Read Futuna-Aniwa JOANES, 7 Bible Online

JOANES, 7 - Futuna-Aniwa bible

JOANES, 7

¹WAMURI anera Iesu nitakaro ia Calili; ma aia setakaro ia fanua Juteia, ma tagata Juteia nifakatshigeia keitshi aia mate.

²Nopogera ta tacripoga o tagata Juteia koitata, iateia acre neinofo watafa ia afare o anora tererakou.

³Tshana anoso neitucua, Feke icunei, ma fano ia fanua Juteia, pe tshou tagata akoi fakairo foci kacitia avere sore akoi imna.

⁴Ma jimra tatane tasi muni tshana vere, ma aia acitiafakarafia tagatotshi keiro aia. Pe akoi vere sore ra fakariakage akoi ia fanua wararonei.

⁵Ma foci tshana anoso sefakarogrogo aia.

⁶Iai Iesu nifasao iacre, Tshaku nopoge semai mana iateia, kaia niawa nopoge iateia konofo iacowa nopoge ma nopoge.

⁷Tafanua wararonei sefeimacowa acowa, kaia aia feimacowa avou, ma avou fakairo aia, pe tshana avere isa.

⁸Roro acowa ia ta tacripoga tenei Avou sefano milou ia tacripoga tenei; ma tshaku nopoge iateia semai mana.

⁹Wamuri aia neitucua afasao ra iacre, aia neinofo ia Calili.

¹⁰¶ Kaia wamuri niana anoso nifitshi, aia foce nifitshi ia ta tacripoga, jimra mokagi tagatotshi, kaia hepe fano mune.

¹¹Nopogera tagata Juteia nisara aia ia ta tacripoga, ma neitucua, Aia wehe?

¹²Ma iai nalupai afasao fakarogana tagata neitucua o aia, ma faru neitucua, Aia tatane erefia; faru foci neitucua, Jimra; kaia aia karasia tagata.

¹³Kaia jimra tasi tatane nifasao o aia mokagi tagatotshi, ma acre nimtacu tagata Juteia.

¹⁴¶ Itata aroto o tacripoga Iesu nifano ia tafare sore o Ihova, ma nifakairo.

¹⁵Ma tagata Juteia nimasaro, nokoutucua, Konapecua tatane tenei keiro tatapuria, tagata sefakairo aia?

¹⁶Iesu nifasao iacre, ma neitucua Tshaku nokofakairo kojimra tshaku, kaia tshana nikowna avou.

¹⁷Pe tatane tasi kamna amagane aia acitiafakarafia, aia keiro ta fakairo, pe aia komai o Atua, mo pe avou koutucua tshaku fasao ana.

¹⁸Aia kofasao o tshana magane, nokosara tshana ta sore, kaia aia nokosara tshana ta sore nikowna aia, aia komari, ma jimra maganisa tasi ia aia.

¹⁹Moses neitufwa acowa tafasao tapu mo, ma jimra tasi o acowa maganerefia iateia? Tiaha acowa katakaro kotshi komate avou?

²⁰Tagata nifasao ma neitucua, Akoi nakoamo tasi agelo isa; aia katakaro kotshi komate akoi, mo?

²¹Iesu nifasao, ma neitucua iacre, Avou nakamna tasi vere sore, ma acowa iotshi nimasaro iateia.

²²Moses neitufwa acowa segeakage; jimra aia ane Moses ana nifakairo iateia, kaia tamanowa; ma acowa ia nopoge tapu segiakage tatane.

²³Pe ia nopoge tapu acowa segeakage tatane, pe seiauiai ta fasao tapu o Moses, tiaha acowa fakainina avou, anera avou nakapenpena erefisa tasi tatane ia nopoge tapu?

²⁴Natshicina acowa koutucua ioria magane hepe kowcitia ana, kaia koutucua ioria hepe totonu tamari.

²⁵Iai faru o acre o Jerusalem neitucua, Tenei aia mo, acre acitiafakasafia hotshi komate?

²⁶Kaia, kowcitia, aia tomatua kofasao, ma acre sefasao iateia. Fatoriki keiro tamari mo pe tenei ta Kristo?

