Read Futuna-Aniwa JOANES, 4 Bible Online

JOANES, 4 - Futuna-Aniwa bible

JOANES, 4

¹NOPOGERA Teriki sore nikeiro Afarasi neirogona pe Iesu neimna ma nibaptiso tagata nalupai sore kagi Joanes,

²Iesu aia sebaptiso tagata, kaia niana tagata aia nifakairo.

³Aia nifeke Juteia ma nifano foci ia Calili.

⁵Aia nimai iai ia tumrai tasi o Sameria tshana neigo Saikar, itata ta none o fanua Jakob neitufwa tshana nontariki Josef.

⁶Tavai nokonace mugaro o Jakob iai, Iesu nifano teretu palo nitaru iateia, neinofo ia tavai nokonace mugaro, itata taute.

⁷Nimai tasi fine o Sameria keifutshiakace tavai; Iesu neitucua iateia, Eitufwa avou tavai keinumea.

⁸Ma niana tagata aia nifakairo niroro ia tumrai sore keifakamata akai.

⁹Ta fene Sameria neitucua iateia, Tiaha akoi fatane o Juteia nogia avou keitufwa akoi tavai keinumea, ma avou fafine o Sameria? ma tagata o Juteia feimacowa ma sefasao tagata o Sameria.

¹⁰Iesu nifasao neitucua iateia, Pe akoi keiro aia Atua tufwa, ma akai aia koutucua iatakoi, Eitufwa avou keinumea; akoi nakownogia aia, ma aia nakatufwa akoi tavai mouri.

¹¹Ta fine neitucua iateia, Teriki, tshou ane jimra keifutshia tavai iateia, ma tavai konace iraro ana; none wehe akoi amo tera tavai mouri?

¹²Akoi sore kage tamanome Jekob, aia neitufwa acime tavai nokonace tera, ma aia neinumea o aia, ma niana erecriki, ma niana akurimatou?

¹³Iesu nifasao neitucua aia, Tagatotshi kanumea tavai nei, nagimana kamate tavai foci;

¹⁴Kaia tagatotshi numea tavai avou katufwa aia sekamate tavai foci; kaia tavai avou katufwa aia kanofo ia tshana roto tavai nokonace ia anea mouri tou ma tou.

¹⁵Ta fine neitucua iateia, Teriki, eitufwa avou tavai tenei, pe avou semate foci tavai, ma semaimana keifutshiakace.

¹⁶Iesu neitucua iateia, Fano tapa tshou nunwane, ma komai icunei.

¹⁷Tafine nifasao neitucua, Tshaku nunwane kojimra. Iesu neitucua iateia, Akoi koutucua tamari, Tshou nunwane kojimra;

¹⁸Ma akoi niarafia erima nunwane; ma aia akoi arafia milownei, kojimra tshou nunwane, anera akoi neitucua tamari.

¹⁹Te fene neitucua iateia, Teriki, Avou kamentua akoi tase profeta.

²⁰Tamenome nimori ia ta ora nei, ma acowa koutucua pe ia Jerusalem ana erefia tagata komori.

²¹Iesu neitucua iateia, Fine fakarogrogo avou ta nopoge nokomai pe acowa jimra ia ta ora nei, mo jimra ia Jerusalem, kamori ta Mana.

²²Acowa puspusi taha acowa mori iateia; acime keiro taha acime mori iateia; ma aniamouri taragi komai o tagata Juteia.

²³Kaia ta nopoge nokomai, ma konofo milownei, ia aia tagata mori tamari, kamori ta Mana ia nokano ma ia tamari, ma ta Mana acitiafakarafia tagata hepera keimori aia.

²⁴Atua aia nokano ana, ma acre komori aia, erefia komori aia ia nokano ma ia tamari.

²⁵Ta fine neitucua iateia, Avou keiro pe Mesaia nokomai, aia nitapa neigo Kristo; i taha nopoge aia komai aia kafakairo acime ane iotshi.

²⁶Iesu neitucua iateia, Avou aia kofasao iatakoi.

²⁷Hepe aia neitucua ra nimai niana tagata aia nifakairo, ma nimasaro pe aia nifasao ia ta fine; kaia jimra tasi tatane neitucua, Taha akoi kofakowia? mo, Tiaha akoi kofasao ia ta fine?

