Read Futuna-Aniwa LUKUS, 23 Bible Online

LUKUS, 23 - Futuna-Aniwa bible

LUKUS, 23

¹MA acre iotshi nifetacina nimasike, ma niarafia aia ia Pailet.

²Ma acre neikamata keifasosa iateia, nokoutucua, acime neicitia tatane nei nikarasia tagata o niome fanua, ma neitucuasana tagata keitufwa amone ia Sisar, nokoutucua pe aia Ko Kristo tasi Teriki.

³Ma Pailet nifakouia aia, nokoutucua, Akoi ta Teriki o tagata o Juteia mo jimra? Ma aia nifasao ia aia ma neitucua, Akoi koutucua aia.

⁴Ma Pailet neitucua ia ta sore fatoriki tapu ma tagata fetacina iai, avou secitiamana mogane safii ia tenei tane.

⁵Kaia acre nifasao sore su, nokoutucua, aia karasia tagata, nokofakairo tagata ia iotshi fanua o Juteia, ma neikamata ia Calili ma komai ia tenei none.

⁶Kaia wamuri Pailet neirogono afasao ra, aia nifakowia acre pe aia, tatane o Calili mo?

⁷Ma wamuri aia neirogona pe aia tatane o tafanua o Herot, aia nikouna aia ia Herot, ma aia neinofo ia Jerusalem i anopoge ra.

⁸¶ Ma Herot nibisa keicitia Iesu, ianenei aia keremoa keicitia aia anopoge ituai, ianenei aia neirogona anea nalupai o aia, ma aia keremoa keicitia ane tasi sore neimna ia aia.

⁹Ma aia nifakowia aia ia afasao o ane nalupai, kaia Iesu sefasao iateia.

¹⁰Ma ta sore fatoriki tapu ma fakou serea tatapuria kotu ma fasosa mukei o aia.

¹¹Herot ma niana tagata o tatowa nifakamana aia, ma nitaka aia ia tumega erefisa, ma nikouna aia foci ia Pailet.

¹²Ma Herot ma Pailet alofa hepe aneli ia tera nopoge, ma mokagi ra acrawa feimacua tasi ma tasi foci o acrawa.

¹³¶ Ma pailet nifetacina fatoriki tapu o tafare sore mori ma fakou sore o tagata,

¹⁴Ma neitucua iacre, acoua niarafia iatovou tenei tane, hepe tasi karasia tagata; ma koucitia, avou nakofakouia aia o anera, mokagi acoua, ma secitiamana ane isa ia tane nei o acreiotshi ane acoua neitucua o aia;

¹⁵Foci Herot secitiamana ane isa ia aia, ma aia nikouna aia foci iacime, ma koucitia aia seneima ane tasi kiioria ia ta mate.

¹⁶Ianenei avou katshi aia, ma eivetea aia.

¹⁷Ma aia neivetea iacre ia tacripoga tera tasi tane nifousia ia tafare mukei.

¹⁸Kaia acre iotshi nitapa palo, nokoutucua, Touwaki tenei tane, ma eivetea iacime Barabas;

¹⁹Aia tasi ia fiatu ia ta umrai, ma nitaia mate, acre nitouwaki aia ia tafere mukei,

²⁰Ma Pailet nifasao iacre foci, nokerimoa keivetea Iesu.

²¹Kaia acre nikavaro nokoutucua, Tucia, tucia aia, ia tererakou fakaravasia.

²²Ma aia neitucua acre fakatoru, Tiaha, taha magane isa aia neimna? Avou secitiamana ane tasi ia aia keitaia aia mate iateia; ianenei avou katshi aia ia toura ma eivetea aia.

²³Kaia meloua acre nitapa ia anoreo palo, nikofakowia pe katucia aia ia tererakou fakaravasia. Ma niare anoreo ma anoreo o fatoriki tapu nitomatua iateia.

²⁴Ma Pailet neitucua pe taha acre nifakowia nakamna.

²⁵Ma aia neivetea aia neiteuwaki ia tafare mukei ioria niana fiatu ma nitaia mate, aia acre nifakowia; kaia Iesu aia neitufwa iacre hepe acre nifakowia.

²⁶Ma hepe acre niarafia aia watafa acre nipurutshia tasi Saimone o Sairini aia nokomai ia tagarakou. ma acre neinagi ia aia ta fakaravasia keiamoga aia wamuri Iesu.

²⁷¶ Ma niroro wamuri aia tagata nalupai su, ma o fafine acre nitagi ma nimakuru aia.

