Read Futuna-Aniwa AVERE O APOSTOLO 10 Bible Online

AVERE O APOSTOLO 10 - Futuna-Aniwa bible

AVERE O APOSTOLO 10

¹TASI tatane neinofo ia Sesaria neigo Kornilius, aia tatane sore o tagata tsha tatowa, neigo tshare motu tsha Itale.

²Aia tatane mori, ma nimtacu Atua ia iotshi tagata o tshane fare, aia neitufwa karofa nalupai ia tagata, ma segapu mana mori Atua.

³Aia neicitia ane sore hepe ta mitshi itata tara nikotu fakatafa o nopoge ra ta agelo o Atua nokomai ia aia efare, ma nokoutucua iateia, Kornilius.

⁴Aia neicitia aia, aia nimtacu, ma neitucua, Taha tera Teriki sore? Ma aia neitucua iateia, Tshou amori ma thou karofa ia tagata konace iluga ma nimentua emoa Atua.

⁵Ma milow kowna takou ia Jopa, ma tapa tasi neigo Saimona tshana neigo wamuri Pitrus

⁶Aia konofo efare o tasi neigo Saimona tshana vere penpena nokiri kurimatou, tshana fare koitata tatai, aia kafakairo akoi taha akoi kamna.

⁷Wamuri ta agelo nifasao Kornilius nifano, aia nitapa erua fitshicou o tshana fare, ma tasi tatane o tatowa aia tasi nimori tamari o acre nivere iateia nopoge ma nopoge;

⁸Ma wamuri aia neitucua ane iotshi ra iacratou, aia nikowna acratou ia Jopa,

⁹¶ Ia aratou, hepe acratou niroro ia tshare aretu, ma niromai itata umrai sore, Pitrus nifano ia tatahufu tafare keimori iai itata toute;

¹⁰Aia nitshitoge sore, ma acitiafakarafia keina, kaia hepe acre nituna takai aia hepe nimero mukei.

¹¹Ma neicitia taragi neitshicea, ma tasi taganea nifanifo iateia, hepe tasi tumega nuntafa sore nifousia ia efa nunturi, ma nifanifo ia takere wararonei;

¹²Ia neinofo iotshi ane kororo ia novai efa ia takere wararonei, ma aneiro, ma ane kotoro, ma amanu o avavania.

¹³Ma tasi norio nimai iateia, Masike, Pitrus; kotshi komate, ma kakeina.

¹⁴Kaia Pitrus neitucua, Jimra hepera Teriki sore; ma avou sekeina ane nofo ana mo ane isa.

¹⁵Ma ta norio nifasao aia foci fakarua, Taha Atua neipenpena, natshicina akoi koutucua aia ane nofo ana.

¹⁶Ane nei neimna fakatoru; ma taganea nitorotshiakace foci ia taragi.

¹⁷Milou iai Pitrus nimentua ia tshana roto, taha nokano o ane nei aia neicitia hepe ta mitshi, neirogona takou toru Kornilious nikowna nakasara ta fare o Saimona, ma nikotu ia tafeipa.

¹⁸Ma nitapa, nifakowia pe Saimona, tshana neigo wamuri Pitrus, neinofo iai.

¹⁹Hepe Pitrus nimentua ane aia neicitia hepe ta mitshi, ta Nokano Tapu neitucua iateia, Kowcitia tatane toru kosore akoi.

²⁰Masike ianenei, fano iraro, ma fano ia acratou, sekumtacu ane; ma avou nakakowna acratou.

²¹Iai Pitrus niteifo ia takou Kornilius nikowna iateia; ma neitucua, Kowcitia, avou aia acoutou fatshigeia; tiaha acowa koromai?

²²Ma acratou neitucua Kornilius ta senturio, tatane magane totonu, ma aia kumtacu Atua, ma tagatotshia o fanua Juteia koutucua tshana magane erefia, Atua neitucua iateia ia tasi agelo erefia, keikowna iatakoi keiarafia akoi ia tshana fare, ma keirogona tshou afasao.

²³Aia neitapa acratou efare, ma acratou neinofo iai. Ma ia aratou Pitrus nifano ia acratou, ma faru anoso nifeke Jopa niroro ia aia.

²⁴Ma aratou wamuri nopoge ra acre niroro ia umrai Sesaria. Ma Kornilious nitari acre, ma nitapa fetacina efare tshana anoso ma anele.

