Read Futuna-Aniwa JOANES, 3 Bible Online

JOANES, 3 - Futuna-Aniwa bible

JOANES, 3

¹TASI tane o Afarasi nitapa neigo Nikotimus, aia tasi teriki o tagata Jiteia;

²Aia nimai ia Iesu ia tupo, neitucua iateia, Rabai, acime keiro akoi tatane fakairo nimai ia Atua, ma jimra tasi tatane tomatua imna avere sore akoi imna, pe Atua senofo iateia.

³Iesu nifasao ma neitucua iateia, Tamari, tamari, Avou koutucua iatakoi, Pe tatane sefarere foci, aia secitiamana ta vaka o Atua.

⁴Nikotimus neitucua iateia, Feifacowa tatane kofarere foci pe aia tagata ituai? feifacowa aia fano foci ia nonai o tshana nana, ma keifarere foci?

⁵Iesu nifasao Tamari, tamari, avou koutucua iatakoi, Pe tatane sefarere o tavai ma o ta Nokano TAPU, aia sefanomana ia tavaka o Atua.

⁶Aia kofarere o kanouri aia konouri; ma aia kofarere o Nokano TAPU aia nokano.

⁷Natshicina masaro i afasao avou neitucua iatakoi, Erefia acowa kofarere foci.

⁸Tumtagi kosau hepe aia acitiafakarafia, ma akoi fakarogona ta norio o aia, ma akoi puspusi none wehe aia komai, mo none wehe aia kofano, hepe ana tatane iotshi kofarere o Nokano TAPU.

⁹Nikotimus nifasao neitucua iateia, Feifacowa ane iotshi ra mai?

¹⁰Iesu nifasao neitucua iateia, Akoi tasi teriki o tagata Isreil ma puspusi ane iotshi ra, mo?

¹¹Tamari, tamari, Avou koutucua iatakoi, Acime koutucua taha acime keiro, ma fakairo taha acime neicitia, ma acowa sefakarogrogo tshome fakairo.

¹²Pe avou neitucua anea o takere wararonei, ma acowa sefakarogrogo, feifacowa acowa fakarogrogo pe avou fakairo acowa anea o taragi.

¹³Ma jimra tatane tasi neinace ia taragi, kaia aia nifanifo taragi, aia ta Nontariki o tagata, aia konofo ia taragi.

¹⁴¶ Hepe Moses neitshicitshiakace agata ia tugogou, hepe ana ta Nontariki o tagata katshicitshiakace.

¹⁵Pe tagatotshi fakarogrogo aia setouwaki ia tiafi sore, kaia nakamo aniamouri tou ma tou.

¹⁶¶ Ma Atua neicitiafakarafia sore fanua wararonei, pe aia neitufwa tshana Nontariki tasi ana aia niamo, pe tagatotshi fakarogrogo aia setouwaki ia tiafi sore, kaia nokoamo ania mouri tou ma tou.

¹⁷Ma Atua sekowna tshana Nontariki ia fanua wararonei, keitakaroiai ta fanua waronei; kaia pe aia kapare tagata wararonei ia ania mouri.

¹⁸¶ Seioria maganisa o aia fakarogrogo aia, kaia aia sefakarogrogo aia milow ioria niana maganisa konofo, ianei aia sefakarogrogo ia neigo o ta Nontariki o Atua.

¹⁹Tenei takaroiai acre, pe merama komai ia fanua wararonei, ma tagata neicitiafakarafia apouri mokagi ta merama, anera tshare amagane isa.

²⁰Ma tagatotshi maganisa feimcowa ta merama, ma semai mana ia ta merama, pe aia neitucuasana niana maganisa.

²¹Kaia aia maganerefia tamari, aia komai ia ta merama pe tshana magane tagatotshi kowcitia aia vere ia Atua.

²²¶ Wamuri ane ra nimai Iesu ma niana tagata aia nifakairo ia ta fanua Juteia, ma aia neinofo iai ma nibaptiso tagata.

²³¶ Joanes foci iai nokobaptiso tagata i Inon itata Selim, ma tavai nalupai iai, ma acre niromai, ma nibaptiso acre iai.

²⁴Ma nopogera acre setowaki Joanes ia ta fare, mukei.

²⁵¶ Nopogera nifiatu neinace ia faru fakou Joanes nifakairo, ma fakou o Juteia i ateteroa.

²⁶Acre niromai ia Joanes ma neitucua iateia, Teriki fakairo, aia nimai iatakoi nofokagi Jortan, aia akoi nifakairo tagata iateia, aia nokobaptiso, ma tagatotshi koromai iateia.

²⁷Joanes nifasao neitucua, Tatane seamo ane tasi, kaia ane pe kotufwa aia ia taragi.

²⁸Acowa faci neirogona tshaku fasao iateia, pe avou neitucua, avou jimra ta Kristo, kaia pe aia nikowna avou mokagi aia.

²⁹Aia niarafia ta fene vaga aia tatane tshana; kaia te nele o tatane arafia tshana fine aia kotu fakaragona tshan afasao, kabisa sore fakarogona ta noreo o aia arafia ta fine; tenei tshaku kabisa kofonu iateia.

³⁰Aia kavere sore, kaia avou kasisi wamuri nei.

³¹Aia kofanifo iluga aia kosore iluga tagatotshi, aia komai ia fanua wararonei aia komagane wararonei, ma nokofasao o fanua wararonei; aia komai ia taragi aia iluga iotshi.

³²Ma taha aia nakacitia ma nakarogona, ane ra aia takairo, ma jimra tatane tasi purutshia ma fakarogrogo tshana fakairo.

³³Aia nakapurutshia tshana fakairo, neitucua ia tshana roto Atua aia ko mari.

³⁴Ma aia Atua nakakowna kofasao tafasao o Atua, ma Atua setufwa aia fakasisi o ta Nokano TAPU.

³⁵Ta Mana acitiafakarafia ta Nontariki, ma nakatufwa ane iotshi ia tshana norima.

³⁶Aia fakarogrogo ia ta Nontariki nakoamo anea mouri tou matou, ma aia sefakarogrogo ta Nontariki sekacitia anea mouri; kaia ta fakainina o Atua konofo iateia.