Read Futuna-Aniwa AVERE O APOSTOLO 17 Bible Online

AVERE O APOSTOLO 17 - Futuna-Aniwa bible

AVERE O APOSTOLO 17

¹WAMURI acrawa niroro ia fanua Amfipolis ma Ampolonea, acrawa niromai ia Thesalonaika, nikotu iai tasi ta fare mori o tagata Juteia;

²Ma Paulo, hepe tshana magane iafanua nifano efare iacre, ma nopoge tapu toru aia nifakairo acre i afasao tapu.

³Nokofakairo nokano o afasao tapu nokoutucua, hepra neisereace erefia pe Kristo komate, masike foci ia tagata nimate; ma pe tenei Iesu avou kova iacowa, aia ta Kristo.

⁴Ma faru o acre nifakarogrogo, ma nifetacina ia Paulo ma Sailas; ma o tagata mori o fanua Crisi nalupai su, ma o fafine sore nalupai.

⁵¶ Kaia acre tagata o fanua Juteia acre sefakarogrogo, nifakainina, ma nifetacina iacre faru takou o acre isa, ma nifakatapuria nalupai tagata, ma nitakaroiai aroto o tagata nalupai su ia umra sore, ma neicitiafa karafia iauiai ta fare o Jeson, ma neisara keiarafia acre efuafo ia tagata.

⁶Ma iai acre secitiamana acrawa, acre nitorotshia Jeson ma faru foci anoso ia takou sore o umrai sore, nokotapa, Acre takou ra nakafurusia iafanua wararonei iluga iraro niromai icunei ma.

⁷Acre Jeson niarafia, ma acre iotshi magane sece hepe towaki afasao mukei o Sisar, nokoutucua, pe tasi foci teriki konofo, Iesu.

⁸Ma acre iauiai aroto o tagata, ma o takou sore o umrai sore, wamuri acre neirogona afasao ra.

⁹Ma wamuri acre neitucua ioria Jeson, ma anoso, pe acre faruke magane safi, acre neitucua acre roro.

¹⁰¶ Ma anoso milowa nikowna Paulo ma Sailas ia tupo ia Beria; acrawa niromai iai ma niroro ia ta fare mori o tagata Juteia.

¹¹Acre nimaganerefia sore kagi acre o Thesalonaika, ianinei, acre niamo ta fasao erefia milowa ia fenagaro erefia, ma nitawa tatapuria o Ihova nopoge ma nopoge, keicitia pe aia neitucua ane iotshi hepra mo?

¹²Ianenei nalupai o acre nifakarogrogo; foci o acre fafine sore o fanua Crisi, ma o takou nalupai.

¹³Ma wamuri takou o Juteia acre neinofo ia Thesaloneika nikeiro pe ta fasao o Atua nikova ia Paulo ia Beria, acre niromai iai foci, ma iauiai aroto o tagata.

¹⁴Wamuri ra anoso milowa nikownace Paulo keifano hepe ia tatai, kaia Sailas ma Timothius neinofo iai wamuri ra.

¹⁵Ma acre nikorocina Paulo niarafia aia Athens; ma aia neitucua iacre keitucua Sailas ma Timotheus keiromai ia aia milowa, ma acre nifeke.

¹⁶¶ Anopoge ra Paulo nitari acrawa ai Athens, tshana roto nimy sore i aia, ianenei aia neicitia tagata o umrai sore ra nimori ana tetua ma ane pouri.

¹⁷Ianenei aia nifiatu i afasao ia tafare mori ia tagata Juteia, ma ia tagata mori iai, ma ia emarai nopoge ma nopoge ia acre nifetacina ia aia.

¹⁸Iai faru o acre takou arapakou o nuntafa tagata Epekurus, ma o nuntafa tagata Stoiko nifiatu aia i afasao. Ma faru neitucua. Taha tenei tane anteriari koutucua? faru foci, Aia hepe kofasao ia tetua acime puspusi; ianenei aia nikova iacre Iesu, ma ta kamasike foci o tagata komate.

¹⁹Acre niamo aia, ma niarafia aia ia emarai sore takou sore o umrai sore nifetacina iai, nokoutucua, Erefia acime keiro afakairo fou tenei, aia akoi kofasao iateia?

²⁰Ma akoi nakarafia mai afasao fou ia nontarega tshome, ianenei acime acitiafakarafia keiro nokano o aneiotshi ra.

²¹Ma itoshi tatane o Athens ma tatane o afanua papai nokonofo iai, severe, Kaia neinofo iai nopoge ma nopoge ana Keitucua, mo keirogona ane fou.

²²¶ Iai Paulo nikotu i aroto o emarai sore o takou sore, ma neitucua, Takou o Athens, Avou kowcitia pe i ane iotshi acowa kumtacu tetua sore.

²³Ma hepe avou kofano itata, ma neicitia tshow amori, avou neicitia tasi afata, ia tatapuria tenei neiserea ia aia, IA ATUA ACIME PUSPUSI. Aia acowa puspusi ma mori iateia, avou fakairo iacowa o aia.

²⁴Atua aia neimna iafanua wararonei ma ane iotshi konofo ia aia, nokeiro aia Teriki sore o tarage ma iafanua wararonei, senofo ia afare mori aremore neimna;

²⁵Foci semori aia ia aremore, hepe aia acitiafakarafia ane, nokeiro aia tufwa tagatotshi ania mouri, ma mopsake, ma ane iotshi.

²⁶Ma neimna o tasi toto tagata o iafanua iotshi keinofo iafanua wararonei, ma aia neitucua mokagi tou ma tou tshare, ma avaikege o tshare avaka konofo iai;

²⁷Pe acre nokosara Teriki sore, pe erefia acre roro wamuri aia, ma keiro aia, kaia aia jimra papai ia acitia iotshi.

²⁸Ma ia aia acitia komouri, ma katakaro, ma nakamo ania mouri; hepe faru foci o tshoua tagata neiserea agoro neitucua, Ma acitia iotshi tshana erecriki.

²⁹Ianenei pe acitia neimna ia Atua, isa acitia koutucua pe nouru o Atua hepe colt, mo selver, mo tafatu neiserea ia norima o tagata.

³⁰Ma atou tagata puspusi hepra Atua sesaciria iateia; kaia milou kotapa mukei tagatotshi iafanua keitagi ma natshicina aniamane isa.

³¹Ianenei aia neitucua ia tase nopoge, i aia kaioria iafanua wararonei ia magane totonu, ia tatane tera aia neinagi iateia mokagi; ia ane nei aia nifakairo tagatotshi tamari, i aia tshicitshia ia tagata nimate.

³²¶ Ma wamuri acre neirogona o tshicitshia tagata komate, faru tagata nisoutari; ma faru foci neitucua, Acime karogona akoi foci taha nopoge i ane nei.

³³Ma Paulo nifeke acre.

³⁴Kaia faru takou neicitiafakarafia tshana fakairo, ma nifakarogrogo; tasi o acre Taioniseus tatane sore iai, ma tasi fine neigo tshana Tamaris, ma faru foci tagata ia acrawa.