Read Futuna-Aniwa LUKUS, 9 Bible Online

LUKUS, 9 - Futuna-Aniwa bible

LUKUS, 9

¹AIA nitapa ta twelv fakou aia nifakairo, ma neitufwa acre tomatua keisegeake iotshi agelo isa, ma keipenpena iotshi tagata o niare amaci.

²Ma aia nikouna acre keikova ta vaka o Atua, ma keipenpena acre amaci.

³Ma aia neitucua iacre, seamo ane ia niaua aretu, seamo atokotoko, mo akato, mo bret, mo mone, mo erua akot o tasi ma sece.

⁴Ma ia taha fare acoua roro, nofo ia aia, ma feke aia keifano.

⁵Ma iacre searafia acoua, ia ano poge acoua feke tumrai tira, tuctucea ta tefu takere o niaua avai fakatamou iacre.

⁶Ma acre nifeke ma niroro ia umrai iotshi nokova ta fasao erefia, ma nokopenpena iotshi amaci.

⁷Ma Herot ta teriki neirogona o iotshi aia neimna, ma aia nimasaro sore, ianenei faru neitucua pe Joanes nimasike ia tagata nimate;

⁸Ma faru foci neitucua Ilaija nimasike, ma faru pe tasi i aprofeta ituai nimasike.

⁹Herot neitucua, Joanes avou nasawace tshana nouru, kaia akai tenei, o aia avou korogona anea mane ra? Ma aia neicitiafakarafia sore keicitia aia.

¹⁰¶ Ma ta apostolo wamuri acre nikuafe neitucua iateia iotshi anea acre neimna. Ma aia niamo acre, ma nifano sekocreano ia ta none o tugogou tsha tumrai sore neigo Bethsaita.

¹¹Ma wamuri tagata nikeiro, acre niroro wamuri aia; ma aia nialofa acre, ma nifasao acre o ta tavaka o Atua, ma aia neipenpena acre nimaci.

¹²Ma itata ta nopoge kurava, ta twelv nimai neitucua iateia, kounace ta nalupai tagata nifetacina, pe acre roro ia ta umra ma fanua kofori, keinofo ma amo akai, ma acitia icunei ia ta none o tugogou.

¹³Kaia aia neitucua iacre acoua tufwa iacre keina. Ma acre neitucua, Acime amo erima bret ana ma erua aika, ma wehe acime roro keifakamata akai ia iotshi tagata nifakatapuria icunei.

¹⁴Ma acre itata faiv thousant fakou. Ma aia neitucua ia niana fakou aia nifakairo. Emna acre keinofo iraro i afakatapuria o afefte ma fefte i anotu.

¹⁵Ma acre neimna hepera, ma neimna iotshi nofo iraro.

¹⁶Ma aia niamo ta erima bret ma ta erua eika, ma tshicitshia tshana foimata ia taragi, aia nimori iateia, ma neifasia acre, ma neitufwa niana tagata aia nifakairo keinagi mokagi tagatotshi iai.

¹⁷Ma acre nikeina, ma iotshi nimakona, ma acre nifetacina ta anopitopito neinofo iai wamuri twelv akato nifonu.

¹⁸¶ Ane nei nimai hepe aia ana nokomori ia niana tagata aia nifakairo, aia nifakouia acre nokoutucua, Tagata koutucua avou akai?

¹⁹Acre nokofasao neitucua, Joanes ta Baptiso; kaia faru koutucua Ilaija, ma faru foci koutucua tasi o aprofeta ituai ko nimasike foci.

²⁰Ma aia neitucua iacre, kaia akai acoua koutucua avou? Pitrus nifasao neitucua, Ta Kristo o Atua.

²¹Ma aia nifasao mukei iacre, ma neitucuasana acre keitucua tenei ia tasi tane;

²²nokoutucua, Ta Nontariki o tagata kamy ia nalupai, ma keitouwaki o ta aelter ma o ta fateriki tapu, ma o ta fakou serea tatapuria, ma tshi mate, ma keitshicitshiakace ia nopoge fakatoru wamuri.

²³¶ Ma aia neitucua iacre iotshi, Pe tasi tane kamai muri avou, Erefia aia vetea aia ma kamo tshana fakaravasia nopoge ma nopoge ma mai muri avou.

²⁴Ma pe tasi kapare tshana anea mouri katouwaki aia; kaia aia katouwaki tshana anea mouri iatavou, aia kapare aia.

²⁵Ma taha erefia nofo ia tatane pe aia kamo iafanua iotshi wararonei, ma touwaki tshana nokano iateia.

²⁶Ma iotshi koma o avou ma tshakufasao, o aia ta Nontariki o tagata kakoma i anopoge aia kamai ia tshana kosore, ma ia ta sore o tshana Tamana, ma o tshana agelo tapu erefia.

²⁷Kaia avou koutucua iacoua tamari, faru kotu icunei acre sekomate mokagi acre kacitia ta vaka o Atua.

²⁸¶ Ane nei nimai itata anopoge varu nisiri wamuri afasao ra, aia niamo Pitrus ma Joanes, ma Jakobus ma nifitshi taora tasi keimori.

²⁹Ma hepe aia nimori, tshana foimata nifuri, ma tshana mega kego ma nokononeate.

³⁰Ma neicitia erua tane iai nifasao ia aia, neigorawa Moses ma Ilaija.

³¹Acrawa neicitia ia ta noneate, ma nifasao tshana mate, aia kamai ia Jerusalem.

