Read Futuna-Aniwa AVERE O APOSTOLO 16 Bible Online

AVERE O APOSTOLO 16 - Futuna-Aniwa bible

AVERE O APOSTOLO 16

¹NOPOGE ra aia nimai ia Terbe ma Laistra; ma neicitia, tasi tatane mori iai nitapa neigo Timothius, ta nontariki o tafene tasi, o ta fanua Juteia, aia nifakarogrogo Iesu; kaia tshana tamana tatane o fanua Crisi;

²Anoso neinofo ia Laistra ma Aikonium nifasao erefia o tshana magane.

³Paulo acitiafakarafia aia keifano watafa ia aia; ma niamo aia ma neisegeakage aia, ianenei magane o tagata Juteia neinofo ia fanua iotshi ra, ma acre iotshi nikeiro pe tshana tamana tatane o fanua Crisi.

⁴Ma hepe acre niroro ia umrai sore iotshi, acre neitufwa iacre, afasao tapu ma mukei, keipurutshia, neisereaca ia apostolo ma aelter neinofo ia Jerusalem.

⁵Ma hepra neimna akalasia nofo mukei ia ta fakarogrogo, ma faru foci nifetacina iacre nopoge ma nopoge.

⁶Wamuri acre niroro ia fanua Frijia, ma iafanua Calatia, ma Nokano Tapu neitucuasana acre keikova ta fasao erefia ia Esia.

⁷Wamuri acre niromai ia Misia, acre neicitiafakarafia keiroro ia Bethinia; Kaia ta Nokano Tapu neitucuasana acre.

⁸Ma acre niroro itata Misia niteifo ia Troas.

⁹Ma ane neicitia hepe tamatshi nimai ia Paulo i tupo; Nikotu itata aia tasi tatane o Masitonia, ma nifakowia mukei aia nokoutucua, komai ia Masitonia ma asitu acime.

¹⁰Ma wamuri aia neicitia ane ra hepe tamatshi, milowa acime neicitiafakarafia keiroro ia Masitonia, nikeiro tamari pe ta Teriki sore nitapa acime keikova ta fasao erefia iacre.

¹¹Ianenei nifeke troas acime niromai totonu ia Samothresia, ma nopoge wamuri ra ia Niopolis;

¹²Ma nifeke iai niromai ia Filipai, aia ta umrai sore o nuntafa tera o Masitonia, ma tagata Roma neinofo iai, ma acime neinofo iai faru nopoge.

¹³Ma ia nopoge tapu acime niroro watafa umrai sore ia ta none itata tavai tafe tasi, iai faru nifetacina keimori; ma acime neinofo ma nifasao ia fafine nifetacina ia.

¹⁴¶ Ma tasi fine neigo Litia, tshana vere nifakamata umega ouroura, tshana umrai sore Thaiataira, aia nimori Atua ma neirogona acime, Teriki sore nitshiki tshana roto, pe aia nipurutshia mukei ania mane Paulo nifasao iateia.

¹⁵Ma wamuri nibaptiso aia, ma tagata o tshana fare, aia neinogia acime, nokoutucua, Pe acowa nimentua avou magane totonu ia ta Teriki sore, koromai ia tshaku fare ma konofo iai. Ma aia nifasao mukei acime iateia.

¹⁶¶ Ane nei nimai, hepe acime niroro keimori, tasi fine tapu tasi agelo isa neinofo ia aia, aia nifapa acime, aia niamo fakamata nalupai ia tshana tagata nomata o magane terahu ma;

¹⁷Aia nifano wamuri Paulo ma acime, ma nitapa, nokoutucua, Fakou tera afitshicou o ta Atua sore su, acre fakairo acitia ta teretu o aniamouri.

¹⁸Aia neimna magane ra nopoge nalupai, Kaia Paulo nimai tshana roto iateia, aia nitafuri, ma neitucua ia ta agelo isa, Avou koutucua mukei iatakoi ia neigo o Iesu Kristo komai watafa aia, ma aia nimai watafa aia ia nopoge ra.

