Read Futuna-Aniwa AVERE O APOSTOLO 1 Bible Online

AVERE O APOSTOLO 1 - Futuna-Aniwa bible

AVERE O APOSTOLO 1

¹TATAPURIA avau neiserea mokagi, Thiofilus, o ane iotshi Iesu neikamata keimna ma keifakairo,

²Ia ta nopogera niarafia aia iluga, wamuri aia ia Nokano Tapu nifakairo mukei ta apostolo, acre aia mokagi kasubina;

³Ia acre foci aia nimai, acre neicitia aia nimouri wamuri aia nimate, ia ane nalupai acre nikeiro tamari, acre neicitia aia nopoge forte, ma nifakairo acre ania mane o tavaka o Atua.

⁴Aia ma acre nifetacina, aia neitucua mukei iacre natshicina feke Jerusalem, kaia tari ia ane Tamana nifasao mokagi iateia, aia, acowa neirogona avou nifasao iateia.

⁵Ma tamari Joanes nibaptiso ia tavai; kaia kabaptiso acowa ia Nokano Tapu ia taha nopoge koitata.

⁶Nopogera acre nifetacina iateia, acre nifakowia aia, nokoutucua, Teriki Sore, ia nopoge nei akoi kanagi foci ta vaka ia tagata o Isreil mo jimra?

⁷Aia neitucua iacre, Jimra erefia iacowa keiro taha nopoge, mo taha tou Tamana ana tomatua keiro.

⁸Kaia katufwa iacowa tomatua, wamuri ta Nokano Tapu kofanifo iluga acowa; ma acowa kafakairo tagata o avou ia Jerusalem, ma ia fanua Juteia, ma ia fanua Samaria, ma ia fanua iotshi papai su:

⁹Ma wamuri aia nifasao ane iotshi ra, iai acre neicitia niarafia aia iluga; ma apa tasi niamo nifuna aia ia niare foimata.

¹⁰Acre neicitia mukei ma totonu ia taragi hepe aia nifano iluga, neicitia tatane erua nikotu itata iacre nitaka ia tumiga kego.

¹¹Acrawa foci neitucua, Acowa fakou o Calili, tiaha acowa kotu icunei nokowcitia fakatariaga ia taragi? tenei Iesu nifeke acowa kofano iluga ia taragi, ia taha nopogi aia kamai foci hepra acowa neicitia aia fano ia taragi.

¹²¶ Wamurira acre niromai Jerusalem nifeke ta ora Olivet, aia neinofo sisi papai ia Jerusalem hepe tagata roro ia nopoge tapu.

¹³Wamuri acre niromai ia tumrai sore, acre niroro ia ta rotopa iluga efare, iai neinofo Pitrus, ma Jakobus, ma Joanes, ma Antreus, ma Filipos, ma Tomas, ma Bartholomeus, ma Mathius, ma Jakobus ta nontariki o Alfius, ma Saimona o tagata Silotai, ma Jutas ta noso o Jakobus.

¹⁴Acre Iotshi ra neinofo ia tasi fenagaro i amori ma tapa mukei Ihova, ia afine, ma Mery ta nana o Iesu, ma ia tshana anoso.

¹⁵¶ I anopogera Pitrus nikotu i aroto o tagata Iesu nifakairo, ma neitucua (nitawa neigo o acre iotshi hepe wun huntret ma twente),

¹⁶Fakou ma anoso, tatapuria tapu nei neisereace magane neimna hepra, aia ta Nokano Tapu, neitucua mokagi ia rogoutu o Tevit ia magane o Jutas, aia niarafia acre nipurutshia Iesu.

¹⁷Ma nitawa aia ia acime, ma aia niamo nuntafa o tenei avere o nokova,

¹⁸Tatane tenei nifakamata tasi none o fanua ia nomata maganisa, ma aia nito tshipatshipa ma tshana nonai eifasia i aroto ma iotshi tshana vava nimarigi watafa.

¹⁹Ane nei nikeiro iotshi tagata neinofo ia Jerusalem, ianenei ta none fanua ra neitapa neigo ia tshare fasao, Ta none fanua o toto.

²⁰Ma aia neisereace ia tatapuria o Salm, “Erefia tshana tumrai egogau, ma erefia jimra tasi tatane nofo iai; ma tshana none i avere fakairo erefia tasi face amo.”

²¹Ianenei o acre takou ra neinofo iacime iotshi anopogi ta Teriki Sore Iesu nimai ma nifano nokonofo iacime,

²²Neikamata ia ta baptiso o Joanes ia nopogera niarafia aia iluga nifeke iacime, erefia kamata tasi keinaga aia iacime, keifakairo tagata totonu o tshana nimasike ia tagata nimate.

²³Acre neinagi erua, Josef nitapa neigo Barsabus, aia nitapa neigo wamuri Justus, ma Mathaias.

²⁴Ma acre nimori, ma neitucua, Akoi, Teriki sore, akoi keiro aroto o tagatotshi, fakairo acime tasi o acrawa akoi neikamata.

²⁵Pe aia amo nuntafa o tenei avere o fakairo, ma o tagata apostolo ia acre Jutas i amaganisa nito, pe aia nifano ia tshana none.

²⁶Ma acre neimna aloti iateia, ma ta loti nito ia Mathaias, ma acre nitawa aia ma ta eleven apostilo.