³²Kaia Pitrus ma acre ia aia nimafa ia kofemero, ma wamuri acratou kuara, acratou neicitia tshana sore noneate, ma ta erua tane nikotu ia aia.

³³Ma ane nei nimai hepe acrawa nifeke aia, Pitrus neitucua ia Iesu, Teriki aia ko erefia acitia icunei; ma erefia acimatou emna toru fare, tasi iatakoi, ma tasi ia Moses, ma tasi ia Ilaija, aia sekeiro taha aia neitucua.

³⁴Hepe aia neitucua afasao ra, tasi apa nimai ma nimune acre, ma acratou nemtacu hepe acratou niroro ia ta apa.

³⁵Ma tasi noreo nimai watafa ta apa, nokoutucua, Tenei ko Tucutariki nakacitiafakarafia; fakarogona aia.

³⁶Ma wamuri ta noreo nifano, Iesu ana nofo, ma acratou nimune ane ra, ma sekoutucua tasi tane i anopogera, tasi o anea ra acratou neicitia.

³⁷¶ Ma ia ta nopoge wamuri ra, wamuri acre nimai fanifo ta ora, tagata nalupai su nifapa aia.

³⁸Ma tasi tane o acre, nitapa, nokoutucua, Teriki, avou fakouia mukei akoi, koucitia tshaku nontariki, ma aia ko tshaku tama tasi ana.

³⁹Ma koucitia tasi angelo amo aia, ma meloua aia tapa palo, ma aia eifasia aia, ma aia savari sore foci, ma nikogafafo sore aia senatshicina aia.

⁴⁰Ma avou nifakouia tshou fakou akoi fakairo keisegeake aia kaia acre taru iateia.

⁴¹Ma Iesu nifasao neitucua, Kai acoua tasiatu tagata sefakarogrogo ma magane safi, efia atou avou nofo iacoua, ma korogona acoua? Arafia mai tshou nontariki.

⁴²Ma hepe aia nokomai, ta tevil neipesia aia ma nitakaroiai aia sore su. Ma Iesu neisaciria ta agelo isa, ma neipenpena ta tamasisi ma neitufwa aia ia tshana tamana.

⁴³Ma acre iotshi nimasaro ia ta sore tomatua o Atua. Kaia inaia acre nimasaro ia ane iotshi Iesu; neimna, aia neitucua ia niana tagata aia nifakairo.

⁴⁴Erefia afasao ra nofo mukei ia niaua atarega, ma ta Nontariki o tagata katufwa ia anorima o tagata.

⁴⁵Kaia acre sekeiro ta nokano o tenei fasao, ma aia nimune ia acre, pe acre secitiamana aia, ma acre nimtacu keifakowia aia keitucua acre ta nokano o aia.

⁴⁶¶ Ma acre nifasao acre, akai o acre ta kasore.

⁴⁷Ma Iesu, nokoucitia ta mentua o niare roto, niamo tasi tamasisi ma neinage aia itata acre,

⁴⁸Ma neitucua iacre, Akai karafia tenei tama ia tshaku neigo kamo avou, ma aia kamo avou kamo aia nikouna avou; ma aia ta sisi o acoua iotshi, aia kasore.

⁴⁹Ma Joanes nifasao ma neitucua Acime neicitia tasi nokosegeake agelo isa ia tshou neigo, ma acime neitucuasana aia, ianenei aia semai wamuri ia acime.

⁵⁰Ma Iesu neitucua iateia, seneitucuasana aia, ma aia sefiatu acoua ko situ acoua.

⁵¹Ma ane nei nimai, ta nopoge koitata keiarafia aia iluga, aia neinagi mukei tshana foimata keifano ia Jerusalem.

⁵²Ma nikouna tagata mokagi tshana foimata, ma acre niroro ma niroro watakoro tasi tumrai sisi o Samerea keipenpena ia aia.

⁵³Ma acre neitucuasana aia nofo iai, ianenei tshana foimata nofo hepe aia kofano ia Jerusalem.

⁵⁴Ma wamuri tshana tagata aia fakairo Jakobus ma Joanes neicitia tenei, acrawa neitucua, Teriki, Akoi acitiafakarafia acitia kotapa tiafi keimai iraro ia taragi, ma tugiace acre, hepe Ilaiji neimna?

⁵⁵Kaia aia niafuri, ma neisaciria acrawa, ma neitucua, acoua sekero tshoua nokano.

⁵⁶Ma ta Nontariki o tagata sekomai keitakaroiai anea mouri o tagata kaia keipare acre, ma acre niroro ia sece tumrai.

⁵⁷¶ Ma hepe acre niroro ia teretu, tasi tane neitucua ia aia, Teriki avou kafano wamuri akoi ia anone iotshi akoi fano iai.

⁵⁸Ma Iesu neitucua iateia, Akuli eiro amo arua, ma amanu o avavania nakamo afare manu, kaia ta Nontariki o tagata seamo none tasi keinage tshana nouru iai.

⁵⁹Ma aia neitucua ia faruke, mai muri avou. Kaia aia neitucua, Teriki, erefia avou mokagi keifano keitanumea tshaku tata.

⁶⁰Iesu neitucua iateia, Feke acre mate keitanumea niare mate, kaia fano akoi ma kova iafanua ta vaka o Atua.

⁶¹Ma tasi foci neitucua, Teriki avou kamai wamuri akoi, kaia erefia avou mokagi fano ma alofa acre ia tshaku fare.

⁶²Ma Iesu neitucua iateia. Jimra tasi tane nokopurutshia ta tuko, ma nafshicina ta vere, ko erefia ia tavaka o Atua.