¹⁹¶ Ma wamuri tshana tagata neicitia ta nontafito o tshare nomata nifano, acre nipurutshia Paulo ma Sailas, ma nitorotshia acrawa ia emarai ia takou sore,

²⁰Ma niarafia acrawa ia takou sore, nokoutucua, Takou tera o fanua Juteia, takaroiai sore tshome umrai sore.

²¹Ma fakairo amagane, itapu acime keiamo, mo magane iateia, ianenei acime tagata Roma.

²²Ma tagatotshi nifetacina iai nimasike ma nifeimacowa acrawa; ma takou sore neifasia tshare umega ma neitucua keitaia acrawa.

²³Ma wamuri acre nitaia acrawa sore ia toura, acre neinagi acrawa ia ta fare, nifasao tatane nifatshigeia ra fare mukei, keipurutshia acrawa mukei;

²⁴Ma aia nakarogona afasao ra, neinagi acrawa ia aroto o tafare mukei, wamuri ma nifousia tsharawa novai mukei ia ane tererakou iateia.

²⁵¶ Ma ia tara tupo Paulo ma Sailas nimori, ma nifeke tagoro tapu ia Atua; ma tagata nifousia ia ta fare mukei neirogona acrawa.

²⁶Ma milowa tasi tumahuke sore nimai iai, ma tafare mukei nivirviri; ma milowa iotshi afeitoca nitshitshike, ma iotshi avava ous nifousia takou iai neiveteia.

²⁷Ma tatane tshana vere fatshigeia ta fare mukei nokofagona kuara ia tshana mero, ma nokowcitia afeitoca o tafare mukei nitshikece, aia nitarotshiace tshana tomatshira palo, ma koitata kotshi aia komate, nokomintua tagata neinofo ia tafare mukei nifurace.

²⁸Kaia Paulo nitapa ia noreo palo, nokoutucua, natshicina kotshi akoi, ma acime iotshi icunei.

²⁹Iai aia nitapa amai telama tasi, ma nisopo efare, ma nimai nokovirviri, ma nito emoa Paulo ma Sailus,

³⁰Ma niarafia acrawa efuafo, ma neitucua, Fakou Sore, taha avou emna keiamo aniamouri tou ma tou?

³¹Ma acrawa neitucua, Fakarogrogo ta Teriki sore Iesu Kristo, ma akoi kamo aniamouri taragi tou ma tou, ma iotshi tagata o tshou fare.

³²Ma acrawa nifasao iateia ta fasao o Teriki sore, ma ia acre iotshi neinofo ia tshana fare.

³³Aia niamo acrawa ia our tera o tupo ra, ma neitataroa tsharawa notshino eifasia ia toura, ma nibaptiso aia, ma iotshi tshana tagata milowa.

³⁴Ma wamuri aia niarafia acrawa ia tshana fare, aia neinage takai mokagi acrawa, ma nibisa, nokofakarogrogo i Atua ma ia iotshi tagata o tshana fare.

³⁵Tiau nimai iai, takou sore o umrai ra, nikowna afitshicou sore, nokoutucua, Erefia takou erua ra kororo.

³⁶Ma tatane nifatshigeia tafare mukei neitucua afasao ra ia Paulo. Takou sore o umrai nakowna nokoutucua erefia akorua kororo; ianenei milou feke, ma roro ia merino.

³⁷Kaia Paulo neitucua iacre, Acre nitaia acimawa emoa tagata nontafito ma afasao iateia kojimra, acimowa takou o Roma, ma neinagi acimawa ia ta fare mukei; ma milou acre segeake acimawa efuafo motshmotshi mo? jimra tamari; kaia erefia acre ana koromai ma arafia efuafo acimawa.

³⁸Ma afetshicou sore neitucua afasao ra ia takou sore o umrai ra, ma acre, nimtacu, wamuri acre neirogona acrawa takou o Roma.

³⁹Ma acre niromai acrawa, ma niarafia acrawa efuafo, ma neinogia acrawa keifeke umrai sore ra.

⁴⁰Ma acrawa niroro efuafo tafare mukei, ma niroro ia tafare o Litia, ma wamuri acrawa neicitia anoso, acrawa neimna arotorea nibisa, acrawa nifeke iai.