Read Futuna-Aniwa JOANES, 11 Bible Online

JOANES, 11 - Futuna-Aniwa bible

JOANES, 11

¹TASI tatane nimace, tshana neigo Lasarus o Bethane ta tumrai o Mery ma tshana noso Martha.

²Aia Mery tera niamosia ta Teriki sore ia ane iamosia, ma niamosia tshana novai ia tshana auru, tshana nokave Lasarus nimace.

³Tshana akave nikowna iateia, nokoutucua, Teriki sore, kowcitia, aia komace akoi acitiafakarafia.

⁴Nopogera Iesu nifakarogona tera, aia neitucua Tamace tenei jimra ia ta mate, kaia ia ta sore tomatua o Atua, pe ta Nontariki o Atua imna ta sore ia aia.

⁵Iesu neicitiafakarafia Martha, ma tshana noso, ma Lasarus.

⁶Wamuri aia neirogona aia nimace, aia neinofo nopoge erua foci ia none aia iai.

⁷Wamuri ra aia neitucua ia niana tagata aia nifakairo, Erefia acitia kororo ia fanua Juteia foci.

⁸Niana tagata aia nifakairo neitucua iateia, Teriki sore, tagata Juteia nopogera itata neicitiafakarafia keitshiria akoi, ma tiaha akoi fano foci iai?

⁹Iesu nifasao, Twelv our ia nopoge, mo? Pe tatane tasi katakaro ia ta nopoge aia setshipatshipa, ianei aia kowcitia ta merama o ta fanua wararonei.

¹⁰Kaia pe tatane tasi katakaro ia tupo, aia tshipatshipa anera ta merama kojimra ia aia.

¹¹Ane iotshi ra aia neitucua, ma wamuri ra aia neitucua iacre, Tshote nele Lasarus komero, kaia avou fano pe avou fagona aia ia ta mero.

¹²Iai niana tagata aia nifakairo neitucua, Teriki sore, pe aia komero, aia komouri.

¹³Kaia Iesu nifasao o tshana mate; kaia acre nimentua aia nifasao o aia nokogapu ia ta mero.

¹⁴Iai Iesu nifasao iacre tamari, Lasarus komate.

¹⁵Ma avou kabisa iacowa avou kojimra iai, pe imna acowa fakarogrogo; kaia erefia acitia kororo iateia.

¹⁶Tomas tshana neigo Titemus neitucua ia niana anoso tagata aia nifakairo, Erefia acitia foci, kororo, pe acitia komate ia aia.

¹⁷Nopogera Iesu nimai, aia neirogona aia neinofo ia tupunaga o nimate efa nopoge mokagi ra.

¹⁸Bethane koitata Jerusalem, hepe erua mail papai.

¹⁹Ma nalupai tagata Juteia niromai ia Martha ma Mery keiarafeina acrawa ia tsharawa nokave.

²⁰Martha wamuri aia neirogona pe Iesu nokomai, nifano efuafo ma nifapa aia, kaia Mery neinofo efare.

²¹Martha neitucua ia Iesu, Teriki sore, pe akoi neinofo icunei tucu kave sematemana.

²²Kaia avou keiro, milow pe taha ane akoi kanogia o Atua, Atua katufwa akoi.

²³Iesu neitucua iateia, Tshou nokave kamasike foci.

²⁴Martha neitucua iateia, Avou keiro aia kamasike foci ia nopoge wamuri ia nokomasike o tagatotshi.

²⁵Iesu neitucua iateia, Avou ta masike foci o tagata nimate, ma ta mouri; aia pe fakarogrogo avou, pe aia nimate, i taha nopoge aia kamouri foci;

²⁶Ma tagatotshi komouri ma fakarogrogo avou sekamate tou ma tou. Akoi fakarogrogo tenei, mo?

²⁷Aia neitucua iateia, Keini Teriki sore, Avou fakarogrogo pe akoi ta Kristo, ta Nontariki o Atua, aia acre nifakasara komai ia fanua wararonei.

²⁸Wamuri aia nifasao ra, aia nifano tshana retu, ma nitapa fakasisi Mery tshana noso, nokoutucua, Ta Teriki sore komai ma tapa akoi.

²⁹Milow wamuri aia neirogona ra, aia nimasike milowa, ma nimai iateia.

³⁰Iesu semaimana ia tumrai, kaia aia neinofo ia none Martha nifapa aia iai.

³¹Tagata Juteia neinofo iateia efare, ma nikarafeina iateia, wamuri acre neicitia Mery pe aia nimasike milowa ma nifano watafa, acre niroro wamuri aia, nokoutucua, Aia kofano ia tupunaga o aia komate, keitagi iai.

