Read Futuna-Aniwa JOANES, 15 Bible Online

JOANES, 15 - Futuna-Aniwa bible

JOANES, 15

¹AVOU ta vaini mari, ma tshaku Tata tatane fatshigeia aia.

²Iotshi nora ia avou pe aia sekohua aia amke; ma iotshi nora pe kohua, aia penpena aia, pe aia kohua sore kagi.

³Milow acowa koma ia ta fasao avou nakoutucua.

⁴Konofo ia avou, ma avou ia acowa. Hepe ta nora sekohua pe aia senofo ia ta vaini, foci jimra acowa pe acowa senofo ia avou.

⁵Avou ta vaini, acowa anora; Aia konofo ia avou, ma avou ia aia, aia kohua nalupai; ma pe avou jimra asitu, acowa taru ia ane iotshi.

⁶Pe tatane tasi senofo ia avou, katouwaki aia hepe tasi nora, ma aia komero; ma tagata fetacina acre, ma towaki acre ia tiafii, ma acre koka.

⁷Pe acowa konofo ia avou, ma tshaku afasao konofo ia acowa, kanogia taha acowa acitiafakarafia, ma aia kamna iacowa.

⁸Ia ane nei tshaku Tata kosore pe acowa kohua nalupai; hepe ra kamo acowa tshaku tagata avou fakairo.

⁹Hepe ta Mana nakacitiafakarafia avou, hepe avou nakacitiafakarafia acowa; nofo acowa ia tshaku acitiafakarafia.

¹⁰Pe acowa maganerefia ia tshaku afasao tapu, acowa konofo ia tshaku acitiafakarafia; hepe avou maganerefia ia afasao tapu o tshaku Tata, ma konofo ia tshana acitiafakarafia.

¹¹Ane iotshi ra avou nokoutucua iacowa pe tshaku kabisa konofo mukei iacowa, ma pe tshowa kabisa kafonu.

¹²Tenei tshaku tafasao tapu, Pe acowa acitiafakarafia tasi ma sece o acowa iotshi, hepe avou nakacitiafakarafia acowa.

¹³Acitiafakarafia sore kagi tenei jimra tasi tatane nakamo, pe tatane tasi nagi tshana anea mouri ia tshana aneli.

¹⁴Acowa niaku aneli, pe acowa emna ane iotshi avou fakairo mukei acowa iateia.

¹⁵Wamuri nei avou setapa acowa afetshicow; ma ta fetshicow puspusi taha tshana teriki emna, kaia avou nakatapa acowa aneli; ma ane iotshi avou nakarogona o tshaku Tata, avou nakafakairo iacowa.

¹⁶Acowa secitiafakarafia avou mokagi, kaia avou nakacitiafakarafia acowa mokagi, ma neinagi acowa, pa acowa kororo ma amo nohua, ma pe niawa nohua konofo; pe ane iotshi acowa kanogia ta Mana ia tshaku neigo, aia katufwa iacowa.

¹⁷Ane iotshi ra avou fakairo mukei acowa acitiafakarafia tasi ma sece iotshi o acowa.

¹⁸Pe tagata o fanua wararonei feimacowa acowa, acowa keiro pe aia feimacowa avou mokagi aia feimacowa acowa.

¹⁹Pe acowa tagata o fanua wararonei, ta fanua wararonei acitiafafakarafia niana tagata; kaia ianenei acowa jimra o fanua wararonei kaia avou neikamata acowa ia fanua wararonei, ianenei fanua wararonei feimacowa acowa.

²⁰Kamentua ta fasao avou neitucua iacowa, Ta fetshicow kojimra sore kagi tshana teriki, Pe acre nakasewa avou, acre foci kasewa acowa; pe acre nakapurutshia tshaku fasao, acre kapurutshia niawa foci.

²¹Kaia ane iotshira acre kamna iacowa ia tshaku neigo, ianei acre puspusi aia nikowna avou.

²²Pe avou semai ma nifasao iacre, niare ane isa kojimra, kaia milow ane senofo iacre mune niare ane isa.

²³Aia feimacowa avou feimacowa tshaku Tata foci.

²⁴Pe avou seneimna iacre avere sore, jimra tatane foci neimna hepra, niare maganisa kojimra, kaia milow acre nakacitia ma nifeimacowa avou ma tshaku Tata.

²⁵Kaia ane nei komai hepe neisereace ia niare tatapuria tapu, Acre nifeimacowa avou ana nontafito jimra iateia.

²⁶Kaia taha nopoge aia komai keitufwa aroto kabisa, aia avou kowna iacowa ia Tamana, aia ta Nokano o tamari, aia nokomai ia ta Mana, aia kafakairo acowa o avou.

²⁷Ma acowa foci kafakairo, ianenei acowa neinofo iatavou ia nontafito.