Read Futuna-Aniwa LUKUS, 8 Bible Online

LUKUS, 8 - Futuna-Aniwa bible

LUKUS, 8

¹ANE nei nimai wamurira, aia nifano ia iotshi umrai sore ma sisi, nokova ta afasao erefia o ta vaka o Atua, ma acre ta twelv niroro ia aia.

²Ma faru afine aia neipenpena o agelo isa ma amaci Mery nitapa neigo Mactaline, aia nitouwaki watafa aia fitu agelo isa.

³Ma Joana ta nanahune o ta teriki o tafare o Herot, ma susana ma nalupai afaruke, acre neitufwa aia o niare akai ma.

⁴Ma iai tagata nalupai su nifetacina fakatapuria, ma nimai ia aia nifeke iotshi umrai, aia nifasao ia fakatagasia fasao.

⁵Tasi tane neipesia nifano watafa keipesia tshana anohua; ma hepe aia neipesia, faru nito ia ta nuntafa retu, ma aia neikumia ia avai, ma amanu o tagarakou ma avavanea nikeina aia.

⁶Ma faru nito ia ta fatu sore, ma wamuri aia nisomo iai, aia nimero meloua, ianei avai jimra iateia iai.

⁷Ma faru nito ia asone iai, ma ta asone nisomo ia aia, ma niroroia aia mero.

⁸Ma faru nito ia fanua erefisa, ma nisomo, ma neitufwa anohua tasi huntret iateia. Ma wamuri aia neitucua ane iotshi ra, aia nitapa, aia nakamo anontarega erefia aia fakarogona.

⁹Ma tshana tagata aia nifakairo nifakouia aia taha ta nokano o tenei fakatagasia?

¹⁰Ma aia neitucua, Iacoua aia kotufwa keiro anea mukei o ta vaka o Atua, kaia ia acre afaruke i afakatagasia, pe i nokoucitia acre sectiamana, ma ia nokorogona acre sekeiromana.

¹¹Ta fakatagasia ko tenei, Ta nohua ko tafasao o Atua.

¹²Ma acre ia tafaretu, acre pekarogona, ma ta tevil komai ma amke afasao erefia watafa arotorea, sefakarogo ma keiamo anea mouri.

¹³Acre ia tafatu sore, acre rogona ta fasao erefia kabisa amo aia, ma noaka o acre jimra, pe acre fakarogrogo ma i anopoge o karasia natshicina ta mori.

¹⁴Ma acre nikoto i asone, acre nakarogona roro watafa, ma kumiapona aia ia ta fatshigeia aneamane, amone, ma amagane o tenei anea mouri, ma niare anohua sekoleu.

¹⁵Ma acre ia takere erefia, acre ia aroto totonu erefia nakarogona ta fasao ma kopurutshia aia, ma tufwa anofua ia merino.

¹⁶¶ Jimra tasi tane nakatugia ta lamp, apotshia aia ia taganea, mo iraro ta potu, kaia nagi aia iluga ane pe acre roro efare koucitia ta merama.

¹⁷Ma jimra ane tasi mune, pe sekanagi aia ta merama, ma jimra tasi ane keireiro pe sekakeiro ia tagata.

¹⁸Ianenei fatshigeia taha acoua fakarogona, ma i aia nakamo katufwa faru foci, kaia aia sekeiro faru kamke ia aia taha aia hepe nakamo.

¹⁹Iai nimai iateia tshana nana ma anoso, ma acre taru nimai itata aia ma tagata nalupai nifori aia.

²⁰Ma faru neitucua iateia tshou nana ma anoso kotu watafa acitiafakarafia keicitia akoi.

²¹Ma aia neitucua iacre. Tshaku nana ma anoso acre korogona ta fasao o Atua, ma vere erefia iateia.

²²¶ Ane nei nimai, ia tasi nopoge, pe aia nifano ia tasi vaka ia niana tagata aia nifakairo, ma aia neitncua iacre, Erefia acitia farau ia nofokagi ta vai nupu. Ma acre nitakuce ma feke ia tuporuku.

²³Kaia hepe acre nitere ia tara ana, Iesu nimero, ma tumtagi sore iai nimai ia tavai nupu, ma ta tuporuku nifonu ia tavai hepe itata nikero.

²⁴Ma acre nimai iateia, ma nifagona aia, nokoutucua Teriki, teriki acitia kokero, ma aia nimasike ma neisaciria ta tumtagi ma nisopokace o apiau sore, ma acraua nigapu merino.

²⁵Ma aia neitucua iacre, Wehe ko niaua fakarogrogo? Ma acre nimtacu ma nimasaro, nokofasao tasi ia tasi foci, Taha tane nei! Ma aia nokofasao atumtagi ma atai, ma acre fakarogona ma emna hepe tshanafasao.

²⁶¶ Ma acre niromai ia ta fanua o tagata Cercasinis aia ko nofokagi Calili.

²⁷Ma wamuri aia nimai ia ta fanua, iai nifapa aia tasi tane o ta tumrai sore, agelo isa neinofo ia aia ituai, aia sekataka ia umega, ma senofo ia tasi fare, kaia ia upunaga o acre nimate.

