Read Futuna-Aniwa AVERE O APOSTOLO 12 Bible Online

AVERE O APOSTOLO 12 - Futuna-Aniwa bible

AVERE O APOSTOLO 12

¹ANOPOGE ra Herot ta Teriki nifakatonusia tshana norima keitakaroiai aroto o faru o ta Kalasia.

²Aia neitshi komate Jakobus ta noso o Joanes ia tomatshira palo.

³Ma ianenei aia neicitia tagata Juteia nibisa iateia, aia nifano foci keipurutshia Pitrus ma. (I anopoge ra o ta bret leven jimra iai).

⁴Wamuri aia nipurutshia aia, aia neinage aia ia tafare mukei, ma neitufwa aia ia sekstin takou o tatowa keipurutshia ma fatshigeia aia; nimentua wamuri ta paska keiarafia aia watafa ia tagata.

⁵Ianenei acre nipurutshia Pitrus ia tafare mukei; kaia ta Kalasia segapu nokomori Atua keipare aia.

⁶Ma nopoge ra Herot neicitiafakarafia arafia aia watafa, ia tupo ra Pitrus nokomero ia aroto o erua tatane o tatowa, nifousia ia ous erua, ma takou nifatshigeia ta feitoca nikotu mokagi tafeitoca keifatshigeia ta fare mukei.

⁷Ma neicitia, ta agelo o ta Teriki sore nimai iateia, ma tasi merama ate ia ta fare mukei; aia neitucua Pitrus ia nikouperpere matou, ma neitshicitshia aia, nokoutucua, Masike milowa. Ma tshana ous nito ia tshana norima.

⁸Ma ta agelo neitucua iateia, fetacina tshou katoutshi, ma fousia tshou santal ia tshou novai, Ma aia neimna hepra. Ma aia neitucua iateia, Kataka tshou mega sore iluga, ma komai wamuri avou.

⁹Ma aia nifano watafa wamuri aia; ma sekeiro ane nei tamari ta agelo neimna; kaia nimentua aia neicitia ane sore hepe ta mitshi,

¹⁰Wamuri acrawa niroro watafa takou nifatshigeia ta fakatasi ma fakarua, acrawa niromai ia ta feitoca o ta fatu aia ia teretu nokofano ia umrai sore; aia ana nitshiki ia acrawa; ma acrawa niroro watafa, ma niroro ia tasi teretu kurava, ma wamuri ra ta agelo nifeke natshicina aia.

¹¹Wamurira Pitrus nikeiro aia kuara ma nimentua erefia, aia neitucua, Milou avou keiro tamari, pe ta Teriki sore nikowna tshana agelo, ma nipare avou ia norima o Herot, ma ia iotshi acitiafakarafia o tagata Juteia.

¹²Ma wamuri aia nimentua, aia nimai ia ta fare o Mere ta nana o Joanes, neigo tshana wamuri Markus; iai tagata nalupai nifetacina nokomori.

¹³Ma hepe Pitrus neituctucia ta feitoca o tafeipa, tasi fine sisi nimai keirogona, neigo ishana Rota.

¹⁴Ma wamuri aia nikeiro ta norio o Pitrus, aia setshike tafeitoca ma kabisa, kaia nitere efare, ma neitucua pe Pitrus nikotu watafa tafeitoca.

¹⁵Acre neitucua iateia akoi kowkali. Kaia aia neitucua mukei aia iai tamari. Wamuri ra, acre neitucua, Aia tshana agelo.

¹⁶Kaia Pitrus nikotu nokotuctucia; ma wamuri acre nitshike ta feitoca, ma neicitia aia, acre nimasaro.

¹⁷Kaia aia nokotutusiana iacre ia norima keinatshicina kofasao, neitucua iacre pe ta Teriki sore neiarafia aia watafa ta fare mukei. Ma aia neitucua, Roro koutucua ane iotshi ra ia Jakobus ma ia anoso. Ma aia nifeke nifano ia none foci.

¹⁸Milowa hepe tara neinace, takou o tatowa nimtacu ma nifasao sore, puspusi Pitrus fano ma aia jimra.

¹⁹Ma wamuri Herot neifakasara aia, ma secitiamana aia, aia nifakowia mukei takou nifatshigeia, ma neitucua mukei keitaia acre komate. Ma aia niteifo ia Sesaria ma neinofo iai.

²⁰¶ Ma Herot nifakainina sore ia acre o Tairus ma Saiton; kaia acre nimai ia arotorea tishana iateia, ma nakamna Blastus ta fitshicou neicitia erefia tarotopa efare o teriki tshare nele, nogia aia towaki tshana fakainina iacre; tanenei ta fanua o teriki nifakeina tshare fanua.

²¹Ma ia nopoge ra neitucua iateia, Herot nitaka ia tumega erefisa o teriki, nikoike ia tshana afata sore, ma nikova iacre.

²²Ma tagata iai nivaro, nokoutucua, Aia ta noreo o Atua, ma jimra o tatane.

²³Ma milowa ta agelo o Teriki sore neitshi aia, ianenei aia setufwa Atua ta kosore; ma eiro nikeina aia, ma aia nimate.

²⁴¶ Kaia ta fasao o Atua kosore ma nifakatapuria nalupai.

²⁵Ma Barnabas ma Soulo nifeke Jerusalem, wamuri tsharawa avere kurava, ma acrawa niarafia ia acrawa Joanes, tshana neigo wamuri Markus.