Read Futuna-Aniwa JOANES, 8 Bible Online

JOANES, 8 - Futuna-Aniwa bible

JOANES, 8

²Ma ia tapopo ana aia nimai foci ia tafare sore Ihova, ma tagatotshia niromai iateia, ma aia neinofo, ma nifakairo acre.

³Ma tagata fakairo ma Afarasi niarafia iateia tasi fine, acre nipurutshia aia nokotshigo tatane tsha faruke; ma wamuri acre neinage aia i aroto o acre.

⁴Acre neitucua iateia, Teriki fakairo, tenei fine acre neipurutshia aia nokotshigo tatane tsha faruke, neicitia aia maganera.

⁵Moses i afasao tapu neitucua mukei acime, pe purutshia tasi hepra, erefia tshiria aia ia afatu iateia; kaia taha akoi koutucua?

⁶Tenei acre neitucua keitakaroiai iai, pe acre kafasosa iateia. Kaia Iesu nimomoi ma ia tshana norima neiserea tatapuria ia takere, hepe aia serogona acre.

⁷Hepre acre nitu nokofakowia aia, aia nimasikekace tshana notshino, ma neitucua iacre, Aia tasi o acowa tshana maganisa kojimra, erefia aia mokagi tsheria tafatu iateia.

⁸Ma foce aia nimomoi, ma neiserea tatapuria ia takere.

⁹Ma acre neirogona ra, nikeiro ia fenagaro tshare acre isa, niroro watafa tasi ma tasi foce, neikamata ia tagata ituai, ia acre wamuri; ma Iesu neinofo ana ma ta fine nokotu i roto.

¹⁰Wamuri Iesu nimasikekace tshana notshino, ma neicitia ta fene ana, aia neitucua iateia, Fine wehe acre neitucua tshou magane? jimra tasi tatane neitshiria akoi, mo?

¹¹Aia neitucua, Jimra tasi tatane Teriki sore. Ma Iesu neitucua iateia, Avou foci setshiria akoi; fano, ma semaganisa foci.

¹²¶ Iesu foci nifasao iacre, nokoutucua, Avou ta merama o iafanua wararonei; aia komai wamuri avou sekatakaro i apouri, kaia aia koamo ta merama o anea mouri.

¹³Afarasi neirogona ra neitucua iateia, Akoi fakairo o akoi; tshou afasao jimra komari.

¹⁴Iesu nifasao neitucua iacre, Pe avou fasao komari; ma avou keiro none avou feke iai, ma none avou kofano iateia, kaia acowa puspusi none avou nifeke, ma none avou fano iateia.

¹⁵Acowa koutucua ioria hepe tagata; Avou sekoutucua kaiioria tasi tatane.

¹⁶Ma pe avou koutucua ioria, tshaku ioria komari; ma avou jimra konofo ana, kaia Avou ma ta Mana aia nikowna avou.

¹⁷Aia foci neisereace ia tatapuria tapu tshowa, pe erua tagata fasao totonu ia ane, aia komari.

¹⁸Avou tasi fakairo acowa o avou, ma ta Mana aia nikownia avou fakairo acowa o avou.

¹⁹Iai acre neitucua iateia, Wehe tshou ta Mana? Iesu nifasao, Acowa sekeiro avou mo tshaku Tata pe acowa nikeiro avou, acowa foci nakeiro tshaku Tata.

²⁰Afasao ra Iesu neitucua ia nopito ta fare o mone, hepe aia nifakairo ia tafare sore o Ihova, ma jimra tasi tatane nipurutshia aia, ma tshana nopoge iateia semai mana.

²¹Iai Iesu neitucua iacre foci, Avou fano tshaku retu, ma acowa kasara avou, ma kamate i amaganisa tshowa; none avou fano iai acowa taru romai iateia.

²²Iai tagata Juteia neitucua, Aia katshi aia komate, mo? ianei aia neitucua ra, None avou fano iai, acowa taru romai iateia.

²³Ma aia neitucua iacre, Acowa koromai wararonei, avou nifanifo ia iluga; acowa koromai o fanua wararonei; avou semai o fanua wararonei.

²⁴Anera avou neitucua iacowa, pe acowa kamate i amaganisa tshowa; ma pe acowa sefakarogrogo pe avou Aia, acowa kamate i amaganisa tshowa.

²⁵Iai acre neitucua iateia, Akai akoi? Ma Iesu nifasao iacre, Aia avou neitucua iacowa ia neikamata.

²⁶Avou nakamo ane nalupai keitucua ma keiioria o acowa, kaia aia nikowna avou komari; ma avou fasao iafanua wararonei ane iotshi avou nakarogona o aia.

²⁷Acre sekeiromana pe aia nifasao iacre o ta Mana.

²⁸Iai Iesu neitucua iacre, Ia taha nopoge wamuri acowa tshicitsiakace ta Nontariki o tagata, acowa keiro avou aia, ma pe avou ana severe, kaia hepe tshaku Tata nifakairo avou, avou fasao ane iotshi ra.

²⁹Aia nikowna avou aia konofo ia avou; ta Mana sefeke avou ana; ma nopoge ma nopoge avau vere iotshi hepe aia acitiafakarafia.

