Read Futuna-Aniwa AVERE O APOSTOLO 15 Bible Online

AVERE O APOSTOLO 15 - Futuna-Aniwa bible

AVERE O APOSTOLO 15

¹MA faru takou niteifo ia Juteia nifakairo anoso, Pe acowa jimra segiakage hepe Moses nifakairo, acowa seamo ania mouri taragi.

²Wamuri Paulo ma Barnabas nifasao ma nifiatu sore i afasao ia acre, neitucua mukei pe Paulo ma Barnabas ma faru foci o acre, kafitshi ia Jerusalem ia apostolo ma aelter keifakowia acre magane totonu iateia.

³Ta kalasia niarafia acre ia tshare teretu, acre niroro ia fanua Finaise ma Samaria, nokoutucua iacre tagata o fanua pouri niamo ia arotorea ta mori o Atua; ma acre neimna anoso iotshi nibisa iateia.

⁴Wamuri acre niromai ia Jerusalem, niarafia acre ta kalasia, ma apostolo, ma aelter, ma acre neitucua ane iotshi pe Atua neimna ia acre.

⁵Kaia nimasike iai faru o tagata afarasi acre nifakarogrogo, nokoutucua, Pe erefia keisegeakage acre, ma keifakairo acre keimna magane iotshi hepe afasao tapu o Moses nifakairo.

⁶¶ Apostolo ma aelter nifetacina fakatapuria acre keifakatamou magane tenei.

⁷Ma wamuri afasao sore iateia, Pitrus nimasike neitucua iacre, Fakou ma anoso acowa keiro ia nopoge ituai Atua nikamate pe tagata o fanua pouri, ia tshaku rogoutu neirogona tafasao erefia ma fakarogrogo.

⁸Ma Atua aia keiro aroto, nifakairo acre, nokotufwa iacre ta Nokano Tapu, hepe aia neitufwa acime;

⁹Ma sekovaia acime ma acre, nokopenpena arotorea ia fakarogrogo.

¹⁰Ianenei tiaha acowa iauiai aroto o Atua, keinage ane mafa iluga nupenawa o tagata mori, aia tamanoteia, ma acitia nitaru keiamo?

¹¹Kaia acitia fakarogrogo ia karofa o Teriki sore Iesu Kristo acitiae roro taragi, hepe acre.

¹²¶ Wamuri ra iotshi tagata nifetacina ia sefasao ma neirogona Barnabas ma Paulo nokofasao o avere sore, ma ane masaro atua neimna ia tagata o fanua pouri ia acrawa.

¹³¶ Ma wamuri kurava tsharawa fasao, Jakobus nifasao, nokoutucua, Takou ma anoso rogona tshaku fasao.

¹⁴Saimona nakafasao pe Atua ia neikamata nifano ia tagata o afanua pouri, keiamo faru o acre tagata keicitiafakarafia tshana neigo.

¹⁵Ma hepe magane ra aprofeta nifasao; hepe neisereace,

¹⁶Wamuri nei avou faci kuafe, ma kanoatu foci tafare o Tevit, aia neisarofa, ma avou kanoatu foci ta nopitopito neisarofa o aia, ma katshicitshia aia;

¹⁷Pe faru o tagata konofo komori Teriki sore, ma iotshi tagata o afanua pouri, pe kotapa tshaku neigo iluga acre, nokoutucua ta Teriki sore, aia imna ane iotshi ra.

¹⁸Atua keiro avere iotshi tshana ia nontafito o fanua waroronei.

¹⁹Ianenei tshaku fasao tenei, pe acitia seiauiai aroto o acre, tagata o afanua pouri nikuafe ia Atua.

²⁰Kaia pe acitia serea tatapuria iacre, pe acre natshicina amagane isa iotshi o tetua, ma kotshigo fafine tsha faruke, ma natshicina anea tshicivinia nupenawa komate, ma toto.

²¹Ma ituai su faru tagata ia umrai iotshi nikova Moses, nokotawa tshana tatapuria ia afare mori anopoge tapu iotshi.

²²Wamuri ra apostolo ma aelter, ma iotshi ta kalasia, neicitiafakarafia keikowna takou acre kamate faru o acre ia Antiok ia Paulo ma Barnabas; Jutas nitapa neigo wamuri Barnabas, ma Sailas, acrawa takou sore ia anoso;

²³Ma acre neiserea tatapuria iacre, hepe afasao tenei; Apostolo, ma aelter, ma anoso, karofa ia anoso o tagata o fanua pouri ia Antiok, ma Sairea, ma Silisa;

²⁴Ianenei acime nakarogona, pe faru takou nifeke acime nakaiauiai arotowa ia afasao, nakarasia acowa, nokoutucua, Acowa erefia segeakage acowa, ma imna magane hepe tafasao tapu koutucua; iacre acime sekoutucua mukei hepra;

²⁵Acime nifetacina ia fenagaro tishana koutucua, keikowna kamate takou iacowa ia tshote Barnabas ma Paulo neicitiafakarafia.

²⁶Takou nakanagi tshare aniamouri ia neigo o tshote Teriki sore Iesu Kristo.

²⁷Ianenei acime nakowna Jutas ma Sailas, acrawa foci katucua iacowa ane otshi ra ia rogoutu.

²⁸Ma nimentua erefia ia Nokano Tapu, ma iaceme, keinagi iluga acowa jimra sece ane sore acre ane mukei ma erefisa;

²⁹Pe acowa natshicina ma itapu iacowa keina takai o ane takavari ia tetua, ma ia toto, ma ia ane komate ia tshicivinia nupenawa, ma ia tshigo fafine tsha faruke, pe acowa natshicina acre ane itapu ra, acowa kamaganerefia. Karofa acowa.

³⁰Wamuri acre nikownace acre, acre niromai ia Antiok; ma wamuri acre nifetacina fakatapuria tagatotshi iai, o tamori, acre neitufwa acre ta tatapuria.

³¹Wamuri ra acre nitawa aia, acre nibisia ia afasao erefia.

³²Ma Jutas ma Sailas, acrawa aprofeta ma, nifasao erefia anoso ia afasao nalupai, ma neimna acre tomatua i tamori.

³³Ma wamuri acrawa neinofo iacre faru nopoge, anoso neitucua erefia acrawa roro ia apostolo.

³⁴Kaia Sailas neicitiafakarafia keinofo iai faru foci nopoge.

³⁵Paulo foci ma Barnabas neinofo ia Antiok nifakairo ma nikova ta fasao o ta Teriki sore, ma nalupai faruke neisitu.

³⁶¶ Wamuri faru nopoge nisiri Paulo neitucua ia Barnabas, Erefia acimawa roro foci ma kowcitia tshamawa anoso ia umrai iotshi acimawa nakova afasao o Teriki sore iai, ma kacitia tshare magane.

³⁷Ma Barnabas neicitiafakarafia mukei keiarafia iateia Joanes, neitapa neigo tshana wamuri Markus.

³⁸Kaia Paulo nifeimacowa keiarafia aia iacrawa, ianenei aia natshicina acrawa ia Pamfilia, ma sefano iacrawa ia ta vere.

³⁹Ma acrawa nifiatu sore iateia i afasao, pe acrawa nivaia iateia tasi nifeke tasi foci, ma Barnabas niamo Markus ma nisua ia Saiprus;

⁴⁰Ma Paulo niamo Sailas, ma nifeke, anoso nimori Atua keirofa aia.

⁴¹Aia nifano ia fanua Sairea ma Silicia, nokomna tomatua sore akalasia.