Read Futuna-Aniwa LUKUS, 24 Bible Online

LUKUS, 24 - Futuna-Aniwa bible

LUKUS, 24

¹KAIA ia ta nopoge fakatasi o ta wik, ia ta popo ana, acre nimai ia ta tupunaga, niamomai anea neinamu acre neipenpena, ma faru foci ia acre.

²Ma acre neicitia ta fatu nifurusiace ia ta tupunaga.

³Ma acre niroro ia aia ma secitiamana ta notshino o ta Teriki Iesu,

⁴Ane nei nimai, arotorea nimy ma nimasaro, acre neicitia erua atane nikotu itata acre, nitaka ia noneate umega;

⁵Ma hepe acre nimtacu ma nimori foimatorea ia takere, acrawa neitucua iacre, Tiaha acoua fakasara aia komouri ia acre nimate?

⁶Aia ko jimra ecunei, aia komasike, mentua tshana fasao iacoua ia ta nopoge aia neinofo iacoua ia Calili,

⁷Nokoutucua pe ta Nontariki o tagata nakatufwa ia anorima o tagata isa, ma tucia ia tererakou fakaravasia, ma ia nopoge fakatoru masike foci.

⁸Ma acre nimentua tshanafasao.

⁹Ma nitafuri ia tupunaga, ma neitucua ane iotshi ra ia ta eleven tagata iai nifakairo, ma ia iotshi tagata.

¹⁰Ma acre Mery Mactalini, ma Joana, ma Mery ta nana o Jemes, ma faru foci afine ia acre neitucua ane iotshira ia ta apostolo.

¹¹Ma acre neirogona afasao ra hepe afasao ane, ma acre sefakarogrogo acre hepe tamari.

¹²Kai Pitrus nimasike ma nitere ia ta tupunaga ma nimomoi ma nokosarasara watakoro, aia neicita umega lenen nofo ana, ma aia nifeke ia tshana fare, nokomasaro ia anea nimai.

¹³¶ Ma erua o acre niroro ia tera nopoge ia tumrai tasi neigo Emeus aia nofo etata seven meil papa ia Jerusalem.

¹⁴Ma acrawa nifasao o ane iotshi nimai.

¹⁵Ma ane nei nimai, hepe acrawa nifasao ma nifakouia ia acrawa, pe Iesu aia nimai ia acrawa, ma nifano ia acrawa.

¹⁶Kaia foimatarawa secitia erefia pe acrawa sekeiro aia.

¹⁷Ma aia neitucua iacrawa, Taha afasao ra akorua nakatucua ia akorua, hepe akorua roro? Ma hepe arotaua tagi.

¹⁸Ma tasi o acrawa neigo kleopas nokofasao ma neitucua iateia, konapecua akoi ana nofo ia Jerusalem ma sekeiro anea nimai iai ia anopoge ra?

¹⁹Ma aia neitucua iacrawa. Taha anea? Ma acrawa neitucua iateia, anea o Jesu o Nasareth, aia ta profeta tomatua sore ia avere ma afasao mokagi Atua ma tagatotshi;

²⁰Ma ta magane o ta fatoriki tapu ma fatoriki o tagata neitufwa aia keitaia aia ia ta mate, ma keitucia aia ia terarakou fakaravasia.

²¹Kaia acime neinanacina pe aia nimai neipare tagata o Israel. Keini ma wamuri ane iotshi ra, iranei nopoge toru wamuri anea iotshi ra neimna.

²²Ma faru afene o acime neimna acime keimasaro, ia ta popo ana acre niroro ia ta tupunaga;

²³Ma wamnri acre secitiamana tshana notshino acre nimai nokoutucua pe acre neicitia faru agelo ma acre neitucua aia komouri.

²⁴Ma faru o acre neinofo ia acime niroro ia ta tupunaga, ma neicitia iotshi hepe afine neitucua, kaia acre secitiamana aia.

²⁵Ma aia neitucua iacrawa, Kai fakou koukali, ma taru ia arotoua keifakarogrogo ia ane iotshi aprofeta nakafasao.

²⁶Erefia mo jimra pe ta Kristo nimy ia aneiotshi ra, ma keifano ia ta sore tshana?

