Read Futuna-Aniwa JOANES, 1 Bible Online

JOANES, 1 - Futuna-Aniwa bible

JOANES, 1

¹IA ta nontafito neinofo ta Fasao, ma ta Fasao neinofo ia Atua, ma ta Fasao aia ko Atua.

²Aia neinofo ia nontafito ia Atua.

³Ane iotshi aia neimna, ma jimra tase foci neimna ane tase.

⁴Ia aia aniamouri neinofo, ma aniamouri ra ko ta merama o tagata.

⁵Ma ta merama kotshi ta noneate i apouri, ma ta pouri sekeiromana iai.

⁶¶ Tasi tatane Atua nikowna, tshana neigo Joanes.

⁷Aia nimai tatane fakairo, keifakairo o ta Merama, pe tagatotshi neirogona aia ma fakarogorogo.

⁸Aia kojimra ta merama ra, kaia nikowna keifakairo o ta merama ra.

⁹Ta merama ra tamari, imna merama iotshi tagata koromai ia fanua wararonei.

¹⁰Aia neinofo ia fanua wararonei, ma aia neimna fanua wararonei ma ta fanua waronei sekeiromana aia.

¹¹Aia nimai ia niana tagata, ma niana tagata sefakarogona aia.

¹²Kaia ia faru o acre nifakarogrogo aia, iacre neitufwa tomatua keimna acre untariki o Atua, iacre, fakarogrogo ia tshana neigo;

¹³Iacre sefarere o toto, mo o fenagaro o konouri, mo o fenagaro o tagata, kaia o Atua.

¹⁴Ta Fasao neimna ia tatane, ma neinofo iacime ma acime neicitia tshana noniate, ta noniate hepe o aia ana Tamana niamo, aia nifonu o karofa erefisa ma o ta mari.

¹⁵¶ Joanes nifakairo o aia, ma nikova, nokoutucua, Tenei aia avou nifasao o aia, Aia komai wamuri avou, aia sore kage avou; ma aia neinofo mokagi avou.

¹⁶Ma o tsahana kofonu neitufwa acitiotshi, ma karofa o tshana karofa.

¹⁷Ma ta fasao tapu neitufwa ia Moses, kaia karofa ma tamari niromai ia Iesu Kristo.

¹⁸Jimra tasi tatane neicitia Atua ituai mo milow wararonei, ta Nontariki tasi ana, aia neinofo ia ta fatfata o Tamana, aia nifakairo tagata o aia.

¹⁹¶ Tenei fasao Joanes neitucua iateia, nopogera tagata Juteia nikowna fakow tapu ma fakow o Livai ia Jerusaiem keifakowia aia, Akoi akai?

²⁰Aia neitucua, ma sekoveteia; kaia neitucua, Avou jimra ta Kristo.

²¹Acre nifakowia aia, Tiaha? Akoi Elija mo? Aia neitucua, avou jimra aia. Akoi ta profeta ra mo jimra? Aia neitucua, Jimra.

²²Iai acre neitucua iateia, Akoi akai? pe acime fakairo acre nikowna acime. Taha akoi koutucua akai akoi?

²³Aia neitucua, Avou ta norio o tasi nokotapa ia tugogou, Penpena totonu ta teretu o Ihova, hepe ta profeta Aiseia neitucua.

²⁴Ma acre nikowna iateia faru o tagata Afarasi.

²⁵Acre nifakowia aia, neitucua iateia, Tiaha akoi baptiso tagata, pe akoi jimra ta Kristo ra, mo Elaija, ma jimra tera profeta.

²⁶Joanes nifasao iacre, nokoutucua, Avou baptiso acowa ia tavai; kaia tasi kotu iacowa, ma acowa puspusi aia.

²⁷Aia nikomai wamuri avou, ma sore kage avou, ta vava fousia tshana shu avou sorefia eiveteia.

²⁸Ane iotshi ra neitucua ia Bethabara nokofagi Jortan, iai Joanes nokobaptiso.

²⁹¶ Nopoge wamuri ra Joanes neicitia Iesu nokomai iateia, ma neitucua, Kowcitia ta Lam o Atua, aia amke ane isa o iafanua wararonei.

