tomatoa o Atua.

⁷⁰Ma acre iotshi neitucua, Akoi ta Nontariki o Atua mo jimra? Ma aia neitucua iacre, Acoua koutucua pe avou aia.

⁷¹Ma acre neitucua, Tiaha acime fatshigeia faru foci tagata nokotamou o aia? Ma acime nifakarogona tshana fasao.