Read Futuna-Aniwa JOANES, 16 Bible Online

JOANES, 16 - Futuna-Aniwa bible

JOANES, 16

¹ANE iotshi ra avou nakatucua iacowa, pe acre setakaroiai arotowa.

²Acre kasegeake acowa efuafo afare mori; keini ia taha nopoge aia kotaia acowa komaie, kamentua aia vere ia Atua.

³Ane iotshi ra acre kamna iacowa, ianenei acre sekeiro ta Mana mo avou.

⁴Kaia ane iotshi ra avou nakatucua iacowa, pe taha nopoge iateia komai, acowa kamentua avou neitucua iacowa o acre. Ma ane iotshi ra avou seneitucua iacowa ia neikamata, ma avou neinofo iacowa.

⁵Kaia milow avou fano tshaku retu ia aia nikowna avou; ma jimra tasi o acowa fakowia avou, Wehe akoi kofano?

⁶Kaia ane ra avou nakatucua iacowa imna arotowa nifonu tamai iateia.

⁷Kaia avou koutucua iacowa ta mari, Erefia iacowa pe avou fano; ma pe avou sefano mana, aia keitufwa aroto kabisa sekamai iacowa; kaia pe avou feke, avou kowna aia iacowa.

⁸Ma taha nopoge aia komai, aia kaseciria fanua wararonei o ane isa, ma o maganerefia, ma o ioria magane;

⁹O ane isa ianenei acre sefakarogrogo avou;

¹⁰O maganerefia, ianenei avou kofano ia tshaku Tata, ma acowa secitiamana foci avou.

¹¹O ioria magane, ianenei ta teriki o tenei iafanua wararonei tshana ioria koutucua.

¹²Avou nakamo wamuri nei ane nalupai koutucua iacowa, kaia acowa kotaru fakarogona acre milow.

¹³I taha nopoge aia ta Nokano o tamari, komai, aia karafia acowa ia tamari iotshi; ma aia sefasao o aia; kaia ane iotshi aia karagona aia katucua; ma aia kafakariakatu iacowa anea mane kamai taha nopoge.

¹⁴Aia katufwa ta sore iatavou; ma aia kamo faru o tshaku, ma aia kafakariakatu iacowa.

¹⁵Ane iotshi ta Mana nakoamo acre tshaku, ianenei avou neitucua aia koamo o tshaku ma kafakariakatu iacowa.

¹⁶Nopoge toru ana, ma acowa secitiamana avou; ma foci nopoge toru ana, ma acowa kacitia avou, ianenei avou fano ia ta Mana.

¹⁷Iai faru niana tagata aia nifakairo neitucua acre macre Taha tenei aia neitucua iacitia, Nopoge toru ana, ma acowa secitiamana avou; ma foci nopogi toru ana, ma acowa kacitia avon; ianenei avou fano ia ta Mana?

¹⁸Acre neitucua, Taha tenei aia koutucua. Nopoge toru ana? acitia puspusi taha aia neitucua.

¹⁹Milow Iesu nikeiro pe acre neicitiafakarafia keifakowia aia, ma neitucua iacre, Acowa fakowia acowa, mo, o afasao avou neitucua, Nopoge toru ana, ma acowa secitiamana avou; ma foci nopoge toru ana, ma acowa kacitia avou?

²⁰Tamari, tamari, avou koutucua iacowa, Pe acowa katagi ma kamakuru, kaia tagata o fanua wararonei kabisa; ma niawa roto kamy sore, kaia niawa amy katafuri ia Kabisa.

²¹Ta fine pe aia amy ia farere nuntama kotagi, ma tshana nopoge komai iateia; kaia wamuri aia kofarere nuntama, aia nigaro milowa tshana amy sore, ma kabisa pe tatane kofarere ia fanua wararonei.

²²Ma milow arotowa nakamy; kaia avou kacitia acowa foci, ma arotowa kabisa, ma tshowa kabisa jimra tagata tasi amke ia acowa.

²³Ma ia taha nopoge tira acowa sefakowia avou ane. Tamari, tamari, avou koutucua iacowa, Ane iotshi acowa kanogia ta Mana ia tshaku neigo, aia katufwa iacowa.

²⁴Mokagi nei acowa senogia ane tasi ia tshaku neigo, nogia, ma aia katufwa iacowa, pe niawa kabisa kofonu.

²⁵Ane iotshi ra avou nakafasao iacowa ia fakatagasia, kaia taha nopoge nokomai, avou sefasao iacowa foci ia fakatagasia, kaia avou kafakariakatu acowa totonu o ta Mana.

²⁶Ia taha nopoge tera acowa kanogia ia tshaku neigo, ma avou sekoutucua iacowa, pe avou kamori ta Mana iacowa.

²⁷Ma ta Mana aia acitiafakarafia acowa, ianenei acowa, acitiafakarafia avou, ma nakafakarogrogo pe avou nimai ia Atua.

²⁸Avou nimai watafa ia ta Mana, ma avou komai ia fanua wararonei; foci avou feke fanua wararonei, ma fano ia ta Mana.

²⁹Niana tagata aia nifakairo neitucua iateia, Kai milow akoi fasao totonu ana ma jimra ia fakatagasia.

³⁰Milow acime keiro tamari pe akoi keiro ane iotshi, ma secitia fakarafia tagata fakowia akoi; ia ane tenei acime fakarogrogo akoi nimai ia Atua.

³¹Iesu nifasao iacre, Milow acowa fakarogrogo, mo?

³²Kowcitia ta nopoge komai, keine milow aia komai, pe acowa terowiai tasi ma sece ia niana tagata, ma kanatshicina avou ana; kaia avou senofo ana, ma ta Mana konofo iatavou.

³³Ane iotshi ra avou nakatucua iacowa, pe ia avou acowa kagapu. Ia fanua wararonei ane isa kamna arotowa komy; kaia kabisa acowa, avou tomatua sore kage fanua wararonei.