Read Futuna-Aniwa AVERE O APOSTOLO 11 Bible Online

AVERE O APOSTOLO 11 - Futuna-Aniwa bible

AVERE O APOSTOLO 11

¹MA apostolo ma anoso neinofo ia Juteia neirogona pe tagata o fanua pouri foci ma niamo tafasao o Atua.

²Ma nopogera Pitrus nifitshi ia Jerusalem, acre tagata o segeakage nifiatu aia i afasao.

³Nokoutucua, Akoi nifano efare ia takou sesegeakage ma nikeina ia acre.

⁴Kaia Pitrus nifasao ane iotshi ra ia nontafito, ma neitucua amagane iotshi iateia iacre, nokoutucua,

⁵Avou neinofo ia tumrai sore Jopa nokomori; ma ia ane neicitia hepe ta mitshi avou neicitia ane sore, Tasi Taganea nifanifo, hepe nuntafa tumaga sore, nifanifo ia taragi ia efa noporpori; ma aia nimai iatavou.

⁶Ia aia avou nagi mukei tshaku foimata, ma avou nementua, ma neicitia anea roro ia novai efa o fanua wararoni, ma aneiro, ma anea nokotoro, ma amanu o avavanea.

⁷Ma avou neirogona tasi norio neitucua iatavou, Masike, Pitrus, kotaia komate ma kakeina.

⁸Kaia avou neitucua, Jimra hepra, Teriki sore, ma jimra ane tasi konofo ana mo ane isa nakafano ia tshaku rogoutu.

⁹Kaia ta norio nifasao foci iatavou, Taha Atua nakapenpena, natshicina akoi koutucua aia ane konofo ana.

¹⁰Ane nei neimna fakatoru; ma iotshi torotshiakace iluga foci ia taragi.

¹¹Ma kowcitia, milowa tatane toru nimai ia tafare avou neinofo iai, nikowna ia Sesaria iatavou.

¹²Ma ta Nokano Tapu neitucua iatavou, fano ia acratou, sekumtacu ane. Ma acre ra anoso ono niroro ia avou, ma acime niroro efare o tatane ra;

¹³Aia neitucua iacime pe aia neicitia tasi agelo ia tshana fare, aia nikotu ma neitucua iateia, Kowna takou ia Jopa, ma tapa Saimona, tshana neigo wamuri Pitrua;

¹⁴Aia katucua iatakoi afasao, ia acre akoi ma iotshi tagata ia tshou fare kamo ania mouri.

¹⁵Ma hepe avou neikamata keifasao, Ta Nokano Tapu nito ia acre, hepe ia acime ia nontafito.

¹⁶Iai avou nimentua ta fasao o Teriki sore, hepe aia neitucua, Joanes tamari nibaptiso ia tavai; kaia kabaptiso acowa ia Nokano Tapu.

¹⁷Ianene pe Atua neitufwa acime wamuri acime nifakarogrogo ta Teriki sore Iesu Kristo; taha avou, pe avou kofiatu Atua?

¹⁸Wamuri acre neirogona ane iotshi ra, acre sefasao, ma nibisa Atua, nokoutucua, Tamari Atua nakatufwa tagata o fanua pouri, kotagi ma natshicina ane isa ia anea mouri.

¹⁹¶ Acre nifura papai ia nisewa neinace ia Stefanus niroro papai ia Fenaise, ma Saiprus, ma Antiok, nokova ta fasao ia tagata o Juteia ana.

²⁰Ma faru o acre takou o Saiprus ma Sairine, acre wamuri acre niromy ia Antiok, nifasao ia tagata o fanua Crisi, nokova ta Teriki sore Iesu.

²¹Ma norima o Atua neisitu acre, ma nalupai su nifakarogrogo ma kuafe ia Teriki sore.

²²¶ Nopoge ra afasao o ane iotshi ra, nimai ia atariga o ta kalasia neinofo ia Jerusalem; ma acre nikowna Barnabas, pe aia kofano papai ia Antiok.

²³Aia, wamuri aia nimai, ma neicitia ta karofa o Atua, aia nibisa, ma nifasao iacre iotshi, pe ia aroto tishana acre keipurutshia ta Teriki sore.

²⁴Ma aia tatane erefia, ma nifonu o Nakano Tapu ma o fakarogrogo; ma nalupai tagata nifakatapuria ia ta Teriki sore.

²⁵I anopoge ra Barnabas nifeke nifano ia Tarsus, ma keisara Saulo;

²⁶Ma wamuri aia neicitia, aia niarafia aia ia Antiok. Ma ane nei nimai, pe iotshi tasi tou acrawa nifetacina ta kalasia iai, ma nifakairo tagata nalupai. Ma tagata nifakairo ma mori tamari acre mokagi neitapa neigo tshare tagata o Kristo ia Antiok.

²⁷¶ I anopoge ra nimai aprofeta ia Antiok acre nifeke Jerusalem.

²⁸Ma nikotu tasi o acre neigo Acabus, ma nifakairo ia Nokano Tapu pe taha atou akai fakasisi kanofo ia fanua iotshi wararonei; aia nimai hepra i anopoge o Klatius Sesar.

²⁹I anopoge ra tagata mori, iotshi tatane hepe tshare tomatua nimentua keikowna karofa mone tshare keisitu anoso neinofo ia Juteia;

³⁰Ane nei acre neimna, ma nikowna aia ia takou elter ia arima o Barnabus ma Saulo.