³²Mery nimai ia none Iesu neinofo iai ma neicitia aia, aia nito itata tshana novai, nokoutucua iateia, Teriki sore, pe akoi neinofo icunei, tucu kave semate mana.

³³Wamuri Iesu neicitia aia nokotagi, ma tagata Juteia foci nokotagi acre niromai ia aia, IESU nokogu ia ta nokano, ma aroto nimai.

³⁴Ma neitucua, Wehe acowa neinage aia? Acre neitucua iateia, Teriki sore komai ma kowcitia.

³⁵Iesu natagi.

³⁶Iai tagata Juteia neitucua, Kowcitia aia acitiafakarafia aia sore.

³⁷Ma faru o acre neitucua, Konapecua tatane tenei, aia neimna kuara foimata o tagata foimata pouri, neitucuasana pe tatane tenei sematimana.

³⁸Iesu foci nikogu ia tshana roto nimai ia tapunaga o aia nimate. Aia tupunaga, ma tafatu sore iluga aia.

³⁹Iesu neitucua, Amke acowa tafatu. Martha ta nokave o aia nimate neitucua iateia, Teriki sore, iranei tshana noaga purou, ma aia nimate nopogi efa.

⁴⁰Iesu neitucua iateia, Avou neitucua iatakoi mo, pe akoi fakarogrogo akoi kacitia avere sore o Atua?

⁴¹Wamuri ra acre niamke tafatu ia none acre neinage aia nimate iai, ma Iesu nifakatariaga, ma neitucua, Tata avou kabisa iatakoi pe akoi nifakarogona avou.

⁴²Ma avou keiro akoi fakarogona avou nopoge ma nopoge; kaia ianei acre kotu itata avou neitucua ra, pe acre fakarogrogo pe akoi nikowna avou.

⁴³Wamuri aia nifasao ra, aia nitapa ia noreo palo, Lasarus komai efuafo.

⁴⁴Ma aia nimate nimai efuafo nifousia norima ma novai ia umega o acre nimate, ma tshana foimata nifeusia kofori ia tasi nuntafa tumega. Iesu neitucua iacre, Eivetea aia, ma erefia aia fano.

⁴⁵Wamuri ra nalupai tagata Juteia acre niromai ia Mery, ma neicitia anea mane Iesu neimna, nifakarogrogo aia.

⁴⁶Kaia faru o acre niroro niare aretu ia Afarasi, ma neitucua iacre ane iotshi Iesu neimna.

⁴⁷¶ Nopoge ra fatoriki o tafare mori ma Afarasi nifetacina fakatamou ma neitucua, Taha vere o acime? ma tatane tenei kovere avere sore nalupai.

⁴⁸Pe acime natshicina aia hepe nei, tagatotshi fakarogrogo aia; ma tagata Roma koromai ma amke none ma tagata tshome.

⁴⁹Ma tasi o acre neigo Kaiafas, tou ra aia neinofo teriki sore o tafare Ihova, neitucua iacre. Acowa puspusi ane iotshi.

⁵⁰Mo sekamintua pe erefia iacitia, pe tasi tatane kamate ia tagata, ma pe iotshi tagata o fanua tshome setakaroiai acre.

⁵¹Afasao tenei aiana seneitucua, kaia aia teriki sore o tafare tsha Ihova tou ra, aia nifasao hepe profeta pe Iesu kamate ia tagata o fanua ra;

⁵²Ma jimra ia tagata o fanua ra ana, kaia foci aia kafetacina ia fakatapuria tishana tagata o Atua nitarowiai iafanua.

⁵³Wamuri nopoge ra, nopoge ma nopoge acre nifakatamou keitshi aia komate.

⁵⁴Anera Iesu sekatakaro foci mokagi tagata Juteia; kaia nifeke iai nifano ia nuntafa fanua itata tugogou, ia tumrai tasi iai neigo Efreim, ma aia neinofo iai ia niana tagata aia nifakairo.

⁵⁵¶ Ma tacripoga o ta paska tsha tagata Juteia koitata, ma tagata nalupai nifeke umrai papai niroro ia Jerusalem mokagi ta paska, keipenpena acre erefia iateia.

⁵⁶Nopogera acre nifakasara Iesu, ma nifasao acre macre, hepe nitu ia tafare sore, o Ihova, Taha acowa kamentua, pe aia semai mana ia tacripoga?

⁵⁷Fatoriki o tafare mori ma Afarasi foci nifasao mukei, pe tatane tasi keiro aia wehe, aia fakairo acre, ma acre kapurutshia aia.