Read Futuna-Aniwa JOANES, 20 Bible Online

JOANES, 20 - Futuna-Aniwa bible

JOANES, 20

¹IA nopoge tasi mokagi o ta wik nimai Mery o Mactala ia tapopo ana, apouri sefeke, ia ta tupunaga, ma neicitia ta fatu nifurusiace ia tupunaga.

²Wamuri ra aia nitere nimai ia Saimona Pitrus, ma ia tasi foci niana tagata aia nifakairo, aia Iesu neicitiafakarafia, ma neitucua iacrawa, Acre niamke ta Teriki soro watafa ta tupunaga, ma acime puspusi ta none acre neinage aia iai.

³Pitrus ma tatane foci tera aia nifakairo niroro efuafo ma niromai ia ta tupunaga.

⁴Hepe acrowa nifura, ma tasi foci tatane aia nifakairo nitere mokagi Pitrus, ma nimai mokagi ia tupunaga.

⁵Ma aia nokomomoi ma neicitia umega lenen nokomoi; kaia aia sefano ia tupunaga.

⁶Wamurira Saimona Pitrus nimai wamuri aia, ma nifano ia ta tupunaga, ma neicitia umega lenen nimoi iai,

⁷Ma ta nuntafa, hanketsif, nifousia tshana nourou, jimra nekomoi ia umega lenen, kaia nipuria ia nuntafa foci aiana iai.

⁸Wamuri ra nifano ia roto foci tera tasi foci tatane aia nifakairo, aia nimai mokagi ia ta tupunaga, ma aia neicitia ma nifakarogrogo.

⁹Ma mokagi ra acre sekeiro tafasao tapu neisereace, pe aia kamasike foci ia tagata komate.

¹⁰Wamurira niana tagata aia nifakairo niroro foci ia niarowa umrai.

¹¹Kaia Mery nitu watafa ia tupunaga mokotagi iai; ma hepe aia nitagi aia nimomoi ma nifatshigcia ia tapunaga.

¹²Ma neicitia erua agelo ia umega kego nokonofo, tasi ia ta nouru, ma tasi foci ia novai, ia none ta noaga o Iesu nimoi iai.

¹³Acrawa neitucua iateia, Fine tiaha akoi kotagi? Aia neitucua iacrawa, Anera acre niamke tshaku Teriki sore, ma avou puspusi none wehe acre neinage aia.

¹⁴Ma wamuri aia neitucua ra, aia nitafuri, ma neicitia Iesu nokotu, ma sekeiromana aia Iesu.

¹⁵Iesu neitucua iateia, Fine tiaha akoi kotagi? akoi nakasara akai? Aia nimentua aia tatane nifatshigeia ta vere iai, neitucua iateia, Teriki pe akoi niamke aia ia none foci, koutucua iatavou none wehe akoi neinage aia, ma avou kamke aia.

¹⁶Iesu neitucage iateia, Mery. Aia nitafuri, ma neitucua iateia, Raboni, nokano tera, Teriki fakairo.

¹⁷Iesu neitucua iateia, Natshicina tofia avou; ma avou sefitshi iluga ia tshaku Tata; kaia fano ia tshaku anoso, ma koutucua iacre, avou fitshi ia tshaku Tata, ma tshowa Tamana, ma ia tshaku Atua, ma tshowa Atua.

¹⁸Mery o Mactala nimai ma neitucua niana tagata aia nifakairo, pe aia neicitia ta Teriki sore, ma pe aia neitucua ane iotshi ra iateia.

¹⁹¶ Ia nopoge tera ia fiafi, aia nopoge tasi mokagi acre o ta wik, wamuri afeitoca nipofna ia tafare niana tagata aia nifakairo nifetacina iai, ma acre nimtacu tagata Juteia, Iesu nimai ma nitu ia aroto, ma neitucua iacre, Kogapu arotoua merino.

²⁰Ma wamuri aia nifasao ra, aia fakareake acre tshana norima ma nokowperperi. Iai uiana tagata aia nifakairo nibisa, wamuri acre neicitia ta Teriki sore.

²¹Iai Iesu neitucua foci iacre, Kogapu arotua merino. Hepe tshaku Tata nikowna avou, hepe foci avou kowna acowa.

²²Wamuri aia neitucua tenei, aia nimopsake iluga acre, ma neitucua iacre, Amo acowa ta Nokano Tapu;

²³Pe acowa towaki nori maganisa o tagata, seioria maganisa tshare, ma pe acowa nage nori maganisa o tagata iacre, ioria maganisa tshare konofo mukei iacre.

²⁴¶ Kaia Tomas tasi o acre ta twelv, nitapa neigo foci Tetemus, senofo ia acre tupo ra Iesu nimai iacre.

²⁵Ma acre iotshi niana tagata aia nifakairo neitucua iateia, Acime nakacitia ta Teriki sore. Kaia aia neitucua iacre, Pe avou secitia mana ia tshana norima ta fotu o aviri ma nage tshaku matshikorima ia ta nogau o aviri, ma nage tshaku norima ia tshana takowperperi, Avou kanatshicina fakarogrogo.

²⁶Ma wamuri nopoge varu foci niana tagata aia nifakairo neinofo efare ma Tomas ia acre; Iesu nimai iai, afeitoca, iotshi nipofna, ma nitu i aroto, ma neitucua, Kogapu arotowa merino.

²⁷Iai aia neitucua ia Tomas, Fakatonusia tshou matshikorima, ma kowcitia tshaku norima; ma fakatonusia tshou norima ma nage aia ia tshaku takowperperi; ma natshicina sefakarogrogo kaia nokofakarogrogo.

²⁸Tomas nifasao ma neitucua iateia, Tshaku Teriki sore, ma tshaku Atua.

²⁹Iesu neitucua iateia, Tomas ianenei akoi nokowcitia avou, akoi nifakarogrogo; erefisa kagi acre secitiamana avou ma fakarogrogo.

³⁰¶ Ma nalupai foci avere sore tamari Iesu neimna mokagi foimata o niana tagata aia nifakairo, seserea acre ia tatapuria tenei;

³¹Kaia neisereace acre ra, pe acowa fakarogrogo pe Iesu aia ta Kristo, ta Nontariki o Atua; ma pe nokofakarogrogo acowa koamo anea mouri ia tshana neigo.