Read Futuna-Aniwa JOANES, 18 Bible Online

JOANES, 18 - Futuna-Aniwa bible

JOANES, 18

¹WAMURI Iesu neitucua afasao ra, aia nifano watafa ia niana tagata aia nifakairo ia nofokagi tavai tafe Kitron, tavere tasi iai, iateia aia nifano ia niana tagata aia nifakairo.

²Jutas foci, aia nifakareresia aia, nikeiro ta none; ma Iesu ia nopoge nalupai nifano iai ia niana tagata aia nifakairo.

³Jutas niamo tagata ma afetshicow sore o fatoriki o tafare mori ma o Afarasi, niarafia acre iai ia alampe, ma alama, ma ania mane tsha tatowa.

⁴Iesu nikeiro ane iotshi kamai iatei, nifano watafa, ma neitucua iacre, Akai acowa fatshigeia?

⁵Acre neitucua iateia Iesu o Nasareth. Iesu neitucua iacre, Avou aia. Ma Jutas foci aia fakareresia aia nitu ia acre.

⁶Milowa wamuri aia neitucua iacre, Avou aia, acre niroroce muri ma nito ia takere.

⁷Iai aia nifakowia foci acre, Akai acowa fatshigeia? Acre neitucua, Iesu o Nasareth.

⁸Iesu nifasao, Avou nakatucua iacowa, pe avou aia; pe acowa fatshigeia avou, erefia acre ra kororo niare aretu.

⁹Pe neimna hepra tafasao aia neitucua, O acre iotshi akoi neitufwa avou jimra tasi koto.

¹⁰Iai Saimona Pitrus niamo tomatshira palo nitorotshia aia, ma nisawa ta fetshicow o ta teriki o ta fare mori, ma nisawace tshana nontariga matou. Neigo o ta fetshicow ra Malkus.

¹¹Iai Iesu neitucua ia Pitrus, Nagi tshou tomatshira palo ia takato iateia, taganea kup tshaku Tata neitufwa avou, avou kanatschicina kanumea aia, mo?

¹²Wamuri ra tagata ma niare teriki, ma afitshicow o tagata Juteia, niamo Iesu, ma nifousia aia.

¹³Ma niarafia aia ia Anas mokagi; ma aia noraimutu o Kaiafas; ta teriki sore o tafare Ihova tou ra.

¹⁴Ma Kaiafas aia neitucua ia tagata Juteia, pe erefia tatane tasi kamate ia tagatotshi.

¹⁵¶ Saimona Pitrus nifano wamuri Iesu, ma tasi foci niana tagata aia nifakairo, tasi tera teriki sore o tafare mori nikeiro, ma aia nifano ia Iesu ia tafare sore o teriki o tafare mori.

¹⁶Kaia Pitrus nitu ia tafeitoca watafa, Iai nifano efuafo tatane foci tera Iesu nifakairo, teriki sore o tafare mori nikeiro aia, ma aia nifasao ia ta fine nei fatshigeia tafeitoca, ma niarafia efare Pitrus.

¹⁷Iai ta fine sisi nifatshigeia tafeitoca neitucua ia Pitrus, Akoi ma tasi foci o acre tatane tenei nifakairo, mo? Aia neitucua, Avou jimra.

¹⁸Ma afitshicow ma fatoriki nitu iai, acre neinagi tiafi o tafia marara ma aia mukaligi, ma acre nimuru acre, ma Pitrus nitu ia acre ma nimuru aia.

¹⁹¶ Ta teriki o tafare mori nifakowia Iesu o niana tagata aia nifakairo, ma o tshana fasao aia nifakairo.

²⁰Iesu nifasao aia, Avou nifasao mokagi tagatotshi wararonei; nopoge ma nopoge avou nifakairo ia ta fare mori, ma ia tafare sore o Ihova, iai tagata Juteia nifetacina nopoge ma nopoge, avou sefasao mune.

²¹Tiaha akoi fakowia avou? fakowia acre neirogona avou, taha avou nakatucua iacre, kowcitia acre keiro taha avou neitucua.

²²Wamuri aia nifasao ra, tasi o acre afishicow sore aia nitu itata, niferpacia Iesu, nokoutucua, Tiaha akoi fasao hepra ia teriki o tafare mori?

²³Iesu nifasao iateia, Pe avou nakafasao isa, fakairo ta isa; kaia pe erefia, tiaha akoi ferpacia avou?

²⁴Anas nikowna aia nifousia ia Kaiafas ta teriki sore o tafare mori.

²⁵Ma Saimona Pitrus nitu ma nimuru aia, Acre neitucua iateia, Akoi tasi o niana tagata aia nifakairo, mo? Aia nikovetea, ma neitucua, Avou jimra.

²⁶Tasi fetshicow o teriki sore o tafare mori, aia tshana neli, aia Pitrus nisawace tshana nontariga, neitucua, Avou neicitia akoi i tavere ia aia, mo jimra?

²⁷Pitrus iai nivetea foci; ma milowa ta moa mikoko.

²⁸¶ Wamuri ra acre niarafia Iesu nifeke Kaiafas ma roro ia tafare sore tsha koutucua ioria o maganisa iai; ma aia tapopo ana; ma acre sefano ia tafare sore tsha koutucua ioria o maganisa, pe setakaroiai acre iai; kaia pe acre keina ta paska.

²⁹Pailet iai nifano efuafa iacre, ma neitucua, Taha ane isa acowa koutucua o tenei tane?

³⁰Acre nifasao ma neitucua iateia, Pe aia jimra tatane isa acime searafia aia iatakoi.

³¹Iai Pailet neitucua iacre, Amo aia acowa, ma ioria aia hepe tshowa fasao tapu fakairo. Tagata Juteia neitucua iateia, Aia itapu iacime kotshi komate tasi tagata;

³²Pe ane komai hepe tafasao o Iesu, tafasa aia neitucua nokofakairo acre ta mate aia kamate iateia.

³³Wamuri ra Pailet nifano foci efare sore koutucua ioria magane iai, ma nitapa Iesu, ma neitucua iateia, Akoi Teriki o tagata Juteia, mo?

³⁴Iesu nifasao iateia, Akoi ana koutucua ta fasao nei, mo tagata faruke neitucua iatakoi ane ra o avou?

³⁵Pailet nifasao, Avou tasi Tagata o Juteia, mo? Tshou tagata ma fateriki o ta fare mori niarafia akoi iatavou. Taha akoi neimna?

³⁶Iesu nifasao, Tshaku vaka jimra o fanua wararonei; pe tshaku vaka o fanua wararonei, tshaku afitshicow kofitai, pe setufwa avou ia tagata Juteia, kaia milow tshaku vaka kojimra icunei.

³⁷Afasao ra neimna Pailet neitucua iateia, Akoi tasi teriki, mo? Iesu nifasao, Akoi koutucua pe avou tasi teriki. Ianenei nifarere avou, ma ianenei avou nimai ia fanua wararonei, pe avou fakairo ta mari. Iotshi tagata o tamari fakarogona tshaku noreo.

³⁸Pailet neitucua iateia, Taha komari? Ma wamuri aia neitucua tenei, aia nifano efuafo foci ia tagata Juteia, ma neitucua iacre, Avou sekowcitia ane isa tasi ia aia.

³⁹Kaia magane tasi tshowa konofo, pe avou eivetea tasi tagata iacowa ia ta paska, ianenei acowa acitiafakarafia avou eivetea iacowa ta Teriki o tagata Juteia?

⁴⁰Iai acre iotshi nitapa foci, nokoutucua, Jimra tatane nei kaia Barabas. Ma Barabas aia tagata nitshigo.