³⁰Hepe aia neitucua, afasao ra, nalupai tagata nifakarogrogo aia.

³¹Iai Iesu neitucua ia tagata Juteia nifakarogrogo aia, Pe acowa konofo mukei ia tshaku fasao, acowa niaku tagata avou fakairo tamari;

³²Ma acowa keiro ta mari, ma ta mari kamna acowa eivetea.

³³¶ Acre nifasao neitucua iateia, Acime erecriki o Ebraham, ma sefousia acime mokagi ia vere o tasi tatane, tiaha akoi neitucua, Kamna acowa eivetea?

³⁴Iesu nifasao iacre, Tamari, tamari avou koutucua iacowa, Pe tatane maganisa, aia ta fitshicow o ane isa.

³⁵Ma ta fetshicow senofo i ta fare tou ma tou, kaia ta Nontariki konofo tou ma tou.

³⁶Pe ta Nontariki kavetea acowa, acowa kavetea tamari.

³⁷Avou keiro acowa erecriki o Ebraham; kaia acowa kosara kotshi komate avou, ianei tshaku fasao senofo i arotowa.

³⁸Avou fasao taha avou nakacitia ia tshaku Tata; ma acowa imna taha acowa nakacitia ia tamanowa.

³⁹Acre nifasao neitucua iateia, Ebraham aia tamanome. Iesu nifasao iacre, Pe acowa erecriki o Ebraham, acowa imna avere o Ebraham.

⁴⁰Kaia milow acowa fakasara keitshi komate avou, tatane nakatucua iacowa tamari, aia avou nakarogona o Atua; tenei Ebraham seneimna.

⁴¹Acowa imna avere o tamanowa. Iai acre neitucua iateia, acime sefarere o tshigo fafine tsha faruke, tshome tamana tasi ana, Atua.

⁴²Iesu neitucua iacre, Pe Atua aia Tamanowa, acowa acitiafakarafia avou; ma avou nifeke ma nimai ia Atua; ma avou semai o avou ana, kaia aia nikowna avou.

⁴³Tiaha acowa puspusi tshaku fasao? ianei acowa taru fakarogona tshaku fasao.

⁴⁴Acowa koromai o tamanowa tiapolo, ma maganisa tshana acowa kamna. Aia neitshi komate ia neikamata, ma senofo ia ta mari, ianei ta mari senofo ia aia. Pe aia koutucua korefu, aia koutucua o tshana, ma aia korifu, ma aia ta mana o tagata korefu.

⁴⁵Ianenei avou koutucua ta mari iacoua ma acowa sefakarogrogo avou.

⁴⁶Akai o acowa koutucua tamari tshaku maganisa? Ma pe avou koutucua tamari, tiaha acowa sefakarogrogo avou?

⁴⁷Aia komai o Atua fakarogona tafasao o Atua, ma acowa serogona acre, ianei acowa jimra o Atua.

⁴⁸Iai tagata Juteia nifasao, ma neitucua iateia, koutucua acime tamari pe akoi tane o Sameria, ma niamo tasi agelo isa?

⁴⁹Iesu nifasao, Avou seamo tasi agelo isa; kaia avou acitiafakarafia tshaku Tata, ma acowa secitiafakarafia avou.

⁵⁰Ma avou sefakatshigeia tshaku kosore, tasi konofo aia fakatshigeia ma koutucua ioria.

⁵¹Tamari, tamari, avou koutucua iacowa, Pe tatane tasi kopurutshia tshaku fasao, aia sekacitia ta mate tou ma tou.

⁵²Iai tagata Juteia neitucua iateia, Milow acime keiro akoi nakoamo tasi agelo isa. Ebraham aia komate, ma aprofeta? ma akoi koutucua, Pe tatane tasi kopurutshia tshaku fasao, aia sekacitia mana ta mate.

⁵³Akoi sore kage tamanome Ebrahem, mo, ma aia komate? ma aprofeta komate; koutucua akoi akai?

⁵⁴Iesu nifasao, Pe avou ana koutucua avou sore, tshaku ta sore kojimra; aia tshaku Tata imna avou ta sore, o aia acowa koutucua, pe aia tshoua Atua.

⁵⁵Kaia acowa sekeiro mana aia; kaia avou keiro aia; pe avou koutucua, avou sekeiro aia, avou korefu hepe acowa; kaia avou keiro aia, ma purutshia tshan afasao.

⁵⁶Tamanowa Ebraham nibisa keicitia tshaku nopoge, ma aia neicitia, ma nibisa.

⁵⁷Iai tagata Juteia neitucua iateia. Akoi jimra konofo wararonei tou fefte, ma akoi nakacitia Ebraham, mo?

⁵⁸Iesu neitucua iacre, Tamari, tamari, avou koutucua iacowa, Mokagi Ebraham neinofo, avou neinofo.

⁵⁹Wamuri ra acre niamo afatu keitshiria aia; Kaia Iesu nifuna aia, ma nifano watafa tafare sore o Ihova, nokofano i arotorea, ma hepra aia fano fakaliki.