Read Futuna-Aniwa JOANES, 21 Bible Online

JOANES, 21 - Futuna-Aniwa bible

JOANES, 21

¹WAMURI ane iotshi ra Iesu nifakariake aia ia niana tagata aia nifakairo ia tatai o Taiberias; ma hepe nei aia nifakariake aia.

²Nifetacina iai Saimona Pitrus, ma Tomas neigo foci tapa Tetemus, ma Nathaneil o tumrai Kene ia Calili, ma ruanteriki o Sebetius, ma erua foci o niana tagata aia nifakairo.

³Saimona Pitrus neitucua iacre, avou fano fagota. Acre neitucua iateia, Acime foci roro wamuri iatakoi. Acre niroro watafa ma nisopo milowa ia tasi tavaka; ma tupo ra acre seraga eika.

⁴Kaia wamuri tapopo nimai iai, Iesu nitu ia fanua watai, kaia niana tagata aia nifakairo sekeiro mana aia Iesu.

⁵Iesu neitucua iacre, Erecriki, niaua akai konofo, mo? Acre nifasao iateia, Kojimra.

⁶Ma aia neitucua iacre, Fakarerece takowpega ia nuntafa matou o tavaka, ma acowa koamo eika. Acre nifakarerece, ma milow acre kotaru torotshiamai takowpega ma eika nalupai su iai.

⁷Neicitia ra tatane tasi aia nifakairo aia Iesu neicitiafakarafia neitucua ia Pitrus, Aia ta Teriki sore. Wamuri Saimona Pitrus neirogona pe aia ta Teriki sore, aia nifousia iateia tshana umega kot tsha fagota, ma tshana mega nijimra, ma nisopo ia tatai.

⁸Ma acre foci niana tagata aia nifakairo niromai ia tavaka sisi; ma acre jimra papai ia fanua, kaia hepe wun huntret korafa novai, nokotorotshiamai takowpega ia eika.

⁹Milowa acre niromai ia fanua, acre neicitia tiafii o tafia marara iai, ma eika neinage iluga aia, ma bret.

¹⁰Iesu neitucua iacre, Amai faru foci o eika acowa milow niamo.

¹¹Saimona Pitrus nifano iateia, ma nitorotshiamai takowpega ia ia fanua, nifonu o eika sore, wun huntret, ma fefte-thri; ma acre nalupai su ma sefasia takowpega.

¹²Iesu neitucua iacre, koromai ma kakeina aia touate. Ma jimra tasi o niana tagata aia nifakairo tomatua nifakowia aia, Akoi akoi? acre neiro aia ta Teriki sore.

¹³Iesu nimai, ma niamo bret, ma neitufwa iacre, ma eika foci.

¹⁴Tenei fakatoru Iesu nifakariake aia ia niana tagata aia nifakairo, wamuri aia nimasike ia tagata nimate.

¹⁵¶ Wamuri acre nikeinace, Iesu neitucua ia Saimona Pitrus, Saimona, nontariki o Jona, akoi acitiafakarafia avou sore kagi acre ra, mo? Aia neitucua iateia, Keini Teriki sore; akoi keiro avou acitiafakarafia akoi, Aia neitucua iateia, Fakeina tshaku alam.

¹⁶Aia neitucua foci fakarua, Saimona, nontariki o Jona, akoi acitiafakarafia avou, mo? Aia neitucua iateia, Keini Teriki core; akoi keiro pe avou acitiafakarafia akoi. Aia neitucua iateia, Fakeina tshaku asip.

¹⁷Aia neitucua iateia fakatoru, Saimona nontariki o Jona, akoi acitiafakarafia avou, mo? Aroto o Pitrus nimy sore wamuri aia neitucua fakatoru iateia, Akoi acitiafakarafia avou? Ma aia neitucua iateia, Teriki sore, akoi keiro ane iotshi; Akoi keiro pe avou acitiafakarafia akoi. Iesu neitucua iateia, Fakeina tshaka asip.

¹⁸Tamari, tamari, avou koutucua iatakoi, Nopoge ra akoi ta sisi, akoi nitaka ma nitakaro ia none akoi acitiafakarafia, kaia taha nopoge akoi tatane sore, akoi kafakatonusia tshou norima, ma tasi foci katakaia akoi, ma takoia akoi i none akoi secitiafakarafia.

¹⁹Tenei aia neitucua, keifakairo ta mate aia maganerefia ia Atua iateia. Wamuri aia nifasao ra iateia, aia neitucua iateia, Komai wamuri avou.

²⁰Iai Pitrus nitafuri, neicitia tatane aia nifakairo ma neicitiafakarafia nokofano wamuri acrawa, aia foci nimoi ia tshana fatfata ia takai fiafi ma neitucna, Teriki sore, akai aia fakareresia akoi?

²¹Pitrus nokowcitia aia neitucua ia Iesu, Teriki sore, ma taha tatane nei imna?

²²Iesu neitucua iateia, Pe avou acitiafakarafia aia konofo tari avou komai, taha tera iatakoi? komai akoi wamuri avou.

²³Wamuri ra afasao nei anoso neitucua pe tatane tera aia nifakairo sekamate, kaia Iesu sekoutucua iateia, Aia sekamate, kaia pe avou acitiafakarafia aia konofo tari avou komai, taha tera iatakoi?

²⁴Tenei tatane aia nifakairo ma neitucua ane iotshi ra, ma neiserea ane iotshi ra; ma acime keiro tshana fakairo komari.

²⁵Ma ane sore nalupai foci Iesu neimna, acre pe serea tatapuria keitucua acre iotshi, avou kamentua pe iafanua wararonei sisi keinage iotshi tatapuria keiserea iateia. Amen.