²⁸Wamuri aia neicitia Iesu, aia nitapa fakapalo, ma nito mokagi aia, ma ia noreo sore neitucua, Taha avou emna iatakoi Iesu, Akoi ta Nontariki o ta sore kage Atua iluga? Avou fakowia mukei akoi setakaroiai avou.

²⁹Ma aia neitucua mukei ta nokano isa keimai watafa ta tane, ma ia nopoge nalupai aia nipurutshia aia; ma acre nifousia aia ia aus ma ia airon, ma aia nifatshi iotshi, ma ta tevil neisegeake aia watafa ia ta tugogou.

³⁰Ma Iesu nifakowia aia, nokoutucua taha ko tshou neigo? Ma aia neitucua Licion, ianenei nalupai agelo isa niroro ia aia.

³¹Ma acre nifakowia mukei aia pe aia sesegeake acre ia ta tamano sore.

³²Ma iai apakasi nalupai nifakeina ia taora, ma acre nifakowia aia pe acre roro ia apakase, ma aia seneitucuasana acre.

³³Wamurira atevel niroro watafa ta tane, ma niroro ia ta apakasi, ma acre iotshi nifura meloua ia none igosa ia tavai nupu ma kokero mate.

³⁴Wamuri acre nifakeina acre neicitia taha neimna, acre nifura, ma niroro neitucua anera ia ta tumrai sore, ma ia fanua nifori.

³⁵Ma acre niroro watafa keicitia taha neimna, ma niromai ia Iesu, ma neicitia tatane, ta agelo isa nifeke nokonofo ia avai o Iesu, nitaka ia umega, ma totonu ia tshana fenagaro, ma acre nimtacu.

³⁶Acre ma neicitia ane ra neitucua iacre taha aia neimna keipenpena aia agelo isa mokagi neinofo ia aia.

³⁷¶ Wamurira iotshi tagata nifetacina iai o ta fanua o ta Cercisinis nifori nifakowia aia keifeke acre, ma nimtacu sore nipurutshia acre, ma aia nifano ia ta vaka ma nikuafe.

³⁸Kaia tatane ta agelo isa nifeke aia nimori Iesu pe aia fano ia aia, kaia Iesu nikounace aia, nokoutucua.

³⁹Nitafuri ia tshou fare, ma koutucua taha anea sore Atua nakamna iatakoi, ma aia nifano tshana retu ma nikova ia tumrai iotshi anea mane sore Iesu neimna iateia.

⁴⁰Ane nei nimai hepe Iesu nikuafe, tagatotshi nibisa ia aia, ma acre iotshi nitari aia.

⁴¹¶ Ma iai nimai tasi tane neigo Jerus, ma aia tasi teriki o ta fare mori, ma aia nito ia anovai o Iesu, ma nifakouia aia nimai efare tshana;

⁴²Ma aia niamo tasi ana nofine neinofo wararonei itata twelv atou, ma aia nimoy itata mate. Kaia hepe aia nifano tagata nalupai su nipecitshia aia.

⁴³Ma tasi fine tshana toto nimarigi atou twelv, aia nifuko iotshi tshana mone ia ta atoktor, kaia acre sepenpena tshana maci.

⁴⁴Aia nimai wamuri aia, ma nitofia ta nopogomata o tshana Mega, ma meloua kurava ta nokomerigi o tshana toto.

⁴⁵Ma Iesu neitucua akai nitofia avou? Ma wamuri iotshi neivetea, Pitrus ma acre ia aia neitucua, Teriki tagata fakatapurea pecitshia ma kumea itata akoi, ma tiaha akoi nifakouia, Akai nitofia avou?

⁴⁶Jesu neitucua tasi neitofia avou, ma avou keiro tomatua kofeke avou.

⁴⁷Ma wamuri ta fine neicitia aia semune, aia nimai nokoviriviri ma nokoto makagi aia, aia neitucua ia aia mokagi tagatotshi tiaha aia nitofia aia, ma meloua tshana maci neipenpena.

⁴⁸Ma aia neitucua iateia, Nofine kabisa, tshou fakarogrogo nakapenpena akoi erefia, Fano ia merino.

⁴⁹¶ Hepe aia nifasao, tasi nimai ia tafare o ta teriki o tafare mori nokoutucua ia aia, Tshou nofine ko mate, searafia ta Teriki sore.

⁵⁰Kaia wamuri Iesu neirogonora, aia nifasao iateia nokoutucua, Sumtacu; fakarogrogo ana, ma aia kapenpena erefia.

⁵¹Ma wamuri aia nimai efare aia neitucuasana tagatotshi keifano efare, kaia Pitrua, ma Jacobus, ma Joanes, ma ta mana ma ta nana o ta fene sisi.

⁵²Ma iotshi tagata nitagi ma nimakuru, kaia aia neitucua sekotagi, aia semate, kaia komero ana.

⁵³Ma acre nikoukata keifeimacoua aia, nikeiro aia nimate.

⁵⁴Ma aia nitouwaki acre efuafo, ma nipurutshia tshana norima, ma nitapa, nokoutucua, Ta fine sisi, masike.

⁵⁵Ma tshana nokano nimai foci, ma aia nimasike melowa, ma aia neitucua keitufwa aia akai.

⁵⁶Ma tshana mana ma nana nimasaro sore, kaia aia neitucua mukei iacre sekoutucua tasi tane taha aia neimna.