Read Futuna-Aniwa LUKUS, 7 Bible Online

LUKUS, 7 - Futuna-Aniwa bible

LUKUS, 7

¹MA wamuri kurava iotshi tshanafasao i atarega o tagata, aia nifano ia Kaperneum.

²Ma tasi senturio niamo tasi fetshicou, aia neicitiafakarafia, ma aia isa nimace itata keimate.

³Ma wamuri aia neirogona o Iesu, aia nikouna iateia aelter o tagata o Juteia, nifakouia mukei aia pe aia komai ma penpena erefia tshana fetshicou.

⁴Ma wamuri acre niromai ia Iesu acre nifakouia aia mukei meloua, nokoutucua, Aia erefia akoi emna ane nei iateia;

⁵Ma aia acitiafakarafia tshote tagata, ma aia neimna tasi fare mori iacime.

⁶Ma Iesu nifano ia acre. Ma inaia aia koitata ta fare, ta senturio nikouna tshana tagata iateia, nokoutucua iateia, Teriki sore sekomai iateia, mo avou seerefia akoi keimai ia tshaku fare.

⁷Iananei avou nimentua avou isa komai iatakoi, kaia akoi koutucua i afasao ana, ma tshaku fetshicou kapenpena erefia.

⁸Ma avou foci tasi tane nofo iraro ta sore, nokamo fakou o tatoua nofo iraro avou, ma avou koutucua ia tasi fano ma aia fano, ma ia tasi foci mai ma aia mai, ma ia tshaku fetshicou emna tenei ma aia imna.

⁹Ma wamuri Iesu neiroga afasao ra, aia nimasaro ia aia, ma nitafuri, ma neitucua ia tagata nifakatapuria ma niroro wamuri aia, avou koutucua iacoua, avou secitiamana sore fakarogrogo hepe tenei, jimra ia tagato o Isreil.

¹⁰Ma acre nikouna, nitafuri ia ta fare; ma neicitia ta fetshicou nimouri tomatua, tshana maci kurava.

¹¹¶ Ane nei nimai ia ta nopoge wamuri ra, aia nifano ia tasi tumrai sore neigo Nen, ma nalupai o niana tagata aia nifakairo, ma nalupai tagata ia aia.

¹²Ma aia inaia aia nimai itata ta feipa cet o ta tumrai sore neicitia tasi tane nimate, aia tasi ana nontariki o tshana nana, ma tshana nunwane nimate, aia nofo ana ma nalupai tagata o ta tumrai niroro ia aia.

¹³Ma inaia Iesu neicitia aia, aia nialofa aia, ma neitucua iateia, sekotagi.

¹⁴Ma aia nimai ma neitofia ta fatfata, ma acre nitakoia aia nikotu. Ma aia neitucua, Atumtane, Avou koutucua iatakoi, Masike.

¹⁵Ma aia nimate neinofo, ma neikamata keifasao. Ma aia neitufwa aia ia tshana nana.

¹⁶Ma nimtacu nito ia iotshi, ma acre nibisa ia Atua, nokoutucua, Pe tasi profeta sore nimasike ia aciatia, ma Atua nakomai ia tshana tagata.

¹⁷Ma tenei fasao o aia nifano ia iotshi fanua o Juteia, ma ia iotshi afanua nifori.

¹⁸Ma fakou Joanes nifakairo neitucua ia aia ane iotshi ra.

¹⁹¶ Ma Joanes nitapa iateia erua o niana fakou aia nifakairo, ma nikouna acrawa ia Iesu, nokotucua, Akoi, aia pe nakomai, mo acime kafatshigeia tasi foci?

²⁰Ma wamuri ta fakou nimai ia aia, acrawa neitucua iateia, Joanes ta baptiso nakouna acimawa iatakoi, keifakowia akoi, Pe akoi aia erefia mai? Mo acime kafatshigeia tasi foci.

²¹Ma ia our tira aia neipenpena nalupia o niare amy ma amaci, ma o agelo isa, ma ia nalupai tagata kofu iai aia neitufwa foimata merama.

²²Iai Iesu nokofasao neitucua iacrawa, Roro niaua retu, ma koutucua ia Joanes ta anea akoura nakacitia ma neirogona, acre kofu koucitia erefia, acre nisape kofano erefia, acre nimaci o leprose kopenpena erefia, acre nitaturi fakarogona erefia, acre mate tshicitshia komouri, ma iacre outa jimra afasao erefia ko kova.

²³Ma erefisa aia sefakainina ia avou.

²⁴Ma wamuri acre Joanes nikouna niroro, aia neikamata keifasao ia tagata o Joanes, Taha acoua niroro ia tugogou keicitia? Tasi tagasao ruruiace ia tumtagi?

²⁵Kaia taha acoua niroro keicitia? Tatane nitaka ia umega meru? Koucitia acre nitaka ia umega nomata sore, ma keina ane erefisa, konofo ia arotopa o fatoriki.

