Read Futuna-Aniwa JOANES, 17 Bible Online

JOANES, 17 - Futuna-Aniwa bible

JOANES, 17

¹AFASAO ra Iesu neitucua, ma nifakatariaga ma neitucua, Tata, ta nopoge komai; emna ta sore tshou Nontariki, pe tshou Nontariki emna foci sore akoi.

²Hepe akoi neitufwa aia tomatua sore kage tagatotshi, pe aia keitufwa ania mouri tou ma tou ia acre akoi neitufwa aia.

³Ma tenei anea mouri tou ma tou, pe acre keiro akoi ana ta Atua mouri ma Iesu Kristo aia akoi nikowna.

⁴Avou nakamna akoi ta sore ia fanua wararonei, avou nakavere iotshi kurava akoi neitufwa avou keimna.

⁵Ma milow, Tata imna avou ta sore ia akoi ia ta sore avou niamo ia akoi mokagi iafanua wararonei neinofo.

⁶Avou nifakairo tshow neigo ia tagata akoi neitufwa avou ia fanua wararonei; acre niau, ma akoi neitufwa avou, komai ia akoi.

⁷Milow acre nakeiro pe ane iotshi akoi neitufwa avou, komai ia akoi.

⁸Ma avou nakatufwa iacre afasao akoi neitufwa avou; ma acre nakoamo acre, ma nakeiro ta mari avou nimai ia akoi, ma acre nakafakarogrogo pe akoi nikowna avou.

⁹Avou mori akoi ia acre; Avou semori ia fanua wararonei, kaia ia acre akoi neitufwa avou, ma acre niau.

¹⁰Ma iotshi niaku acre niau, ma niau acre niaku; ma avou ta sore ia acre.

¹¹Ma wamuri nei avou senofo foci ia fanua wararonei, kaia acre ra konofo ia fanua wararonei, ma avou komai iatakoi, Tata Erefisa, kapare ia neigo tshou acre akoi neitufwa avou, pe acre konofo tasi ana, hepe acimawa konofo.

¹²Anopoge avou neinofo iacre i fanua waronei, avou nipare acre ia neigo tshou, acre akoi neitufwa avou avou nipare, ma jimra tasi o acre kojimra kaia ta nontariki o ta tumrai isa, hepe tatapuria tapu neisereace ituai.

¹³Ma milow avou komai iatakoi, ma ane iotshi ra avou fasao ia fanua wararonei, pe keitufwa iacre tshaku kabisa i acre.

¹⁴Avou nakatufwa iacre tshou afasao; ma fanua wararonei nakafeimacowa iacre, ianenei acre jimra o fanua wararonei, hepe avou jimra o fanua wararonei.

¹⁵Avou mori jimra pe akoi amke acre watafa fanua wararonei, kaia pe akoi kapare acre ia ane isa iai.

¹⁶Acre kojimra o fanua wararonei, hepe avou kojimra o fanua wararonei.

¹⁷Penpena erefia arotorea ia tshou tamari, tshou afasao komari.

¹⁸Hepe akoi nikowna avou ia fanua wararonei, hepe foci avou nakakowna acre ia fanua wararonei.

¹⁹Ma ia acre avou penpena erefia avou, pe penpena erefia acre foci ia tamari.

²⁰Ma avou sekomori akoi ia acre ana, kaia ia acre iotshi foci kafakarogrogo avou ia tshare fasao.

²¹Pe acre iotshi konofo ko tishana hepe akoi Tata konofo ia avou, ma avou ia akoi, pe acre foci ko tishana ia acimowa; pe fanua wararonei fakarogrogo pe akoi nikowna avou.

²²Ma ta sore akoi neitufwa avou avou nakatufwa iacre, pe acre konofo ia tishana, hepe acimawa ko tishana.

²³Avou ia acre, ma akoi ia avou, pe kapenpena erefia acre ia tishana; ma pe keifakairo fanua wararonei akoi nikowna avou, ma neicitifakarafia acre, hepe akoi neicitiafakarafia avou.

²⁴Tata erefisa, avou foci acitiafakarafia pe acre akoi neitufwa avou, konofo ia avou ia ta none avou konofo iai, pe acre kacitia tshaku ta sore, akoi neitufwa avou; ma akoi neicitiafakarafia avou mokagi ta nontafito o fanua wararonei.

²⁵Tata erefisa, ta fanua wararonei sekeiro akoi; kaia avou nakeiro akoi, ma acre ra nikeiro akoi nikowna avou.

²⁶Ma avou nakafakairo acre tshou neigo, ma kafakairo acre aia, pe acitiafakarafia tenei akoi neicitiafakarafia avou ia aia konofo iacre, ma avou ia acre.