²⁷Ma aia neikamata ia Moses ma ia iotshi aprofeta wamuri, aia nifakairo acrawa nokano o ane iotshi neiserea ia tatapuria tapu o aia.

²⁸Ma acratou niroro itata ta tumra acre niroro ia aia, ma aia hepe aia nokofano ia tasi foci.

²⁹Ma acrawa nifakowia aia mukei, nokoutucua, konofo ia acimawa; ma aia koiteta fiafi, ma ta nopoge koitata kurava. Ma aia nifano efare keinofo ia acrawa.

³⁰Ma ane nei nimai, aia neinofo ia acrawa ia akai, aia niamo ta bret, ma nimori iateia, ma eifasia ma neitufwa aia ia acrawa.

³¹Ma foimatarawa nitshiki, ma acrowa nikeiro aia, ma aia nifura foimatarawa secitiamana aia.

³²Ma tasi neitucua ia ta tasi foci, konapecua tshamawa aroto nikoura ia acimawa mo, inaia aia nifasao ia acimawa ia taretu, ma hepe aia nifakairo acimawa nokano o ta fasao tapu hepe aia neiserea?

³³Ma acrawa nimasike ia tera our, ma nikuafe ia Jerusalem, ma neicitia ta eleven nifetacina ia none tasi, ma iotshi o acre neinofo ia acre.

³⁴Nokoutucua, Ta Teriki ko nimasike tamari, ma Saimona nakacitia aia.

³⁵Ma acrawa neitucua anea nimai ia ta teretu, ma ia ta eifasia o aofa acrawa nikeiro aia.

³⁶¶ Ma hepe acrawa nifasao ane iotshi ra, aia nikotu ia aroto o acre, ma neitucua iacre, merino konofa iacoua.

³⁷Kaia acre nimtacu sore su, ma mentua acre neicitia tasi nokano.

³⁸Ma aia neitucua iacre, Tiaha acoua kumtacu? Ma tiaha afasao o fenagaroua konoce ia arotoua?

³⁹Koucitia tshaku arima ma tshaku avai, pe aia ko avou ana; purutshia avou, ma koucitia, ma tasi nokano, seamo konouri ma aneivi acoua koucitia avou nakamo.

⁴⁰Ma wamuri aia neitucua ra, aia nifakariace acre tshane anorima ma anovai.

⁴¹Ma wamura acre sefakarogrogo ia nibisa, ma nimasaro, aia neitucua iacre, acoua nakamo icunei ane keina mo jimra?

⁴²Acre neitufwa aia nopito o tasi eika neituna,

⁴³Aia niamo aia, ma nikeina mokagi acre.

⁴⁴Ma aia neitucua iacre, Acre tsha ku afasao avou neitucua ia nopoge avou neinofo ia acoua, pe ane iotshi makamai hepe neiserea ia ta fasao tapu o Moses, ma ta aprofeta, ma ia asam o avou.

⁴⁵Wamurira aia nitshiki niare fenagaro, pe acre makeiro afasao tapu neiserea.

⁴⁶Ma aia neitucua iacre. Tenei neiserea pe ta Kristo nitaia mate, ma masike foci ia tagata nimate ia nopoge fakatoru.

⁴⁷Ma pe tagi, natshicina, ma feimacoua amaganisa ia towaki nori amaganisa keikova ia tagata o iafanua iotshi, neikamata ia Jerusalem.

⁴⁸Acoua anokotamousa neicitia ma koutucua mori ane iotshira.

⁴⁹¶ Ma avou kouna ia acoua ta fatshipoge o tshaku Tata, kaia tari acoua ia ta tumrai sore Jerusalem ia taha nopoge aia katufwa iacoua tomatua ia iluga.

⁵⁰¶ Ma aia niarafia acre watafa niroro itata Jeriko, ma aia tshicitshia iluga tshana arima, ma nifasao erefia iacre.

⁵¹Ane nei nimai hepe aia nifasao, erefia iacre, aia nifeka acre, aia tshicitshia kace ia taragi.

⁵²Ma acre nimori aia, ma kuafe ia Jerusalem ia nibisa sore;

⁵³Ma acre neinofo nopoge ma nopoge ia ta fare sore o ta mori, fasao ia nokobisa ia Atua. Amen.