Read Futuna-Aniwa LUKUS, 4 Bible Online

LUKUS, 4 - Futuna-Aniwa bible

LUKUS, 4

¹MA Iesu nifonu o Nokano Tapu nikuafe ia Jortan, ma ta nokano niarafia aia ia ta tugogou.

²Aia iai forte anopoge niarasia o tiapolo, ma aia sekeina ia anopogera, ma wamuri acre kurava aia nitshitoge.

³Ma tiapolo neitucua iateia, Pe akoi ta Nontariki o Atua, koutucua tenei fatu pe aia emna ia bret.

⁴Ma Iesu nifasao aia nokoutucua, Aia neisereace pe tatane sekamouri ia bret ana, kaia ia iotshi afasao o Atua.

⁵Ma ta tevil niarafia aia iluga ia ta ora sore tasi, ma neikamata iateia iotshi avaka o iafanua wararonei ia tasi (momint) nopito sisi o ta our.

⁶Ma ta tevil neitucua iateia, iotshi tomatua sore tenei avou katufwa iatakoi, ma ta sore o acre, ma tenei ko tufwa iatavou, ma avou katufwa iotshi ia aia avou acitifakarafia.

⁷Pe akoi kamori avou iotshi katufwa iatakoi.

⁸Ma Iesu nifasao ma neitucua iateia, Fano wamuri avou Satana; ma aia ko sereace, Akoi kamori Ihova tshou Atua, ma aia ana akoi kavere iateia.

⁹Ma aia niarafia aia ia Jerusalem, ma neinage aia ia ta nopito iluga ana o tafare mori sore, ma neitucua iateia, Pe akoi ta Nontariki o Atua, touwaki akoi iraro ia icunei;

¹⁰Ma aia neisereace, Aia kafakairo niana agelo kaifatshigeia akoi,

¹¹Ma ia niare arima acre katakoia akoi, pe ia tasi nopoge akoi setucia tshou novai tafatu.

¹²Ma Iesu nokofasao neitucua iateia, Aia neitucua, Akoi sekarasia Ihova tshou Atua.

¹³Ma wamuri ta tevil neimna kurava iotshi karasia ra, aia nifeke aia faru anapoge.

¹⁴¶ Ma Iesu nikuafe ia ta tomatua o ta Nokano ia Calili, ma afasao sore o aia nifano ia iotshi fanua kofori iai.

¹⁵Ma aia nifakairo ia niare afare mori, acreotshi nibisa ia aia.

¹⁶¶ Aia nimai ia Nasareth iai aia sisi ma sore neinofo, ma hepe tshana magane aia nifano efare mori ia nopoge tapu ma nikotu keitawa.

¹⁷Ma acre neitufwa aia tatapuria o ta profeta Isea ma wamuri aia nifogia tatapuria, aia neicitia nuntafa iai neiserea.

¹⁸Ta Nokano o ta Ihova konofo iluga avou, ianei aia niiamosia avou keikova tafasao erefia ia tagata niare outa jimra, aia nikouna avou keipenpena arotorea o acre komai, keikova eivetea avava o acre nifousia, ma keitufwa acre foimata pouri keicitia erefia, keikounace neipenpena erefia acre nikomanono.

¹⁹Keikova ta tou erefisa iacitia o Atua.

²⁰Ma aia nipofna ta tatapuria, ma aia neitufwa aia foci ia aia neinofo iateia, ma aia neinofo iraro, ma afoimata o acre iotshi neinofo ia ta fare mari neicitia mukei aia.

²¹Ma aia neikamata keifasao iacre, Tenei nopoge tenei fasao tapu neiserea ko mai kurava ia niawa atarega.

²²Ma iotshi neitucua tamari ma nimasaro ia afasao karofa aia neitucua, ma acre neitucua, Tenei ko ta nontariki o Josef mo?

²³Ma aia neitucua iacre, Tamari acoua katucua iatovou tenei noprata fasao, Tokta penpena tshou amaci, ane iotshi acime neirogona akoi neimna ia Kaperneum, emna foci icunei ia tshou fanua.

²⁴Ma aia neitucua, Tamari avou koutucua iacoua. Jimra tasi profeta kofakarogona ia tshana fanua.

²⁵Kaia avou koutucua iacoua tamari, nalupai afine nofo ana ia fanua o Isreil niare nunwane nimate i anopoge o Ileija, inaia taragi nipofna atou toru ma umrama ono, mo akai nijimra ia fenua iotshi iai;

²⁶Ma Ileija sekouna ia tasi o acre, Kaia ia Sarepta tasi tumrai o Saiton, ia tasi fine tshana nunwane nimate.

²⁷Ma nalupai tagata nimace o liprose neinofo ia nopoge o Ileisha ta profeta, ma jimra tasi o acre neipenpena erefia kaia Neman ta tane o fanua Sairea.

²⁸Ma acreiotshi neinofo ia tafare mori nifonu o fakainina hepe acre neirogona afasao ra,

²⁹Ma acre nimasike ma nitouwaki aia watafa ta tumrai, ma niarafia aia ia ta noporpore o ta ora ia aia niare tumrai neinofo, keitouwaki aia iraro nouru mokagi.

³⁰Kaia aia nokofano ia arotorea, nifano ia tshana retu.

³¹Ma aia nimai iraro ia Kaperneum tasi tumrai o Calili, ma nifakairo acre ia anopoge tapu.

³²Ma acre nimasaro ia tshana fakairo, ma tshanafasao nimai ia tomatua.

³³¶ Ma ia tafare mori tasi tatane neinofo, aia niamo ta nokano isa o tasi tevil, ma aia nitapa ia noreo palo.

³⁴Nokoutucua, natshicina acime; taha acime keimna iatakoi Iesu o Nasareth? Akoi komai keitakaroiai acime? Avou keiro akoi aia; ta Itapu Tasi o Atua.

³⁵Ma Iesu neisaciria aia, nokoutucua, natshicina tshou afasao, ma komai watapa aia. Ma wamuri ta tevil nitouwaki aia ia aroto o acre, aia nimai watafa aia, ma seiauiai aia.

³⁶Ma acre iotshi nimasaro sore, ma nifasao ia acre, nokoutucua, Taha tafasao nei! ma ia tomatua aia kofasao i anokano isa ma acre komai watafa.

³⁷Ma afasao o aia nifano ia iafanua kafori.

³⁸¶ Ma aia nimasike nifeke ta fare mori ma nifano ia tafare o Saimona, ma ta nana o nanahune o Saimona nimoi ia amace evera sore, ma acre nifakouia aia keipenpena aia.

³⁹Ma aia aia nikotu itata aia, ma neisaciria ta mace evera ma aia nifeke aia; ma meloua aia nimasike niavere iacre.

⁴⁰¶ Ma hepe tara nifanifo, iotshi niare tagata nimaci ia amaci iotshi, nitakoia acre iateia, ma aia neinagi tshana norima iluga acre, ma neipenpena acre iotshi.

⁴¹Ma agelo isa nimai watafa nalupai, nokotapa palo ma neitucua, Ako ta Kristo ta Nontariki o Atua. Ma aia nokosaciria acre, neitucuasana acre keifosao; ma acre keiro aia ta Kristo.

⁴²Ma wamuri tiau nimai, aia nifeke nifano ia tasi tugogou, ma tagata nalupai nisarsara aia, ma nimai ia aia, ma neinogia aia pe aia nofo ma sefeke acre.

⁴³Kaia aia neitucua iacre avau nakova tavaka o Atua ia umrai foci ma; ma ia ane nei aia nikouna avou.

⁴⁴Ma aia nikova ia afare mori o Calili.