Read Futuna-Aniwa JOANES, 10 Bible Online

JOANES, 10 - Futuna-Aniwa bible

JOANES, 10

¹TAMARI, tamari, avou koutucua iacowa, Aia sefana ia tafeitoca o takoupa tsha asip, kaia kokava ia teretu foci, aia tagata tshigo ma amke ane tsha faruke.

²Kaia aia fano ia tafeitoca aia tatane kairatshia asip.

³Iateia tatane kafakatshigeia tafeitoca tshiki aia; ma asip fakarogona tshana noreo, ma aia tapa niana asip ia niare neigo, ma arafia acre watafa.

⁴Anopoge aia arafia watafa niana asip, aia nokofano mokagi acre, ma asip kororo wamuri aia; ma acre keiro tshana noreo.

⁵Ma acre seroro wamuri tatane acre sekeiro, kaia acre fura iateia ma acre sekeiro ta noreo o tagata acre sekeiro.

⁶Tenei fakatagasia Iesu nifasao iacre, kaia acre sekeiro mana afasao o anea aia nifasao iacre.

⁷Iai Iesu nifasao iacre foci, Tamari, tamari, Avou koutucua iacowa, Avou tafeitoca o asip.

⁸Iotshi niromai mokagi avou, acre tagata tshigo ma amke ane tsha faruke; kaia asip sefakarogona acre.

⁹Avou tafeitoca; ia avou pe tatane tasi komai watakoro, avou kapare aia ia anea mouri, ma aia kamai watakoro ma kafano watafa, ma kakeina akai.

¹⁰Tagata tshigo semai, kaia keitshigo, ma keitaia komate, ma keitakaroiai; Avou komy keitufwa acre anea mouri, ma pe acre nakoamo aia sore su.

¹¹Avou tatane erefia fatshigeia asip, tatane erefia asip kotufwa tshana ania mouri ia asip.

¹²Kaia aia konofo fetshicow ia fakamata ana, ma jimra tatane fatshigeia asip, jimra tshana asip, aia nokowcitia akuli eiro nokomai, ma aia feke asip, ma kotere, ma akuli eiro kopurutshia acre ma fura asip.

¹³Ta fetshicow konofo ia fakamata ana kofura, ianei aia konofo ia fakamata ana, ma secitiafakarafia asip.

¹⁴Avou tatane erefia fatshigeia asip, ma keiro tshaku asip, ma acre keiro avou.

¹⁵Hepe ta Mana keiro avou, hepe ana avou keiro ta Mana; ma avou nagi iraro tshaku anea mouri ia asip.

¹⁶Ma faru foci asip tshaku, acre sekonofo ia takoupa nei; acre foci avou koamo, ma acre karagono tshaku noreo; ma iotshi kanofo ia tasi takoupa, ia tasi tatane fatshigeia acre.

¹⁷Anera tshaku Tata acitiafakarafia avou, ianei avou nagi iraro tshaku anea mouri, pe avou amo foci aia.

¹⁸Jimra tatane tasi amke aia iatavou, kaia avou ana nagi aia iraro. Avou tomatua keinagi aia iraro, ma avou tomatua amo foci aia. Tenei fakairo tshaku Tata nakatufwa avou.

¹⁹¶ Iai tagata Juteia nivaia foci ia afasao ra.

²⁰Ma nalupai o acre neitucua, Aia nakoamo tasi agelo isa, ma aia kowkali; Tiaha acowa fakarogona aia?

²¹Faru foci neitucua, Afasao ra jimra afasao o aia nakoamo tasi agelo isa. Konapecua tasi agelo isa imna kuara foimata o acre foimata pouri?

²²¶ Ane nei nimai ia Jerusalem, ia tacripoga o penpena erefia, ma aia ia nopoge mukaligi.

²³Ma Iesu nitakaro ia ta fare sore o Ihova, ia ta tapona tafeitoca o Solomon.

²⁴Nopogera tagata Juteia niromai kofori aia, ma neitucua iateia, Efia nopoge akoi imna acime seiro erefia? Pe akoi ta Kristo, koutucua iacime totonu.

²⁵Iesu nifasao iacre, Avou neitucua iacowa, ma acowa sefakarogrogo; avere avou imna ia ta neigo o tshaku Tata, acre fakairo acowa iatavou.

²⁶Kaia acowa sefakarogrogo, ma acowa jimra o tshaku asip, hepe avou neitucua iacowa.

²⁷Tshaku asip fakarogona tshaku noreo, ma avou keiro acre, ma acre kororo wamuri avou;

²⁸Ma avou tufwa iacre anea mouri tou ma tou; ma setakaroiai acre tou ma tou, foci jimra tasi tomatua amke acre watafa tshaku norima.

²⁹Tshaku Tata aia neitufwa avou acre, aia kosore kage iotshi, ma jimra tasi tomatua keiamke acre watafa norima o tshaku Tata.

³⁰Avou ma tshaku Tata kotishana.

³¹Iai tagata Juteia niamo afatu foci keitshiria aia.

³²Iesu nifasao iacre, Nalupai avere erefia avou fakariake iacowa; koutucua tasi o avere ra acowa tshiria avou iateia?

³³Tagata Juteia nifasao iateia, nokoutucua, ia tasi tavere erefia acime setshiria akoi, kaia ia tafasosa tapu; ma ianei akoi tasi tatane, imna akoi Atua.

³⁴Iesu nifasao iacre, Aia neisereace ia tatapuria tapu tshowa, mo, Avou neitucua, Acowa tetua?

³⁵Pe aia nitapa acre tetua, iacre tafasao o Atua nimai, ma afasao tapu neisereace taru iouiai.

³⁶Koutucua acowa o aia ta Mana neimna erefia ma nikowna wararonei, Akoi tafasosa tapu; ianei avou neitucua, Avou ta Nontariki o Atua?

³⁷Pe avou severe avere o tshaku Tata, natshicina fakarogrogo avou.

³⁸Kaia pe avou imna, pe acowa sefakarogrogo avou, fakarogrogo avere, pe acowa keiro ma fakarogrogo pe ta Mana konofo ia avou, ma avou ia aia.

³⁹Anera acre nifatshigeia foci keipurutshia aia, kaia aia nifeke niare norima,

⁴⁰Ma nifano foci nofokagi Jortan ia none iai Joanes mokogi nibaptiso; ma aia neinofo iai.

⁴¹Nalupai nifetacina iateia ma neitucua, Joanes seneimna avere sore, kaia ane iotshi Joanes nifasao o tatane nei komari.

⁴²Ma nalupai tagata nifakarogrogo aia iai.