Read Futuna-Aniwa JOANES, 14 Bible Online

JOANES, 14 - Futuna-Aniwa bible

JOANES, 14

¹NATSHICINA niawa roto komy, acowa fakarogrogo Atua, fakarogrogo avou foci.

²Ie tafare o tshaku Tata afare sore nalupai; pe jimra, avou nakatucua iacowa, Avou fano keipenpena tasi none iacowa.

³Ma pe avou fano ma penpena tasi none iacowa, avou kamai foci, ma arafia acowa iatavou; ma ia none avou nofo iai, acowa foci nofo iai.

⁴Ma ia none avou kofano iateia acowa keiro, ma teretu acowa keiro.

⁵Tomas neitucua iateia, Teriki sore, acime puspusi ta none akoi kofano iai, ma konapecua acime keiro teretu, mo?

⁶Iesu neitucua iateia, Avou ta teretu, ta mari, ma ta mouri; jimra tasi tatane komai ia ta Mana, kaia ia avou.

⁷Pe acowa nikeiro avou, acowa foce makeiro ta Mana; ma wamuri nei acowa keiro aia, ma nakacitia aia.

⁸Felipos neitucua iateia, Teriki sore, fakariake acime ta Mana ma acime komari.

⁹Iesu neitucua iateia, Tiaha avou nakonofo iacowa ituai, ma akoi milow sekeiromana avou Felipos? Aia nakacitia avou, nakacitia ta Mana; ma tiaha akoi koutucua, Fakariake acime ta Mana?

¹⁰Fakarogrogo akoi, mo pe avou konofo ia ta Mana, ma ta Mana ia avou? Afasao avou koutucua iacowa, avou ana sekoutucua; kaia ta Mana aia konofo ia avou, aia imna avere sore.

¹¹Fakarogrogo avou pe avou konofo ia ta Mana, ma ta Mana ia avere sore ana.

¹²Tamari, tamari, avou koutucua iacowa, Aia pe fakarogrogo avou, avere sore avou imna aia foci kamna; ma avere sore kagi acre aia kamna, ianenei avou fano ia tshaku Tata.

¹³Ma ane iotshi acowa kanogia ia tshaku neigo, ane ra avou kamna pe ta Mana makamna ta sore ia ta Nontariki.

¹⁴Pe acowa kanogia ane tasi ia tshaku neigo, avou imna aia.

¹⁵¶ Pe acowa acitiafakarafia avou, maganerefia ia tshaku fasao tapu.

¹⁶Ma avou kamori ta Mana, ma aia katufwa acowa tasi foci aia imna arotowa kabisa, pe aia konofo iacowa tou ma tou;

¹⁷Aia ta Nokano o ta mari, tagata o fanua wararonei taru keiamo aia, kaia acre secitiamana aia, ma sekeiromana aia, kaia acowa keiro aia, ma aia konofo ia acowa, ma kanofo i arotowa.

¹⁸Avou sekafeke acowa ma arotowa kotagi; avou komai iacowa.

¹⁹Nopoge toru ana foci ma fanua wararonei secitiamana avou foci, kaia acowa kowcitia avou, ianei avou komouri, acowa foci kamouri.

²⁰Ia taha nopogetera acowa keiro pe avou nofo ia tshaku Tata, ma acowa ia avou, ma avou ia acowa.

²¹Aia niamo tshaku afasao tapu, ma maganerefia iateia, aia acitiafakarafia avou, ma aia acitiafakarafia avou tshaku Tata kacitiafakarafia aia, ma avou kacitiafakarafia aia, ma katufwa aia keiro avou.

²²Jutas neitucua iateia, jimra aia tatane Kariot, Teriki sore, Konapecua akoi katufwa acime kowcitia akoi, ma jimra ia fanua wararonei?

²³Iesu nifasao ma neitucua iateia, Pe tasi tatane acitiafakarafia avou, aia kapurutshia tshaku fasao; ma tshaku Tata kacitiafakarafia aia acimawa koromai iateia, ma konofo mukei ia aia.

²⁴Aia secitiafakarafia avou sepurutshia tshaku afasao; ma tafasao acowa korogona aia jimra tshaku, kaia tsha Tamana aia nikowna avou.

²⁵Ane iotshi ra avou nokofasao iacowa, nopoge nei avou nokonofo iacowa.

²⁶Kaia aia imna arotowa kabisa, aia ta Nokano Tapu, aia ta Mana kakowna ia tshaku neigo, aia kafakairo acowa ane iotshi, ma asitu acowa ane iotshi ra avou nakatuca iacowa.

²⁷Kogapu avou nagi iacowa, tshaku kogapu avou tufwa iacowa; jimra hepe fanua wararone tufwa, avou tufwa iacowa. Natshicina tshowa roto komy, ma natshicina aia kumtacu.

²⁸Acowa nakarogona taha avou neitucua iacowa, Avou fano, ma komai foci iacowa, Pe acowa acitiafakarafia avou acowa kabisa, afasao ra avou neitucua, Avou fano ia ta Mana, ma tshaku Tata kosore kage avou.

²⁹Ma milow avou koutucua iacowa mokagi aia komai, pe taha nopoge aia komai acowa fakarogrogo.

³⁰Wamuri ra avou jimra fasao sore iacowa; ma teriki o fanua wararonei nokomai, ma tshana ane senofo ia avou.

³¹Kaia pe tafanua wararonei mukeiro pe avou acitiafakarafia ta Mana, ma hepe ta Mana neitufwa avou ta fasao tapu mukei, Avou imna hepra. Masike acitia feke icunei ma fano.