³⁰Tenei aia avou neitucua o aia, Wamuri avou tasi nokomai, aia sore kage avou, ma aia neinofo, mokagi avou.

³¹Ma avou sekeiromana aia, kaia kefakairo tagata Isreil kowcitia aia, avou nimai nokobaptiso ia tavai.

³²Joanes nifakairo, nokoutucua, Avou neicitia ta Nokano TAPU nokofanifo ia taragi hepe tasi tafoitu, ma aia neinofo iluga aia.

³³Ma avou seiromana aia; kaia aia nihowna avou keibaptiso ia tavai, aia neitucua iatavou. Ia aia akoi kacitia ta Nokano TAPU nokofanifo, ma nokonofo iluga aia, aia baptiso ia Nokano TAPU.

³⁴Ma avou neicitia, ma nifasao nokoutucua pe tenei ta Nontariki o Atua.

³⁵¶ Foci ia nopoge wamuri ra Joanes kotu ma erua niana tagata aia nifakairo;

³⁶Ma nokoucitia Iesu hepe aia nitakaro, aia neitucua, kowcitia ta Lam o Atua!

³⁷Tagata erua aia nifakairo, neirogona aia nifasao, ma acrawa niroro wamuri Iesu.

³⁸Iesu nitafuri, neicitia acrawa nokororo wamuri aia, ma neitucua iacrawa, Taha akorua nokosara? Acrawa neitucua iateia, Rabai nokano tafaso ra, Teriki fakairo, akoi konofo none wehe?

³⁹Aia neitucua iacrawa. Koromai ma kowcitia. Acrawa niromai ma neicitia none aia neinofo iai, ma acrawa neinofo iateia nopage ra; ma aia itata fiafi mai.

⁴⁰Tasi o acrawa neirogona Joanes nifasao, ma nifano wamuri, aia Antreus, ta noso o Saimona Pitrus.

⁴¹Aia mokagi neicitia tshana noso Saimona, ma neitucua iateia, Acime neicitia ta Mesaia, nokano tira, ta Kristo.

⁴²Aia niarafia aia ia Iesu. Ma nopagera Iesu neicitia aia, aia neitucua, Akoi Saimona ta nontariki o Jona; katapa neigo tshow Sifas, nokano neigo tira, Ta fatu.

⁴³¶ Nopoge wamurira Iesu nifeke nifano ia Calili, ma neicitia Filipos, ma neitucua iateia, Komai wamuri avou.

⁴⁴Filipos neinofo in Bethseta, ta tumrai o Antreus ma Pitrus.

⁴⁵Filipos neicitia Nathaneil, ma neitucua iateia, Acime neicitia aia, o aia Moses ia ta fasao tapu, ma aprofeta neiserea tatapuria, Iesu o Nasareth, ta nontariki o Josef.

⁴⁶Nathaneil neitucua iateia, Tasi ane erefisa komai ia Nasareth mo? Filipos neitucua iateia, Komai ma kowcitia.

⁴⁷Iesu neicitia Nathaneil nokomai iateia, ma neitucua o aia, Kowcitia tasi tane o Isreil tamari Korefu semune ia tshana roto!

⁴⁸Nathaneil neitucua iateia, Tiaha akoi keiro avou? Iesu nifasao neitucua iateia, Mokagi Filipos nitapa akoi, iai akoi neinofo iraro ta tsharupe, Avou neicitia akoi.

⁴⁹Nathaneil nifasao neitucua iateia, Teriki fakairo, akoi ta Nontariki o Atua; akoi ta Teriki o tagata Isreil.

⁵⁰Iesu nifaso neitucua iateia, Anera avou neitucua iatakoi, Avou neicitia akoi iraro ta tsharupe, akoi fakarogrogo mo? akoi kacitia ane sore kage ra wamuri nei.

⁵¹Ma aia neitucua iateia, Tamari, tamari, avou koutucua iatakoi, Wamuri nei acowa kacitia taragi katshice, ma agelo o Atua nokonace ma nokofanifo ia ta Nontariki o tagata.