Read Futuna-Aniwa JOANES, 9 Bible Online

JOANES, 9 - Futuna-Aniwa bible

JOANES, 9

¹HEPE Iesu nifano fakataftafa, aia neicitia tasi tatane tshana foimata pouri ia nopoge nana nifarere aia.

²Niana tagata aia nifakairo nifakowia aia, nokoutucua, Teriki sore, akai nimaganisa, tatane tenei, mo tshana tamana ma nana nifarere aia foimata pouri?

³Iesu nifasao, Jimra tatane nei, mo tshana tamana ma nana nimaganisa, kaia pe avere o Atua tagata makacitia i aia.

⁴Avou kavere avere o aia nikowna avou, ia ta nopoge, ta tupo nokomai, ia aia jimra tatane tasi vere.

⁵Nopoge iotshi avou konofo ia fanua wararonei, Avou ta merama o fanua wararonei.

⁶Wamuri aia nifasao ra, aia nisavari ia takere, ma neimna perapera o ta savari, ma aia niamosia ta foimata o tatane foimata pouri ia ta perapera.

⁷Ma neitucua iateia; Fano kowkow ia tavai nupu Seloam, nokano neigo tero, Namu. Aia nifano tshana retu iateia, ma nikowkowce, ma nimai nokowcitia.

⁸¶ Tagata neinofo fakaliki, ma acre mokagi neicitia aia foimata pouri, neitucua, Tenei aia mo, neinofo ma neinogea ane?

⁹Faru neitucua, Tenei aia; faru foci neitucua, Aia ko hepe aia; kaia aia neitucua, Avou aia.

¹⁰Anera acre neitucua iateia, Konapecua tshou foimata kaura?

¹¹Aia nifasao ma neitucua, Tasi tatane neigo Iesu neimna perapera, ma naimosia tshaku foimata, ma neitucua iatavou, Fano kowkow ia tavai nupu Seloam; ma avou nifano ma nikowkowce, ma nakamo tshaku foimata kuara merama.

¹²Iai acre neitucua iateia, Aia wehe? Aia neitucua, Avou puspusi.

¹³¶ Acre niarafia ia Afarasi aia neinofo mokagi foimata pouri.

¹⁴Ma ia nopoge tapu ra, Iesu neimna ta perapera, ma neimna tshana foimata kuara.

¹⁵Iai foci Afarasi ma nifakowia aia taha neimna tshana foimata kuara. Aia neitucua iacre, Aia neinagi perapera ia tshaku foimata, ma avou nikowkow, ma kowcitia erefia.

¹⁶Ianei faru o Afarasi neitucua, Tatane tenei semai o Atua, ma aia semaganerefia ia nopage tapu. Faru foci neitucua, Konapecua pe tatane isa imna avere sore hepra? Ma acre nivaia iateia.

¹⁷Acre neitucua foci ia tatane foimata pouri, Taha akoi koutucua o aia, pe aia neimna merama tshou foimata? Aia neitucua, Aia ko tasi profeta.

¹⁸Kaia tagata Juteia sefakarogrogo pe tshana foimata mokagi nipouri, mokagi acre nitapa tamana ma nana o aia nakoamo foimata merama.

¹⁹Ma care nifakowia acrawa, nokoutucua, Tenei tshorua nuntama, mo? aia akorua neitucua nifarere ia foimata pouri? konapecua aia milow kowcitia?

²⁰Tshana tamana ma nana nifasao iacre ma neitucua, Acimawa keiro tenei tshamawa nuntama, ma pe aia nifarere ia foimata pouri;

²¹Kaia taha neimna aia kowcitia milow, acimawa puspusi; ma akai neimna tshano foimata kuara, acimawa puspusi; aia kosore; fakowia aia; aia katucua.

²²Afasao ra tshana tamana ma nana neitucua, ma acrawa nimtacu tagata Juteia; ma mokagi ra tagata Juteia neitucua, pe tatane tasi neitucua aia ta Kristo, erefia turocina aia watafa tafare mori.

²³Ianei tshana tamana ma nana neitucua, Aia kosore; fakowia aia.

²⁴Foci acre nitapa ta tane foimata nipouri mokagi, ma neitucua iateia, Eitufwa Atua ta sore; acime keiro tatane tenei isa.

²⁵Aia nifasao ma neitucua, Pe aia tagata isa mo jimra avou puspusi; tasi ane avou keiro, tshaku foimata nipouri mokagi, milow avou kowcitia.

²⁶Iai acre nifasao foci iateia, Taha aia neimna iatakoi? taha vere tshana neimna tshow foimata kuara?

²⁷Aia nifasao iacre, Avou nakatucua iacowa mokagi, ma acowa sefakarogona; tiaha acowa fakarogona foci? acowa ma niana tagata aia fakairo mo?

²⁸Wamuri ra acre neisaciria aia, ma neitucua, Akoi tasi aia fakairo; kaia acime Moses nifakairo.

²⁹Acime keiro Atua nifasao ia Moses, kaia acime puspusi akai nikowna aia.

³⁰Ta tane nifasao neitucua iacre, Tiaha, tenei ane avou masaro iateia, pe acowa puspusi none aia nifeke ma mai iai, ma aia neimna tshaku foimata kuara.

³¹Milow acitia keiro pe Atua sefakarogona tagata isa, kaia pe tatane tasi komori Atua, ma maganerefia ia tshanafasao, aia kafakarogona aia.

³²Wamuri ta neikamata o iafanua wararonei acitia sefakarogona o tasi tatane neimna kuara foimata o tasi pe aia nifarere ia foimata pouri.

³³Pe tatane nei sekomai o Atua, aia kotaru vere hepra.

³⁴Acre nifasao ma neitucua iateia, Akoi nifarere ia ane isa, ma akoi fakairo acime, mo? Ma acre nitorotshia aia watafa.

³⁵Iesu nifakarogona pe acre nitorotshia aia watafa, ma wamuri aia neicitia aia, aia neitucua iateia, Akoi fakarogrogo ta Nontariki o Atua, mo jimra?

³⁶Aia nifasao, ma neitucua, Akai aia, Teriki sore, pe avou fakarogrogo aia?

³⁷Iesu neitucua iateia, Akoi neicitia aia, ma foci aia kofasao iatakoi.

³⁸Ma aia neitucua, Teriki sore, Avou fakarogrogo. Ma aia nimori iateia.

³⁹Ma Iesu nifasao, Ma keiioria magane avou nimai ia fanua wararonei, pe acre foimata pouri kuara ma kacitia, ma pe acre foimata merama kamna pouri.

⁴⁰Ma faru o Afarasi neinofo ia aia neirogona afasao ra, ma neitucua iateia, Foimatome kopouri foci, mo?

⁴¹Iesu neitucua iacre, Pe foimatowa pouri niawa maganisa kojimra, kaia milow acowa koutucua, Acime kowcitia, anera niawa maganisa konofo.