Read Futuna-Aniwa AVERE O APOSTOLO 14 Bible Online

AVERE O APOSTOLO 14 - Futuna-Aniwa bible

AVERE O APOSTOLO 14

¹ANE nei nimai ia Ikonium, pe acrawa iotshi niroro ia tafare mori o tagata Juteia, ma nifasao sore, neimna tagata Juteia nalupai su, ma tagata Crisi nifakarogrogo.

²Kaia faru tagata Juteia sefakarogrogo ma neimna isa aroto o tagata o fanua pouri, ma neimna tshare afinagaro isa aia anoso.

³Ianenei nopoge nalupai acrawa neinofo nokofasao tomatua ia Teriki sore, aia nifakairo acre tshana afasao erefia, ma neitufwa ane neicitia ma avere sore keimna ia norima o erua.

⁴Kaia tagatotshi ia umrai sore ra nivaia, ma nuntafa nipurutshia afasao o tagata Juteia, ma nuntafa nipurutshia afasao o Apostolo.

⁵Ma wamuri tagata o fanua pouri ma foci tagata Juteia ia tshare fatoriki, acitiafakarafia keitakaroiai acrawa, ma keitucia acrawa ia afatu.

⁶Acrawa neirogona o aia mokagi. ma nifura ia Laistra ma Terbe, acrawa umrai sore o Laikaonia, ma ia fanua iotshi kofori;

⁷Ma iai acrawa nikova afasao erefia.

⁸¶ Neinofo iai tasi tatane ia Laistra, tshana novai nitaru isa, tshana novai isa ia nopoge ra nana nifarere aia, ma aia sefano ia novai;

⁹Aia neirogono Paulo fasao, aia neicitia mukei aia, ma nimentua aia niamo fakarogrogo keipenpena aia.

¹⁰Paulo neitucua ia noreo palo, Masike kotu totonu ia tshou novai. Ma aia nisopo ma nitakaro.

¹¹Ma wamuri tagata neicitia ane Paulo neimna, acre neinace tshare anorio, nokoutucua ia afasao o Laikaonia Atua nifanifo iacime ia noaga hepe fakou.

¹²Ma acre nitapa neigo o Barnabas Jupiter; ma Paulo, Merkureus, ianei aia fasao sore kagi.

¹³Iai tatane tapu o Jupiter, aia neinofo mokagi tshare umrai sore, niarafia kurimatou ma noso terarakou ia afeipa, ma neicitiafakarafia keitakavari kotia acre komote ia tagata.

¹⁴Apostolo neirogona ra, Barnabas ma Paulo eifasia umiga tsharawa, ma nifura ia tagata, nokotapa fakapalo.

¹⁵Ma nokoutucua, Fakou, tiaha acowa imna ane ra? Acimawa foci takou afenagaro ma hepe acowa, ma kova iacowa pe erefia acowa katafuri ia ane isa iotshi ra ia Atua mouri, aia neimna taragi, ma afanua wararonei, ma tatai, ma ane iotshi konofo iacre;

¹⁶Aia i atou ra ituai neinatshicina tagata iafanua iotshi keiroro ia tshare aretu.

¹⁷Kaia aia senatshicina nage anea nifakairo tagata aia neinofo, ma nimaganerefia, ma neitufwa aicitia towa ia taragi, ma atou foirakou nohua ma akai somo erefia, nokofonu tshote aroto ia akai ma kabisa.

¹⁸Ma ia afasao ra acrawa neitucuasana tagata, pe acre sekotshi kurimatou takavari iacrawa.

¹⁹¶ Ma niromai iai faru tagata Juteia, ma o Antiok, ma o Ikoneum, acre nifasosa mukei ia tagata, ma neitsheria Paulo ia afatu, nitorotshia aia watatafa umrai sore, arotorea nimentua aia nikomata.

²⁰Kaia hepe tagata mori nikotu kofori aia, aia nimasike ma nimai ia umrai sore; ma ia aratou aia nifeke ia Barnabas niroro acrawa ia Terbe.

²¹Ma wamuri acrawa nikova tafasao erefia ia umrai sore ra, nifakairo tagata nalupai, acrawa kuafe nimai foci ia Laistra, Ikonium, ma Antiok,

²²Nokofakairo mukei arotorea o tagata mori, ma nokofasao mukei iacre keinofo mukei ia ta fakarogrogo, ma pe ia ane nalupai kasewa ma takaroia arotomea acime kororo ia tavaka o Atua.

²³Ma wamuri acrawa nimori ma nokonagi tsharawa norima iluga nouru o fakou acrawa neinagi acre aelter ia akalasia ia afare mori iotshi, ma acrawa nimori ia nokopari, acrawa nimori neitufwa acre ia Teriki sore, aia acre nifakarogrogo ia aia.

²⁴Ma wamuri acrawa niroro ia fanua iotshi o Pisitaia, acrawa niromai ia Pamfilia.

²⁵Ma wamuri acrawa nikova ta fasao erefia ia Perca, acrawa niteifo ia Atalaia;

²⁶Nifeke iai acrawa nisua ia Antiok, iai nimori nogia karofa o Atua iacrawa mokagi acrawa nifeke ia avere acrawa neimna kurava.

²⁷Ma wamuri acrawa niromai ma nifetacina fakatapuria ta kalasia, acrawa, neitucua avere ma ane iotshi Atua neimna ia acrawa, ma tshana magane hepe aia nitshike tafeitoca o fakarogrogo ia tagata o afanua pouri.

²⁸Ma iai acrawa neinofo anopoge nalupai ia tagata mori.