Read Futuna-Aniwa AVERE O APOSTOLO 13 Bible Online

AVERE O APOSTOLO 13 - Futuna-Aniwa bible

AVERE O APOSTOLO 13

¹NEINOFO ia akalasia ia Antiok faru aprofeta ma fakou nifakairo; hepe Barnabas ma Saimona neitapa neigo tshana Naicer, ma Luseus o fanua Sairine, ma Manen, i atou aia sisi nifakeina ma nifakairo aia ia Herot tatane sore o fanua, ma ia Saulo.

²Hepe acre nimori ia Teriki sore ma nipari, ta Nokano Tapu neitucua, Nagi iatavou Barnabas ma Saulo ia ta vere avau nakatapa acrawa iateia.

³Ma wamuri acre nipari ma nimori, ma neinagi tshare norima iluga acrawa, acre nikownace acrowa.

⁴¶ Hepe Nokano Tapu nikowna acrawa watafa, acrawa nifeke niroro ia Selusia, ma nifeke iai acrawa nisua ia Saiprus.

⁵Ma anopogera acrawa neinofo ia Salamis, acrawa nikova ta fasao o Atua ia afare mori o tagata Juteia; ma acrawa foci niarafia Joanes keisitu acrawa vere.

⁶Ma wamuri acratou niroro ia fanua motu ia Pefos, acratou neicitia tasi tatane tapu o tafegeitu, aia profeta, korifu, tatane o fanua Juteia, tshana neigo Barjosua;

⁷Aia neinofo ia tatane sore o fanua iai nitapa neigo Serjeus Paulus, aia tatane arapakou; aia nitapa Barnabas ma Saulo, ma nogia acrawa keifakairo aia ta fasao o Atua.

⁸Kaia Elimas tatane tapu o tafegeitu (ma tera ta nokano o tshana neigo) aia nifiatu acre, neicitiafakarafia tatane sore kuafe natshicina ta fakarogrogo.

⁹Nopogera Saulo, nitapa foci tshana neigo Paulo, nifonu ia Nokano Tapu, neinagi tshana foimata neicitia mukei aia.

¹⁰Ma neitucua aia, Akoi kofonu ia karasia ma maganisa, nontariki o tiapolo, akoi feimacowa iotshi maganerefia, tiaha akoi senatshicina takaroiai ta maganerefia o ta Teriki sore?

¹¹Ma milou, kowcitia, ta norima o ta Teriki sore konofo ia akoi, ma foimata tshou kapouri, sekacitia mana tara ia tou tsi. Ma milowa nito ia aia takofu ma apouri; ma aia nitakaro kofori nokosara tasi keiarafia aia ia norima.

¹²Nopoge ra ta tane sore, wamuri aia neicitia ane ra neimna, nifakarogrogo, nokomosaro ia afakairo o ta Teriki sore.

¹³Ia nopoge Paulo ma tshana aneli nifeke Pefos, acre niromai ia Perca ia Pamfilia, ma Joanes natshicina acrawa ma nifeke nimai ia Jerusalem.

¹⁴¶ Kaia ia nopoge ra acrawa nifeke Perca niromai ia Antiok ia fanua Pisitia, ma niroro ia tafare mori ia nopoge tapu, ma neinofo iai.

¹⁵Ma wamuri nitawa ta fasao tapu ma aprofeta, takou sore o tafare mori nikowna ia acrawa, nokoutucua, Akorua takou ma anoso, pe akorua acitiafakarafia fakairo tagata, fakairo acre.

¹⁶Iai Paulo nimasike, ma neitutusia ia tishana norima, neitucua, Takou o Isreil ma acowa pe acowa kumtacu Atua, fakarogono.

¹⁷Ta Atua o tagata Isreil, kamata tamanoteia, ma neitshicitshia acre tagata i anopogera acre neinofo hepe tagata o fanua papai, ia fanua Ijipt, ma ia norima tomatua aia niarafia acre watafa.

¹⁸Ma itata atou forte aia neicitia tshare magane ia tugogou.

¹⁹Ma wamuri nitakaroiai tagata o avaka fitu ia fanua Kenan, aia nitarau tshare afanua iacre ia aloti.

²⁰Ma wamuri ra aia neitufwa iacre takou sore neinofo ioria magane safi tshare itata efa huntret ma fifte atou, ia Samuel ta profita.

²¹Ma wamuri ra acre nifakowia keitufwa iacre tasi teriki; ma Atua neitufwa iacre Saulo ta nontariki o Kis, tatane o nuntafa fanua o Benjamin ia atou ma tou forte.

²²Ma wamuri aia nitowaki aia, aia neinace iacre Tevit keinagi aia tshare teriki, aia nifasao o aia, ma neitucua, Avou nakacitia Tevit ta nontariki o Jese, tasi tatane ra wamuri tshaku roto, aia kamaganerefia iotshi hepe avou nifakairo;

²³O erecriki o tenei tatane Atua hepe aia nifasao mokagi iateia neinace ia tagata Isreil Tatane Kapare, Iesu;

²⁴Joanes nimokagi nikova mokagi aia nimai ta baptiso o kotagi ma natshicina amaganisa ia tagata o Isreil.

²⁵Ma hepe Joanes neimna tshana avere, aia neitucua, Akai acowa mentua avou aia? Avou jimra aia. Kaia, kowcitia tasi komai wamuri avou, ta vava o tshana asu o novai avou serefia keifou ma veteia.