²⁸Kaia Iesu nitafuri iacre ma neitucua, anofine o Jerusalem setagi ia avou, koia tagi ia acoua ma niaua erecriki.

²⁹Ma kacitia anopoge nokomai, ia acre tagata katucua erefisa kagi afine kopo, ma acre afine sefarere, ma anou sekumea tou.

³⁰I anopogera acre neikamata keituoua ia aora, Koto ia acime, ma ia aora sisi, Tumea acime.

³¹Ma pe acre imna aneara ia terarakou wiwi, taha acre kamna ia ta meru?

³²Ma iai erua faci fakou nimaganisa acre niarafia ia aia keimna komati.

³³Ma wamuri acre nimai ia ta none nitapa aia Kalvery, iai acre neitucia aia ia tererakau fakaravasia, ma ta erua tagata nimganisa, tasi ia tshana norima matou, ma tasi ia ta norima masui.

³⁴¶ Ma Iesu neitucua, Tata touwaki nori niare maganisa, ma acre sekero taha acre emna.

³⁵Ma nitorou iai niana amega iacre, acre neimna aloti iateia, Ma tagata nikotu nokoucitia, ma fatoriki nifakamana ia aia, nokoutucua, Aia nipare afaruke, erefia aia kopare aia, pe tenei ta Kristo o Atua, tshana acitiafakarafia.

³⁶Ma fakou o tatoua foci nifakamana aia, nokomai iateia ma nikavatu aia venecer, ma nokoutucua,

³⁷Pe akoi ta Tereki o tagata o Juteia kapare akoi.

³⁸Ma iai tatapuria neinage iluga tshana nouru, TENEI TA TERIKI O TAGATA O JUTEIA.

³⁹¶ Ma tasi o acrawa tatane isa neitucua ia tererakou fakaravasia nifasosa ia aia, nokoutucua, Akoi ta Kristo mo? kapare akoi ma acimaua.

⁴⁰Kaia ta foci neisaciria aia nokoutucua, Tiaha akoi sekumtacu Atua, nokoucitia akoi nofo ia ta ioria hepera?

⁴¹Ma ioria tshamaua totonu o magane tshamaua, kaia tenei tane semaganisa.

⁴²Ma aia neitucua Iesu, mentua avou ia taha nopoge akoi komai ia tshou vaka.

⁴³Ma aia neitucua iateia, Tamari avou koutucua iatakoi, Iranei akoi kanofo ia avou ia Paradis.

⁴⁴Ma itata ta our seks nimai, ta pouri tasi nimai iai nofo iafanua iotshi ma neinofo ia ta our nein.

⁴⁵Te merama o tara jemra, ma ta mega touria pofna ia tafare mori sore neifasia ia aroto.

⁴⁶¶ Ma wamuri Iesu nitapa ia noreo palo, aia neitucua, Tata ia tshou arima avou tufwa tshaku nokano, ma wamuri aia neitucua afasao ra, aia neitufwa iluga ta nokano.

⁴⁷Ma wamuri ta Senturio neicitia taha neimna, aia nibisa ia Atua, nokoutucua, Tamari tane nei nimagane totonu.

⁴⁸Ma iotshi tagata nifetacina keicitia tenei, wamuri acre neicitia anea mane neimna, nitafuri nokotucia niare afatfata.

⁴⁹Ma iotshi tagata nikeiro aia, ma afine niroro wamuri nifeke fanua Calili, nikotu papai, nokoucitia ane iotshi ra.

⁵⁰¶ Ma tasi tane neigo nitapa Josef, aia tasi o fatoriki, tatane erefia ma magane totonu;

⁵¹Aia sekoutucua erefia magane o acre sore ia tshi komate Iesu, Aia tatane o Arimathia, tasi tumrai sore o tagata o Juteia, ma aia nikosara ta nokomai o ta vaka o Atua.

⁵²Tenei tane nifano ia Pailet ma neinogeia keitufwa aia ta noaga o Iesu.

⁵³Ma aia niamweifo aia, ma nitakaia aia ia ta tumega o lenen, ma neinage aia ia tasi tupunaga nisawa ia tase fatu sore, ia aia setanumea tasi tatane mokagi ra.

⁵⁴Ma aia ta nopoge o penpena ane iotshi, ma ta nopoge tapu koitata.

⁵⁵Ma afine nimai wamuri aia ia fanua Calili, niroro wamuri, ma neicitia ta tupunaga, ma neicitia acre neinagi tshana notshino iai.

⁵⁶Ma acre nitafuri, ma neipenpena ane namu erefisa ma avai iamosia, ma ia ta nopoge tapu acre nigapu hepe afakairo tatapuria tapu.