²⁷Kaia acime keiro none tatane tenei nimai; kaia taha nopoge Kristo komai, jimra tatane tasi keiro none wehe aia komai.

²⁸Iai Iesu nitapa ia tafare sore o Ihova hepe aia nifakairo, nokoutucua, Acowa keiro avou, ma foci ta none avon nimai; ma avou semai o avou ana, kaia aia nikowna avou aia komari, aia acowa skeiro mana.

²⁹Kaia avou keiro aia; ma avou nimai ia aia, ma aia nikowna avou.

³⁰Nopogera acre nifatshigeia keipurutshia aia, kaia jimra tasi tatane nipurutshia aia, ma tshana nopoge iateia semai mana.

³¹Ma nalupai o tagata nifakarogrogo aia, ma neitucua, Taha nopoge ta Kristo komai, aia kavere sore kage acre avere tatane nei neimna, mo?

³²¶ Afarasi neirogona pe tagata nifasao fakarogona hepre iateia; ma Afarasi ma fatoriki o tafare mori nikowna, afiitshicow niare keipurutshia aia.

³³Nopogera Iesu neitucua iacre, Nopoge toru foci ana avou konofo iacowa, wamuri ra avou fano ia aia nikowna avou.

³⁴Acowa kasara avou ma sekacitia avou, ma none avou konofo iai, acowa taru komai iateia.

³⁵Tagata Juteia neitucua acre macre, None wehe aia kafano, pe acime sekacitia aia? Aia kafano ia acre terowaia iafanua Crisi ma fakairo tagata pouri, mo jimra?

³⁶Taha tafasao ra aia neitucua, Acowa kasara avou, ma sekacitia avou; ma none wehe avou fano iateia, iai acowa taru komai.

³⁷Ia nopoge wamuri, ta nopogi sore ra o ta tacripoga, Iesu nitu ma nitapa, nokoutucua, Pe tatane tasi komate tavai, erefia aia komai iatavou ma keinu.

³⁸Aia fakarogrogo avou hepe tafasao tapu neitucua, ia tshana roto katafe sore avai mouri.

³⁹Kaia tenei aia nifasao o ta Nokano Tapu, aia katufwa iacre fakarogrogo aia, ma ta Nokano Tapu setufwa mokagi ra; ma Iesu sefano mana ia tshana ta sore ia taragi.

⁴⁰¶ Nalupai o tagata iai wamuri acre neirogona afasao ra, neitucua, Tamari tenei ta profeta ra.

⁴¹Faru foci neitucua, Tenei ta Kristo. Kaia faru neitucua, Kamai Kristo ia fanua Calili, mo?

⁴²Tatapuria tapu neitucua, mo, Pe Kristo komai o tagata o Tevit, ma ia tumrai Bethlihim, iai Tevit neinofo?

⁴³Iai tagata nivaia iateia.

⁴⁴Ma faru o acre neicitiafakarafia purutshia aia; kaia jimra tasi nipurutshia aia.

⁴⁵¶ Wamuri ra niromai afitshicow sore ia fatoriki o tafare mori ma Afarasi; ma acre neitucua iacre, Tiaha acowa searafia aia?

⁴⁶Afitshicow sore neitucua, Jimra tatane tasi mokagi nifasao hepe tatane nei.

⁴⁷Iai Afarasi nitasao iacre, Aia karasia acowa foci mo?

⁴⁸Tasi o acre fatoriki, mo o acre Afarasi nifakarogrogo aia mo?

⁴⁹Kaia tenei tagata acre sekeiro tafasao tapa acre isa ana.

⁵⁰Nikotimus neitucua iacre (aia nimai ia Iesu ia tupo, aia tasi o acre),

⁵¹Konapecua tatapuria tapu tshote koutucua ioria tatane tasi mokagi aia karogona aia, ma keiro taha aia imna?

⁵²Acre nifasao neitucua iateia, Akoi foci komai ia fanua Calili, mo? Sara, ma kowcitia; ma jimra tasi profeta masike ia Calili.

⁵³Ma tagatotshi feke fano ia tshare fare.