²⁵Ma hepe Pitrus nimai efare, Kornilius nifapa aia, ma nito itata tshana novai, ma nimori aia.

²⁶Kaia Pitrus tshicitshiakace aia, nokoutucua, Masike; Avou foci tatane ana.

²⁷Hepe aia nifasao ia aia, aia nifano efare, ma neicitia nalupai tagata nifetacina iai.

²⁸Ma aia neitucua iacre, Acowa keiro ane nei itapu pe tatane o Juteia keinofo itata, mo komai efare o tasi tatane o fanua foci; kaia Atua nakafakairo avou, pe isa avou koutucua tasi tatane nofo ana ma epaku sa.

²⁹Ianenei avou nimai iacowa, sefiatu iateia, milownei wamuri acowa nikowna iatavou; ianenei avou fakowia acowa tiaha acowa nikowna niarafia avou?

³⁰Ma Kornilius neitucua, Nopoge ra mokagi nopoge efa nisiri avou nipari ia our tenei; ma ia our iva avou nimori ia tshaku fare, ma neicitia, tasi tatane kotu emoa avou nitaka ia tumega kego noneate.

³¹Ma neitucua, Kornilious, tshou mori korogona, ma tshou karofa ia tagata komentua emoa foimata o Atua.

³²Ianenei kowna ia Jopa, ma tapa mai icunei Saimona, tshana neigo wamuri Pitrus, aia konofo efare o tasi Saimona tshana vere penpena nokiri kurimatou itata tatai; aia wamuri aia komai aia kafasao iatakoi.

³³Milowa ianenei avou nikowna iatakoi; ma akoi maganerefisa pe akoi komai. Ianenei milou acime iotshi icunei emoa Atua, keirogona ane iotshi Atua nakafasao iatakoi.

³⁴Wamuri ra Pitrus nifakamama tshana rogoutu, ma neitucua, Tamari avou koucitia Atua secitiafakarafia tagata o fanua tasi ana;

³⁵Kaia ia fanua iotshi pe tasi kumtacu aia, ma maganerefia iateia, aia acitiafakarafia aia.

³⁶Ta fasao Atua nikowna ia tagata o fanua Isreil, nokova kogapu erefia ia Iesu Kristo; (aia Teriki sore o tagatotshi;)

³⁷Ta fasao ra, acowa keiro, aia nikova ia fanua iotshi o Juteia, ma neikamata ia Calili wamuri ta baptiso Joanes nikova;

³⁸Pe Atua neitufwa Iesu o Nasareth ta Nokano Tapu, ma tomatua tshana, aia nitakaro kofori fanua maganerefia, nokopenpena acre iotshi tiapolo takaroiai, ma Atua konofo ia aia.

³⁹Ma acime neicitia ma fakairo ane iotshi ra aia neimna ia fanua o tagata Juteia, ma ia Jerusalem; aia acre neitshi nimate ma nitau ia tererakou;

⁴⁰Aia Atua neitshicitshiakace ia nopoge toru wamuri, ma fakariake aia mokagi tagata;

⁴¹Jimra ia tagatotshi, kaia ia tagata mokagi neikamata ia Atua, ia acime, ma acime nikeina ma neinumea ia aia wamuri aia nimasike ia tagata nimate.

⁴²Ma aia neitucua mukei iacime keikova ia tagata, ma keifakairo mukei, pe aia Atua mokagi neinage keiioria magane o tagata mouri ma mate.

⁴³Ia aia iotshi aprofeta nifakairo, pe ia neigo tshana, pe tagatotshi fakarogrogo aia katouwaki nori amaganisa tshare.

⁴⁴¶ Iai hepe Pitrus neitucua afasao ra. Ta Nokano Tapu nitakeifo ia acre iotshi neirogona ta fasao iai.

⁴⁵Ma acre tagata o ta segeakage pe neirogrogo nimasaro sore, acre niromai ia Pitrus, ianenei ia tagata o fanua pouri neiregea ta karofa o ta Nokano Tapu.

⁴⁶Ma acre neirogona acre fasao i afasao nalupai, ma Kabisa Atua. Iai Pitrus nifasao,

⁴⁷Tatane akai neitucuasana tavai, pe sebaptiso acre tagata tera, aia neitufwa acre ta Nokano Tapu hepe neitufwa acime?

⁴⁸Aia neitucua mukei keibaptiso acre ia neigo o ta Teriki sore. Wamuri ra acre nifakowia aia konofo iacre faru nopoge.