²⁶Takou ma anoso, erecriki o tagata o Ebraham, ma acre iotshi o acowa pe kumtacu Atua, iacowa ta fasao o aniamouri taragi tenei nikowna.

²⁷Ma acre konofo ia Jerusalem, ma tskare fatoriki, ianenei acre sekeiro aia, ma sekeiro anorio o aprofeta acre tawa ia otshi nopoge tapu, acre neimna amagane hepra acre neitucua ia towaki aia.

²⁸Ma acre secitiamana ane isa ia aia keikotshi aia komate iateia, acre nogia Pailet pe aia kotshi aia komate.

²⁹Ma wamuri acre neimna iotshi hepe neiseriace o aia, acre niamweifo aia ia tererakou, ma neinagi aia ia tapunaga.

³⁰Kaia Atua neitshicitshiakace aia ia tagata nimate;

³¹Ma neicitia aia nopoge nalupai acre nifeke Calili ia aia nimai ia Jerusalem, acre tshana tagata neicitia makeifakairo tagata iteia.

³²Ma acime keitucua iacowa afasao erefia, tenei tafasao Atua neitucua mokagi ta tamanoteia,

³³Atua neimna ane iotshi hepra ia acime tshare erecriki, i tenei aia neitshicitshiakace Iesu foci; hepe aia foci neisereace i Sam erua. Akoi tshaku Nontariki, iranei avou niamo akoi.

³⁴Ma ianenei aia neitshicitshiakace aia ia tagata nimate, aia jimra foci kuafe ia ta mate, aia neitucua hepe afasao tenei, Avou katufwa akoi karofa tamari erefia o Tevit.

³⁵Ianenei aia neitucua foci ia tasi foci Sam, Akoi kajimra natshicina tsho tasi Tatane Erefia keicitia parapara.

³⁶Ma Tevit wamuri aia niavere iotshi ia tagata o tshana atou, hepe Atua neicitiafakarafia, aia nimero ia mate, ma neinage aia tamanoteia, ma neicitia parapara;

³⁷Kaia aia, Atua neitshicitshiakace foci, secitia mana parapara.

³⁸¶ Keiro acowa iotshi, takou ma anoso, pe ia tatane neikova iacowa ta katowaki nori amaganisa;

³⁹Ma ia aia acre iotshi pe fakarogrogo towaki nori amaganisa iotshi tshare, ia ane ra setowaki nori amaganisa tshowa ia tafasao tapu o Moses.

⁴⁰Fatshigeia acowa ianei, pea ne sekomai iacowa hepe nifasao iateia i aprofeta;

⁴¹Kowcitia, acowa tagata feimacowa, ma masaro, ma koto ia tiafi sore, ma avou emna ta vere i anopoge tshowa, ta vere acowa sekafakarogrogo, pe tatane koutucua mukei aia iacowa.

⁴²Ma wamuri tagata Juteia niroro efuafo ta fare mori, tagata o fanua pouri nogia mukei pe afasao ra kova iacre ia nopoge tapu wamuri ra.

⁴³Wamuri tagata nifetacina iai nimorice, nalupai tagata Juteia ma tagata mori o fanua pouri niroro wamuri Paulo ma Barnabas, acrawa nokofasao iacre, nifakairo mukei acre keinofo ia karofa o Atua.

⁴⁴¶ Ma nopoge tapu wamuri ra nifetacina iateia iatata iotshi tagata o tumrai sore ra keirogona ta fasao o Atua.

⁴⁵Kaia wamuri takou Juteia neicitia tagata nalupai su nifetacina iai, acre nifonu ia fakainena, ma nifasosa ia ane iotshi ra Paulo neitucua, nokoutucua aia korefu ma nokoutucua tafasosa tapu iateia.

⁴⁶Nopoge ra Paulo ma Barnabas sekumtacu ma tomatua, ma neitucua, Aia erefia pe tafasao o Atua nifasao mokagi iacowa; kaia neicitia acowa towaki aia ia acowa, ma mentua acowa isa amo ania mouri tarage atow ma tow, kowcitia, acime kotafuri ia tagata o fanua pouri.

⁴⁷Ma hepra ta Teriki sore neitucua mukei iaceme, nokoutucua, Avou nagi akoi keitufwa merama ia tagata o afanua pouri, pe imna akoi keitufwa ania mouri kapare ia ane iotshi isa ma, ia nuntafa iotshi o fanua wararonei.

⁴⁸Ma wamuri tagata o fanua pouri neirogona ra acre nibisa, ma neimna kosore ta fasao o ta Teriki sore, ma acre aia neikamata ia ania mouri taragi atow ma tou nifakarogrogo.

⁴⁹Ma ta fasao o ta Teriki sore nikova ia fanua iotshi iai.

⁵⁰Kaia tagata Juteia neimna aroto isa o fafine mori maganerefia ma sore, ma o takou sore o umrai sore ra, ma neinace kasewa ia Paulo ma Barnabas, ma nitowaki acrawa watafa tshare afanua.

⁵¹Kaia acrawa neituctucia tefu takere neinofo ia tsharawa novai keitucuasana iacre, ma niromai ia Ikonium.

⁵²Ma tagata mori nifonu ia kabisa, ma ia Nokano Tapu.