²⁶Kaia taha acoua niroro watafa keicitia? Tasi profeta? Keini, avou koutucua iacoua, aia sore kage tasi profeta.

²⁷Tenei ko aia o aia neisereace, koucitia avou kouna tshaku fetshicow mokagi tshou foimata, aia kapenpena tshou retu mokagi akoi.

²⁸Ma avou koutucua iacoua, o acre nifarere o afine jimra tasi sore kage Joanes ta Baptiso, kaia aia ta sisi ia ta vaka o Atua ko sore kagi aia.

²⁹Ma iotshi tagata neirogona aia, ma fakou fetacina mone tsha teriki, nibisa ia Atua, acre nibaptiso ia Joanes.

³⁰Kaia Afarasi ma fakou arapakou i afasao tapu, nitouwaki afasao o Atua keitakaroiai acre, seamo tshana bapiiso.

³¹¶ Ta Teriki neitucua, Hepe taha avou koutucua fakou o tenei taseatu tagata? Ma ia taha acre hepe?

³²Acre hepe erecriki nokonofo ia ta none nifakamata anea iai, ma tasi nokotapa ia tasi foci nokoutucua, acime nifagosia iacoua ma acoua sekamako, acime nimakuru ia acoua ma acoua setagi.

³³Ma Joanes ta Baptiso nimai sekeina bret ma senumea weina, ma acoua koutucua, aia nikamo tasi agelo isa.

³⁴Ta Nontariki o tagata komai, nokokeina mo nokonumea, ma acoua koutucua, koucitia tatane taforapoga ma nokonumea weina, ta neli o fakou fetacina mone o ta teriki ma tagata isa!

³⁵Kaia arapakou ko fakakairo totonu akai tshana erecriki.

³⁶¶ Ma tasi o Afarasi nifakouia aia keifano keina ia aia, Ma aia nifano ia ta fare o ta Farasi, ma neinofo keina.

³⁷Ma tasi fine o ta tumrai, aia fine isa mokagi, wamuri aia keiro pe Iesu neinofo ia akai ia ta fare o ta Farasi, aia nimai tasi taganea o alabastar nifonu, ia avai iamosia erefia.

³⁸Ma nikotu itata tshana novai wamuri aia, nokotagi, ma neikamata keitataroa tshana avai ia noreimata, ma neiamosia acrawa ia tshana afoiuru, ma nisoge tshana avai, ma neiamosia acrawa ia avai neinamu erefisa.

³⁹Ma wamuri ta Farasi nitapa aia neicitia ra, aia nifasao ia tshana roto nokoutucua, Pe tenei tane tasi profeta, aia nikeiro akai ko tafine nei ma taha tshana magane pe nitofia aia, ma aia fine isa.

⁴⁰Ma Iesu nokofasao neitucua ia aia, Saimona avou nakamo ane keifasao iatakoi, Ma aia neitucua Teriki koutucua aia.

⁴¹Tasi tane nifakafecina mone niamo erua seioria aia, ta tasi seioria aia feftin apount, tu selig ma sekspene ma ta foci seioria therte selig ma thri pene.

⁴²Ma wamuri niaraua mone nibune ma acrawa taru ioria aia, aia neitucua acrawa avou natshicina ioria ra o akorua. Koutucua iatavou, akai o acrawa kacitiafakarafia aia sore kage?

⁴³Saimona nifasao ma neitucua, Avou mentua aia iateia aia neinatshicina ta sore ioria. Ma aia neitucua iateia, akoi nakamentua totonu.

⁴⁴Ma aia nitafuri ia tafine ma neitucua ia Saimona, Akoi koucitia tenei fine? Avou nimai efare tshou, ma akoi setufwa avou tavai keitataroa tshaku avai, kaia aia natatoroa tshaku avai ia tshana anoreimata ma niiamosia acrawa ia tshana afoiuru.

⁴⁵Akoi setufwa avou tasi soge, kaia wamuri avou nimai efare aia segapu keisoge tshaku avai.

⁴⁶Tshaku nouru akoi seiamosia ia avaineu, kaia tenei fine niiamosia tshaku avai ia ane namu erefia.

⁴⁷Ianenei avou koutucua iatakoi, Tshana amaganisa nalupai su, ioria o acre ko touwaki, ma aia neicitiafakarafia sore, kaia ia acre ioria sisi ko towaki, acre acitiafakarafia sisi.

⁴⁸Ma aia neitucua iateia, ioria o tshou amaganisa ko touwaki.

⁴⁹Ma acre neinofo ia akai ia aia, neikamata keitucua i arotorea, Akai tenei touwaki nori o amaganisa ma?

⁵⁰Ma aia neitucua ia tafine tshou fakorogrogo nakapare akoi, Fano ia merino.