²⁸Ta fene natshicina tshana taganea o tavai ma nifano tshana retu ia tumrai sore, ma neitucua ia fakou.

²⁹Komai kowcitia tasi tatane, aia neitucua iatavou ane iotshi avou neimna ituai, aia ta Kristo, mo?

³⁰Acre niroce tumrai sore, niromai iateia.

³¹¶ Mokagi acre niromai, niana tagata aia nifakairo neitucua iateia, Teriki, keina akoi.

³²Kaia Iesu neitucua iacre, Avou nakoamo akai keina acowa puspusi aia.

³³Neirogonora niana tagata aia nifakairo neitucua acre macre, Tatane tasi nimai takai aia nikeina, mo jimra?

³⁴Iesu neitucua iacre, Tshaku kai keimna vere hepe aia nikowna avou acitiafakarafia, ma keimna tshana vere kurava.

³⁵Acowa koutucua mo, Efa tumrama ma akorn koleu? kowcitia avou koutucua iacowa, Fakatariaga foimatowa milownei, ma kowcitia avere; acre kego milow ia ta koleu.

³⁶Aia toria ma fetacina kofakamata iateia, ma fakatapuria nohua ia anea mouri tou na tou; pe aia eipesia nohua ma aia toria fakatapuria nohua kabisa fakaliki.

³⁷Ma tafasao ra tamari ia ane nei, Tasi eipesia nohua, ma sece toria fakatapuria nohua.

³⁸Avou nikowna acowa keitoria nokofakatapuria anera acowa severe iateia; faru foci tagata nivere iateia, ma acowa kororo ia niare avere.

³⁹¶ Nalupai tagata Sameria o tumrai tera nifakarogrogo aia, i afasao o ta fine, aia neitucua ra, Aia neitucua iatavou ane iotshi avou neimna, ituai ma.

⁴⁰Iai tagata Sameria niromai iateia, acre nogia mukei aia pe aia nofo iacre; ma aia neinofo iai nopoge erua.

⁴¹Ma tagata nalupai foci nifakarogrogo aia wamuri acre neirogona tshan afasao;

⁴²Ma neitucua ia ta fine, Milow acime sefakarogrogo aia ia tshou afasao; ma acime neirogona aia, ma keiro tinei tamari ta Kristo, aia kapare tagatotshi wararonei.

⁴³¶ Wamuri nopoge erua aia nifeke iai, ma fano ia fanua Calili.

⁴⁴Ma Iesu aia neitucua, ta profeta sekabisa iateia ia fanua tshana.

⁴⁵Nopogera aia nimai ia Calili, tagata Calili niarafia aia iacre, ma acre neicitia ane iotshi aia neimna ia Jerusalem ia tacripoga; ma acre foci niroro ia tacripoga.

⁴⁶Ma Iesu nimai foci ia Kena o Calili, iai aia neimna tavai ia weina. Ma tasi teriki tshana nontariki, nimaci ia tumrai Kaperneum.

⁴⁷Nopogera aia neirogona pe Iesu nifeke Juteia ma nimai ia Calili aia nifano iateia, ma neinogia mukei aia, pe aia komai ma penpena erefia tshana nontariki, ma aia koitata komate.

⁴⁸Iai Iesu neitucua iateia, Pe acowa secitiamana ane sore ma masaro iateia, acowa sefakarogrogo.

⁴⁹Ta Teriki neitucua iateia, Teriki komai iroro mokagi tshaku nontariki komate.

⁵⁰Iesu neitucua iateia, Fano tshou taretu; tshou nontariki komouri. Ma tatane nifakarogrogo ta fasao Iesu neitucua iateia, ma nifano tshana retu.

⁵¹Hepe aia nokofano iraro, tshana afitshicow nifapa aia, ma nifasao nokoutucua, Tshou nontariki komouri.

⁵²Iai aia nifakowia acre enaia aia neikamata keimouri. Ma acre neitucua iateia, neinafi itata touate ta mukaligi neinagke aia.

⁵³Ma ta mana nikeiro aia itata touate Iesu neitucua iateia, Tshou nontariki komouri; ma aia nifakarogrogo ma iotshi tagata o tshana fare.

⁵⁴Tenei ta vere sore fakarua Iesu neimna wamuri aia nifeke Juteia nimai ia Calili.