Read Futuna-Aniwa JOANES, 13 Bible Online

JOANES, 13 - Futuna-Aniwa bible

JOANES, 13

¹MOKAGI tacripoga o ta paska, Iesu nikeiro pe tshana nopoge komai pe aia kafeke fanua wararonei ma fano ia ta Mana, aia nakacitiafakarafia niana tagata acre neinofo ia fanua wararonei, aia neicitiafakarafia acre ia tshana mate.

²Wamuri acre nikeinace fiafi tiapolo nakanage ia roto o Jutas tatane Kariot keifakareresia aia.

³Iesu nikeiro pe ta Mana neitufwa ane iotshi ia tshana norima, ma pe aia nimai ia Atua, ma kafano ia Atua;

⁴Aia nimasike wamuri takai fiafi, ma niamke tshana mega iluga, ma niamo tasi tumega towel nitoutshi aia nifetacina iateia.

⁵Wamuri ra aia niregia tavai ia tasi taganea besin, ma neikamata tataroa novai o niana tagata aia nifakairo, ma keiaria acre ia tumege towel nitoutshi aia iateia.

⁶Aia nimai ia Saimona Pitrus; ma Pitrus neitucua iateia, Teriki sore, akoi tataroa tshaku novai, mo?

⁷Iesu nifasao ma neitucua iateia, Taha avou imna akoi puspusi milow, kaia akoi keiro ia taha nopogi.

⁸Pitrus neitucua iateia, Akoi kanatshicina tatoroa tshaku novai, Iesu nifasao iateia, Pe avou setataroa akoi, akoi jimra tshaku tagata.

⁹Saimona Pitrus neitucua iateia Teriki sore, jimra tshaku novai ana, kaia foci tshaku norima ma nouru.

¹⁰Iesu neitucua iateia, aia kotataroace erefia tataroa tshana novai ana, kaia iotshi aia koma, ma acowa koma, kaia jimra acowa iotshi.

¹¹Ma aia nikeiro akai kafakareresia aia, anera aia neitucua acowa iotshi jimra koma.

¹²Wamuri aia tataroace tshare novai; ma niamo tshana mega iluga, ma neinofo foci, aia neitucua iacre, Keiro acowa taha avou nakamna iacowa, mo?

¹³Acowa tapa avou Teriki fakairo ma Teriki sore; ma erefia niawa fasao, ma avou aia.

¹⁴Pe avou, tshowa Teriki sore, ma Teriki fakairo nakatataroa niawa novai, erefia acowa foci tataroa avai o tasi ma sece acowa.

¹⁵Ma avou nakatufwa iacowa maganera, pe acowa foci imna magane hepe avou neimna iacowa.

¹⁶Tamari, tamari, avou koutucua iacowa, ta fetshicow jimra sore kage tshana teriki, ma jimra aia kokowna sore kage aia nikowna aia.

¹⁷Pe acowa keiro ane iotshi ra, kabisa acowa pe acowa imna acre.

¹⁸¶ Avou sekoutucua ra o acowa iotshi; avou keiro akai avou neikamate, kaia pe imna magane hepe neiserea i tatapuria tapu, aia kakeina bret iatavou tshicitshia nomuru vai feimacowa avou.

¹⁹Milow avou koutucua iacowa mokagi ane ra komai, pe taha nopoge aia komai, acowa kafarogrogo avou.

²⁰Tamari, tamari, avou koutucua iacowa, Aia koamo tagata avou kowna, aia koamo avou ma aia koamo avou, koamo aia nikowna avou.

²¹Wamuri Iesu nifasao ra, aia nimy ia tshana nokano, ma nifasao, ma neitucua, Tamari, tamari, Avou koutucua iacowa, pe tasi o acowa kafakareresia avou.

²²Iai niana tagata aia nifakairo neicitia tasi ma sece, sekeiromana akai aia nifasao iateia.

²³Iai neinofo itata nofatfata o Iesu tasi o niana tagata aia nifakairo, aia Iesu neicitiafakarafia.

²⁴Saimona Pitrus anera neitutusiana iateia, pe aia fakowia Iesu o akai aia nifasao.

²⁵Aia iai nokomoi itata nofatfata o Iesu neitucua iateia, Teriki sore, Aia akai?

²⁶Iesu nifasao, Aia avou katufwa ta nopito wamuri avou fuieifo aia ia ane nasepeia. Ma wamuri aia nageifoci ta nopito ia ane nasepeia, aia neitufwa aia ia Jutas tatane Kariot, ta nontariki o Saimona.

²⁷Ma wamuri ta nopito Satana nifano ia aia, Iai Iesu neitucua iateia, Taha akoi imna, imna nilowa.

²⁸Ma jimra tatane tasi ia ta fata nikeiro tiaha Iesu neitucua afasao ra iateia.

²⁹Ma faru nimentua, ianei Jutas niamo ta kato o mone, pe Iesu neitucua iateia, Fakamata ane otshira acime acitiafakarafia ia tacripoga; mo, pe aia katufwa faru ane ia tagata niare ane jimra.

³⁰Wamuri aia niamo ta nopito, nifano milowa efuafo; ma aia tupo iai.

³¹¶ Wamuri aia nifano efuafo, Iesu neitucua, Milow ta Nontariki o tagata ta sore, ma Atua ta sore ia aia.

³²Pe Atua ta sore ia aia, Atua foci kamna aia ta sore ia aia, ma milowa kamna aia ta sore.

³³Erecriki sisi, fakasisi foci avou konofo iacowa. Acowa kasara avou; ma hepe avou neitucua ia tagata Juteia, Ia none avou kofano iai, acowa kotaru komai, hepe milow avou koutucua iacowa.

³⁴Tasi fou tafasao tapu avou eitufwa iacowa, Pe acowa acitiafakarafia tasi ma sece o acowa iotshi; hepe avou nakacitiafakarafia acowa, erefia pe acowa foci acitiafakarafia tasi ma sece o acowa iotshi.

³⁵Ia ane nei tagatotshi keiro pe acowa tshaku tagata avou fakairo, pe acowa kamo acitiafakarafia ia tasi ma sece o acowa iotshi.

³⁶¶ Saimona Pitrus neitucua iateia, Teriki sore, wehe akoi kofano? Iesu nifasao iateia, Ia none avou fano iai, akoi kotaru komai wamuri avou milow, kaia akoi kamai wamuri avou nagimana.

³⁷Pitrus neitucua iateia, Teriki sore, tiaha avou taru komai wamuri akoi milow? Avou kanagi tshaku aniamouri iatakoi.

³⁸Iesu nifasao iateia, Akoi kanagi tshou ania mouri iatavou? Tamari, tamari, avou koutucua iatakoi, Ta moa sekoko mokagi akoi kavetea avou fakatoru.